Камбулат Бабаюртни районеена Рутул районна хив вобна. Мани хивее Сувал'ни маIгьалыле кочмишхьайн МуIхахыний КIуссурын джаIмаъат ешемишехьи.

МуIхахбы цаIхбы вобунбы, кIуссурбы – аварбы. ГьаIшде манбы сана-санбышиква са хивын джамаъаIт хьинне ешемишехьи. Мааъаб ешемишоохьени цIаIхбышикIле аварна миз' ваацIа, аварбышикIле цIаIхна миз'. Югни-писди йиъыл' манбыше сана-санкъус мыга гьооли.
Камбулат федерал поштини йаIххъыс делесна цIеббыйна хив вобна. Ши, «Нур» кIазетын журналистар, йишди санаъаIтна иш гьааъа Бабаюртни бинабышилхъа гьабкIынийнкъаI манче гибгъыл. ЦIебба ши мактабеехъа гьавайкIан.
Камбулатни йыIкьнекни мактабее директорна Рамазан маъаIллим ишлемишехьен хаIдда сенбы водунбы. Йишди кIазетни редакциейн мани мактабыква гьаммаше алаакьабы гьуваджи. «Нур» кIазетни хааишиква сабара сенбына гьихъа мани мактабее цIаIхни мизелин дарсбы гьели гидгъыл. Мааъад вахтале- вахталхъа ушахаршини аIрее мизекен, адабиятыкен, маданиятыкен конкурсбы алгъайгьи. Эгьес эйхьи, сабара Сувал'ни дерайл'ни мактабышенчиле, мани сардан Камбулатни мактабее иш къулайква вуккекка вобна.
Мактабни завучни ГьуIсейн маъаIллимни, мактабни филологни Валий маъаIллимни гьаIракатбышиква, гыргын маадын ишбы пIланыква аIлгъаа водунбы.
Сен-сениле хив хъаIбхъоохьи вухьейиб, Камбулатыхъад аIдатый, гьаIшдийн тIабалбы гозетяъан мактаб дешин. Ушахаршис дарсбы йиссейни, даркашни, мыкIани гозершее алгъайгьи. Гьел'бедти, мактабын регьберар чалышмишоохьенбы шарааитбы яратмишаъас, анджах гьоIкуматын кумагдена, мана дагъамийвалла гьаIллааъас вааIхас деш. Камбулатыс тезе аIдатый мактаб аляъас ыккан. Анджах гьалекийс манчеехъа вукIул' абадчена дешда.
КьоIбъэсда дагъамийвалла мактабее гьаIллавъуна . Гьайни сенийке цIаIхни, аварни мизекен тезе китаббы мактаббышеехъа хъадыйнбы.
Къийнийна йишда макьаале Камбулатни мактабни гьайни хъаIдхъийни сенийни гьаIракатбышди ва угъурбышди гьаIкIеена вобна.
ЦIеддыйке эгьес ыккан, мактабна аIсас метлеб ушахаршис ацIаал' ва тербие гьувой вобна. Къамбулатни мактабее югун ацIаал', тербие гьелен маъаIллимар еттыгъба вобунбы. Манчин екунбы шакIле гьар сен къедженбы. Гьайни сен манчин ши гьалеб шадавъу.
2025-2026 хъаIдхъийн сен чIаIрани аттестатыква ва къизлени медалыква 11 сыныфни шыгырте Мамедов НурмагьаIммаде Идрисни духее таамаъы. Манкъве сечмишаыйни гыргыни ЕГЭ-ке73 агъаллан баллбы алетIу. ЧIаIрана аттестат ва нукIранын медал ОIмаров ГьуIсейне СултIанни духее алетIу. Мани сыныфна регьберыр Мазгарова Лейла Зейнална йиш ворна. Лейла маъаIллим мактабна доюквана, гуджнан ацIаал'нана вам маIърафатыкван тербие гьелена хаIдда сенбына ишлемишеехьена маъаIллимыс гьыIсабеехьи. МаIнкъе Дагъыстанын девлет педагожи университет таамаъы. Л.Мазгаровайн сура аварбышин, сурад цIаIхбышин водун.
АIълада мактаб таамауйни джегьилерше - НурмагьаIммадейий ГьуIсейне джон документбы медицинайни университетбышеехъа хъуво. Манбыше джос дохтурын санаъаIт сечмишаъы. Ши манбышис мани вааджибни ишее гьаIракатбы, угъурбы аIрзуламишаъа. Гьийб гивхьуна мураад манбышда быкырывхьена.
Манбышиле гъайре хъаIдхъийн 2025-2026 сен чIаIрани аттестатбышиква хьебни 9 сыныфни шыгыртарше таамаъы.
Мактабни меега ман хаIдын гьаIракат водун. Манчин маъаIллимарше, тербиечерше гьааъана заIгьмат ашкарааъа ва манбышин ацIаал' гьагва.
Камбулатни мактабни маъаIллимаршис ушахаршис джанана сагъвалла, гьаIракатбы ва угъурбы «Нур» кIазетни редакциейн агъмишаъа.