АIхреени вахтал’ Россиейни Федерациейл’ халкьыни саламатийваликва алакьанан хил’дже программабы ишилхъа адчы. Манчини аIрее лайикьна джига «Земский дохтур/ фел’шер» федерални программайн авхъу.
2012 сен цIебба оIлкее «Земский дохтур» программа ишекечирмишавъу. Манчике хил’дже цIаIхни миллетни джегьил’ни дохтураршед истифада гьау, хаIдни гьоIкуматни джурбаджурайни регионбышее ишлемишоохьи гибгъыл. Манбышди сабаранбыше Дагъыстанни Рутулни районе дохтурийвалла гьааъас гьавас гьагу. ГьаIшде манбы угъадука ерры джаIмаъатни саламатыйвал’ни бале аахва вобунбы.
2018 сен Россиейл’ «Земский фел’шер» программа ишилхъа абчы. Манчике истифада гьаийнбышда сайир калелий Керимов МаIгьаммад-Салам УIмаргьаIджийна дих ыхьа.
М.-С. Керимов 1993 сен Бабаюртни районни Татаюртни хивее дохтурни хизане едике ыхьа. Вахт хъабыме, МаIгьаммад-Салам джуни тайершиква саджигэй Калел’ни йыIкьнекни мактабейхъа аркIын. Мааъад хъаIдаххъанкъаI джад джегьил’ геледжагъыл’ гьаъасди саIнаъатни гьаIкIее фыкыррашмишхьана. Урусаршихъаб югна мисала вобна. Манбыше эйгьенки: «Эч эчиле аIкьанахъа къоъоохьана деш». МаIгьаммад-Саламна дек’, УIмаргьаIджий Керимна дих, йишди халкьына доюкани дохтураршина са ворна. Манкъве Тезе Быршни амбулаториейс хаIбвалла гьааъан хьебцIалиле агъаллан себы водунбы. УIмаргьаIджий дохтуре джуни баджарыгъыка инсанаршини аIрайл’ хаIбна гьуIрмат къазанмишавъу.
М.-С. Керимовус дохтурни саIнаъатылхъан гьавас хааIрна йичи Севдейд гьуво. МаIнкъе Къызларын медучилище таамау. ГьаIшде Рутулни районни больнице медсестра ишлемишеехьи ворна.
ЙыIкьнекин мактаб быкрау, МаIгьаммад-Салам Астарханни базовый медучилищейхъа иккечIу. Угъадука мааъад хъаIдхъыйнчиле хъийгъа, манкъве диплом алябтIу. Сабара гагьна Волгоградни шагьарни экIданани кумагни (скорая помощь) подстанциебышди санчее ишлемишхьа. Гойне джегьил’ дохтур юрдылхъа саркIыл’. Манкъус Калел’ни ФАП-ыс хаIбвалла гьавъуй теклифау. Хивейхъа хъарыйни сен манкъве хизан къурмишавъу. Джегьил’ дохтуре истагъна быршбышда йиш Аминат Агъаширинна йиш аляртIу.
Ёкьудле сенна М.-С. Керимов аIзизни хивее чалышмишхьа. Манкъве ва джуни ишни гьамбазарше хаIдын гьунар коронавирусна азар еймишивхьайнкъаI гьагу. Дагъамийвал’бышихъа ил’дяакы, манбыше азгъунни чIырваллайке хаIбба инсанар хъувабкавъу.
Россиейл’ гуджнака «Земский фел’шер» программа ишлемишивхьайке МаIгьаммад-Саламыхъа хабар вобний. Хаабынбышиква мыIслягьат гьавъуйнчиле хъийгъа, манкъве джун дакументбыд къахову. ХаIдда гозетяъас гидхьу деш. Сабара гагьыле манкъулхъа Ямало-Ненецкни автономни округни Тарко-Сале шагьарейнче ишилхъа даIватаъан кагъыз хъады. МаIгьар мана хизаныква тезе ишджигэйхъа аттамишхьа. ГьаIшде М.-С. Керимов мааъар экIданани медкумаге фелшерна ишлемишехьи.
Мани ташкилате заIгьмат гьааъани вахтал’ манкъве коллективни гьамбазаршини ва ташкилатни чIакIынбышди арайл’ хаIбна гьуIрмат къазанмишавъу. Ман джуваббы джегьил’ дохтурыс гьувойни премиебыше,таIърыфни кагъызбыше, грамотабыше тасдикьаъа водунбы.
МаIгьаммад-Салам уфтанни хизанна саIгьиб ворна. Манкъве джуна ёлдаш Аминатыка сувахъанбышди къайдал’ кьоIйре гадейий ичий чIакIы хъааъа вобунбы. Аминатейиб джена ыIмыр дохтурни саIнаъатыс къабсыр. МаIнкъе МаIгьачкъалайн базовый медучилище чIаIрани дипломука таамау. ГьаIшде мана Тарко-Сале шагьарни ушахаршини поликлинике медсестра ишлемишеехьи ворна.
Дора дин-иманнани джегъил’ хизаныс джанана сагъвалла, йикIена шадвалла, ишбышее къулай аIрзаъас.
