Къийна Россиейни кьувватбыше СВО Украинайн ва манбышин сура аххъыйни авропайни оIлкабышис джон гьунар гьагван. Йишди эскерарше миллетчерше аххъыйн шагьарбыйий хивар йыIкьаIлхъа аляатIанбы. Душманарше джон аквабы тарг гьау, гьеебаханбы.
СВО аIлгьааIни вурушбышее йишди джомард эскераршед джона игитийвалла гьаагва воб. ХааIрна сержант Рамазанов Джангил` ДжуIмайна дих манбышда са ворна.
Дж. Рамазанов 1974-ъэсди Бабаюрт районни Татаюртни хивее едике ыхьа. Манкъуна кок Коршни хивейнчена вобна. Манкъве 1991-ъэсди Калел`ни хивын йыIкьнекин мактаб быкырау. 1994-ъэсди сен эскерийвалейхъа аркIын. 2001-ъэсди сен Дагъыстанын девлет университет таамау.
Манчиле хъийгъыйна Джангил`на иш полициейква багълыба. Мана 1997- 2014 сенбышей Бабаюртни РОВД джурабаджурайни къуллухбышил` чалышмишхьа. Майорни званиейлхъамее гьирхьыл`на. Манчиле хъийгъа пенсиейхъа хъигъечIы.
АIрейнче сабара сенбы адкIынийле хъийгъа, манкъве контракт окIанасди кьарарейхъа хъары. 2014-ъэсди сен Къонши Чечен республикайни Урус-Мартанни шагьарее РФ-ни Росгвардиейка дестебышика цIеддыйн контракт одкIун.
СВО гидгъылни цIеддыйни йигъыле Дж.Рамазанов мааъар ворна. Манкъуни увгьойка, вудж 14-ъэсди элес ворна махъа командировкейхъа гьайкIанна. Къийна мана джуни гьамбазаршиква саджигее Херсонни вилаетил’ вурушмишехьи ворна.
Дж. Рамазанов хаIдданани вурушбыщда иштыракчий ворна. Гьаагуйни игитийвалис Джангил’ ГьоIкуматни наградабышис лайикьра къаджы. Манбы — «За безупречную службу», «Участник боевых действий», «Участник СВО», «За ратную доблесть» водонбы.
Джангил’. Рамазанове заквани горушее къийна СВО джо вуккеккани ишике, джуни командираршикейий гьамбазаршике гаф гьаъанкъаI увгьойн: «Йишда вазият югба вобна. Ши кIылба-кIылба югни умудбышиква гьихъа аIл`гьааIнбы. Ши гьаIракатаъан Россиейни торпахбышиле миллетчер авакIанааъас. ГьаIшде душманаршина вазият гееб дагъамба вобна. Манбышихъад гьийдни сенбышейдын хьинне такьат аху дешод. Шахъаб умуд вобна, сабара гагьыле манбыше аххъыйн торпахбы йыIкьаIлхъа алятIас».
Херсонни вилаетыл` Джангиликва саджигее хаIбба Дагъыстанейчен джаванар вобунбы. Манкъуни увгьойка, манбышди аIрайл`цIаIхни миллетын игитерыб вобунбы. Манбы ГьыIсейнов Элескер, Давудов Нариман, Къараев Шамил’, ГьаIсилов МагьаIммадшефи ва сабара мебынбы.
Джангил` СВО гьаркIынийнкъаI гыргынкъуле хаIбба фыкыр манкъуни дёлесинбыше цIыцIааъа. Манкъухъаб гееб маIрафатыквана хизан вобна. Манкъве джуни ёлдашиква Заремайка саджигее хьебыйре ушах чIакIы хъааъа.
Ши гыргыба мааъаб воохьени Россиейни эскераршис джанана сагъвалла аIрзааъа. Манбы хъобкуни йаIххъыл’ вобунбы. Мани йаIххъылинбы, шакдена,гъамувхьесынбы. Манчихъад медын сура дешин.
ИншаАллагь, ман йигъ дёлес хъыхьа водон. ШакIле ман йигъ къаджесын. Джангилис, манкъуни джуква саджигее воохьени гыргыни гьамбазаршис ши югун дилягбы гьеххъа. Манбы Аллагье гьуваадженбыва эйгьи. Йишин игит эскерар СВО чIаIвхьа, хайбышейхъа савкIалас кьисматхьен.
