Гьар сен январни вузани 25-чил` Россиейни телебабыше джон йигъ алгъайгьи. Гыргыни аали мактаббышее манчис къадсырыйн джурабаджурайн шадлыхбы, тадбырбы гьаIзираъа. Манчика саджигее манбыше хъаIдхъыйна кок утIумаъа, геледжагъылисын пIланбы аххъаххъа. Къийнийна йишда мигьман, Саратовни юридический академиейна цIеррыйни курсна телеба калел’бышдаМамедова Мадина Халитна йиш ворна.
— Мадина, шакIле ацIан, гъу гьайни йигъбышее югни кьийматбышиква сессие хъуво, сабара йигъбышис истирагьаIтыс хъары. Хошгелдий гъу.
-Сагъул. ЗакIле ацIан, «Нур» кIазетыхъад редакциейхъа абыйни мигьманаршиквана гаф танышийваликва гивийгъална аIдат водун. Зы едике МагьаIчкъалайни шагьарее йихьа. АIбдулгьаким ЫIсмаиловни доюлин МагьаIчкъалайн 28№ гимназие къизлени медалыква быкырау. ГьокуIматни садибни имтагьаIнбышее хьебни предметыке 252 балл савъу. ХъаIдхъый давамгьаъасдиме санаъаIтбы Саратовни гьокуIматни юридический академиейхъа хъуво. ГьаIшде академиейни цIеддыйни курсна телеба ворна.
— Мактаб таамаъани шигыртаршини гьийд, гьаммаше са суал эхьи, наIхъане санаъаIтбы хъелес. Мани суалыква гъу растына хъарынане?
— Юрист йихьай йизда мураадний. Геледжагъысын санаъаIт зы сечмишау. Мани карее зас шавунджад кумаг лазымхьа деш. Садибын имтагьаIнбы хъувомее, зы хаIдданани джигабышейхъа санаъаIтбы хъуво. ГыргынанкъаI кьабылийхьана. Амма зы геледжагъыл` хъаIдхъый давам гьаъас Саратовна шагьар сечмишавъу. Къийна Саратовын юридический академие Россиейл` гуджнакан аали мактаб водун. Мааъад геед югун ацIаал` гьели. Къийна закIле ман къеджен.
— Къийна хаIббананбыше мактаб быкырауйле хъийгъа, аали мактаббышее хъаIдхъас республикайле къырагъылхъа авайкIан. Хаанче акьаIнада хъаIдхъый дагъамда дешее?
— Йиздимее дагъамда дешод. ЦIеддыйни йигъбышил` сабара дагъамийваллабы ыхьайнбы. Шагьар ваацIа вухьа деш. Къийна вардишийхьана. Академиее хаIбба баджарухукван, кар ацIаан ааIлимар, маъаIллимар ишлемишоохьи вобунбы. Манбыше джохъад водун юриспруденциейн ацIаал` телебабышис хъелес чалышмишоохьи. Манчиле гъайре, шас дарсыбы ыккеккан маъаIллимар югун юристар вобунбы. Манбы югда хъаIдаххъани телебайс гьар вахтал` кумаг гьелес гьаIзирба вобунбы. Мисала вобна: «Дагъамийвалла къидевджей, рагьаIтийваллайна кьадир ваацIавхьес деш.
— Ваквасана мебын Дагъыстанейчен телебабы вобунбыне?
— Академиее Къузайл`ни Кавказни регионбышенче хаIдаххъан хаIбба телебабы вобунбы. Манбышди аIрайл` дагъыстанлыбыб кIыл’ба дешобунбы. Манбышда геллесда алидни курсбышее ворна. ЭкIба-экIба хъызааханбы. Сана-санкъуке хъидгIынбы гьаъанбы. Дагъыстанейнче хъабыйни телебабышис академиейни маъаIллимарше хаIбна гьуIрмат гьааъа. Манбышис академие таамауйле хъийгъа, ишлемишувхьес югни джигабышейхъа теклиф гьаъа.
— Къийна Россиейл юристар гьаIзирааъан джурабаджура аали мактаббы водунбы. Амма хаIббананбыше Саратовни шагьарейдын академие сечмишаъа. АцIахьес ыкканий, няъасне?
— Саратовун юридический академие къийна Россиейл` югунбышди джаргее водун. Гойне хьинне мааъад югун санаъаIткарар гьаIзирааъа. Академия быкырауйнбышис гьар сурал` иш вобна. Манчихъа горад, хаIббананбыше мааъад хъаIдхъас джан айгьи.
-Мадина, къийна вахъаб авхуйн телебабы байрамыква табрикааъас имкан вобна.
— Гыргын телебабы джони байрамука табрикааъанбы. Манбышис рагьаIтын хъаIдхъый, югун билигбы алятIас аIрзаъа.
— Шинад вас хъаIдхъее угъурбы аIрзаъа. Югни кьийматбышиква академие быкырау, йикIес ыкканни ишил` ишлемишийхьена!
