Октябрьни 1-чил дюнйейл’ кьаIсинбышин Йигъ алгъайгьи.Дагъыстанни халкьбыше кьаIсди инсанна дараджа, ваIъазбы, васибы, мыIслягьатбы гьаргьаммаше гьихъа аххъы. КьаIсинкъун джуваб хизаныс, насылыс, хивыс кьанун ыхьа.
Ешли инсанар хавна, хизанна, хивна баракат вобна. Манбышди гьалалыйвалике, каамил’ни ихтелетике духйебышди, йишбышди, невабышди ыIмрен накьыш аIслыда. Насылна гьоIрматий дараджа джони, кьаIсинбышди, гьаIракатбышике ва къеджени хайирнани ишбышике аIслыба. Вааджибын ишбы къаджессе гьихъа, гьаммаше Дагъыстанэй цIедда мыIслягьатбы кьаIсди агъсаххъаларшиква гьаъа. Гьел’бедти, цIаIхбышихъадыд маIгьдын аIдатбы водунбы.
КьаIсвалла ешайишин екунбы ыIхыйхана вахт вобна. Эгьлибы ыIмыр къавджейн инсанар вобунбы ва манчини манзилее джурабаджур югун-писин гьааIдисабы эйхьи. Манбы манчин шагьадар воохьи. Ешли инсан каамил’ра эйхьи. Манкъве джегьилерше ыIмрее кIыл’да саIгьвбы къайккыйниме, мисалабы адляъа.
ОIгийл’ гьар хивее гимгабы ыхьа. Гимгайнаб ярашугъ кьаIсинбыний. Сасса вахтал’ хивыс ааидын суалбы гимгее гьаллаъа ыхьа. Хивеехъа арына мигьман цIерра гимгеехъа салам гьевлес кьаIсинбышисхъа хъарайли ыхьа.
Дагъыстанэй эгьли инсанаршина гьоIрмат гьар вахтал’ ахтывале вухьа. Къийнад ман югун аIдат мейид водун. Шинад, цIаIхбышед, ешли инсанаршин джуваб оIгийлид, гьаIшдед ахтыйни дараджайква гьувааджи. Са хаIбна иш гьааъассе гьихъа, цIебба мыIслягьат агъсаххъаларшиква гьааъа. Дават-давлате, суннате, дуIъанани джигее, менни хайир ишбышее кьаIсинбы гьийбни джаргабышее воохьи. КьаIсинкъун джуваб мысаджад къелик’ авхъа гьелен дешдий. Умудааъана, геледжагъылид гьаIмагьад ихьес.
Йишди халкьыхъад сайид югун аIдатний водун. Чуба хизанеенче джуроохьенкъаI, кьаIсин едий дек’ кIынни духайкваний аахванбы. Деккин хавыд манкъусний кьисматехьен. ГьаIшде гыргынанкъаI ман аIдат аху дешодун. Сабара хизанбышее кьаIсинбы текба аахва. Ушахар гьар суралхъа ыIвху авайкIананбы. ГьаIмагьабна вазиятыб Сувал’ни маIгьалыл’ вобна. Садджу инсанарджаб деш, маадын хиваарыд кьаIс хъыхьа. Мани сабабыхъа гора, мааъаб ешемишеебахьен ешли инсанарыб шагьарбышеехъа кочмишоохьи.
Къийнаб йишин кьаIсинбы хиваршин къаравулер вобунбы. Манбыше гьалекийс сувал’на чирахдан гьувааджы вобна. Манбышис ши югун угъурбы арзуламишаъа.Ешли инсанаршина гьалалыйвалла девхьее, ши къыкынбы, гуртынбы вухьес деш.
Фырсантыке истифада гьау, цIаIхбышин агъсаххъал адамер, агъбирчак едар эгьлибышди йигъыква табрикааъа. Манбышис джанана сагъвалла ва хылийна ыIмыр аIрзааъа!
