Къийнийни йигъыл’ джаванаршис, мактабее хъаIдаххъаIни ушахаршис гьар суракке шарааитбы яратмышаъуй районын, республикайн ва гьоIкумматын бордж водун. 

Сабара мани сарданни карбышис манбышике кумаг ыхьейид, сабаранчее заIифийвалла вобна. Масалан, быкырни Рутулни районе сувал’ ва Бабаюртни хиваршее джаванрар идмануква маIшкьулувхьесын спортзал дешин.
Манчихъа гора сабара хивершее джаванарше, джамаIъатын джоджад пылбы саъу маIхудын шарааитбы яратмышаъа.
Октябрьни 4-чил’ Камбулатни хивее джамаIъатни кумагбышиква аляъуйни спортзалын ачылыш ыхьа. Ман спортзал хивни мактабни кIане аляъу водун ва йидж аляъа гибгъылыйн хаIдда сенбы водонбы.
Манчини ачылышее Рутул районни депутатаршди иджласни Садре ЫIмаIхан ГьыIсейнове, Калел’ни хивни администрациейни хаIрынкъве ГьаIджий ГьаIджиеве, мактабни директоре Рамазан Османове, хивни иджласни депутатарше, джаванаршди активын, ва хивни джамаIъатын иштырак гьаъу.
Спортзални ачылышее юшенебахьенбыше йидж аляаъуйнбышис, кумаг гьувойнбышис ташаккурийвалла агъмишавъу ва манбышис джанана сагъвалла Аллагье гьевленава увгьо.
Зас гьман эгьес ыккан. Гьайинчиле сабара сенбына гьихъа хивын джаванар сабы саджигейхъа мыслягьаIтейхъа хъабыйнбы хивее идманыква маIшкьулувхьесын спортзал аляъас ва манчисын пылбы саъас.
Мани каре хаIдын кумаг Камбулатни джамаIъатын, хивни СВО-ни иштракчерше, контрактникарше ва медни спонсорарше гьуво.Ши йишди «Нур» кIазете вахт – вактал’ мани тикинтийни гьаIкIее ойкIан ыхьа ва манчис кумаг гьелева мураджият гьаъа ыхьа. Гойнед йишди кумагыква манчис 50 аазыр манат пылна Высоцкий Павел Андрейни духее кумагыс гьуво. Мана МаскIавни шагьарее ешемишехьена ишкар инсан ворна. Манкъве ЦIаIхни дерайл'ни хиваршис, мааъаб ешемишоохьени инсанаршис хаIдын кумаг гьели.
Спортзалын тентенейкван ачылыш ыхьайле хъийгъа, мааъад ЦIаIхни сичIоккаранбышди лигайн хьебыдъэсди чемпионатын ярышбы илгъечIу. Мани ярышбышее гыргыни мани зонайил’ни хиваршенчен идманчеер вухьайнбы. Ман ярышбы Багьавуддин Джанаеве алгъавгьу. Мана мааъар тренерна ишлемишехьи ва идманчер гьазирааъа вобунбы. Манбышди аIрее къийна республикайн ва Россиейн чемпионар вобонбы.
Ши Камбулатни хивын джамаIъат, мани залеехъа маIшкьбышис гьавайкIанан идманчер цIедни залыква табрикааъа. Джос идмане хаIдын угъурбы арзуламишаъа!