Цlаlхбышди хиваршее хаIбба баджарагъыкван, камалыкван, маъаlллимар ешемишоохьи. Манбышда гьаарна са ахтыни доюс, дараджейс, гьуlрматыс лайикьра ворна. Къийнийна йишда гаф Коршни хивей ешемишехьени агъсаххъал маъаIллимни — Рамазанов Небий Билални духайни гьаIкIеена вухьес.
Н. Рамазанов маъаlллимни саIнаъатылхъа 1975-ъэсди сен хъары ва джегьил’на саIнаъаткар ДжинаIгъни быкырдехьайни йыIкьнекни мактабее ишлемишехьи гиргъыл. Са сенна мааъаб заIгьмат гьавъуйнчиле хъийгъа, Небий маъаIллим эскерийвалейхъа аляртIу. Ватанни гьийдын бордж хъуво, мана ишлемишхьес меер мактабейхъа саркIыл’.
ДжинаIгъни хивни мактабни маъаIллимаршини коллективни увгьойка, Н.Рамазанове мактабыква джуна ыIмыр багъламишавъуна 50 агъаллан сенбы водонбы. Мани манзилее йишди агъсаххъал маIъаллиме хаIбба шыгыртар гьаIзиравъу. Къийнад манкъве мани саIнаъатылхъан хаIдын аIшкь гьагва водун. Чалышмишехьена шыгыртаршис югун ацIаал’ ва тербие гьелес.
Н. Рамазанов 1956 -ъэсди сен Коршни хивее едике ыхьа. Манкъуна дек’, Билал дидей, ЦIаIхыйни дерайл’ гьуIрматыквана адамий ыхьа. Мана гьамыр доюквана тасарруфатчий ыхьа. Мани вахтал’ хиваршее ешемишоохьени инсанаршин дагъамын доланджагъний. Гьар сурал’ мысвалла, мыкIаалла вухьа. Амма дагъамийвал’бышихъа ил’дяакы, Билал дидее джуни ушахаршис декканан гьау деш. Манкъве манбышис югун хъаIдхъый гьувойле хъийгъа, эвле-атта гьавъуйнбы. Ушахаршед деккина заIгьмат къелик’ авхъа хъавъу деш. Манбыше хъаIдхъыйс еттыгъна фыкыр гьуво.
Небий Билални духее мани сенбышике гаф гьааъанкъаI увгьойн: «МаъаIллимийвалла гьавъуй, йизда мураад вухьа. Манчихъа гора, зы йизди ишиле гьаммаше разийра ворна. Шыгыртаршис ацIаал’ гьувой, манбы дурустни йаIххъылхъа абчый йиздимее хаIбна хошбахтийвалла вобна. Мактабее ишлемишехьени сенбышее зы хаlбба шыгыртар гьаlзиравъу. Манбышис одкlуний, хъаlдхъий хаlдхъау. Къийна манбышда гьаарна са ишна саIгьыб ворна. Манбышди ненкъвейджад йизда заlгьмат авакlанавъу деш ва джос цIеддыйн дарс гьувойни маъаIллимна джига гьаммаше ахтыба гьувааджи. Мани карее зы манбышис сагъулва эйгьи».
Н.Рамазанове мактабни къийнийни вазиятни гьаIкIеейид са-кьоIдле кал’ма увгьойн. Манкъуни джуваббышихъа гора, къийнийн мактаб медын водун. Гьихъа шыгыртарше хъаlдхъийлхъа хаlбна фыкырний гьоолена. Манке мактабейхъа хъавайленбыше сана-санкъуни аlрайл’ югда хъаIдхъасдимее баlсбыний гьаъанбы. ГьаIшде баIсбы ыккейсдимее мактабе шыгыртарыб авху деш. АIхырейни сенбышее манбышин сай лап кIыл’ хъыхьа. Гьихъа ДжинаIгъын хивын йыIкьнекин мактаб хаIдынний. Махъа ацIаал’ алятIасдимее КIуссургъанче, Калел’гъанче, МуIхаIхгъанче, Атталгъанче ва Коршейнче хил’дже ушахарний хъавайленбы. Къийна добы агъмишауйни хиваршее нейинки ушахар, инсанарыб авху дешинбы. Манчихъа гора, мактабейхъа хъавайлени шыгыртаршин сай кIыл’ хъыхьа.
Небий маIъаллиме джуни ыIмрен хьоцIал’ сен мактабыс, маъаIллимни саIнаъатыс гьуво. Манкъуни ишис ва заIгьматыс гьокуlматын хаlдданани грамотабышиква, мукафатбышиква лайикьна кьиймат гьуво.
Гьайни дёлесвалей Рамазанов Небий Билални духайн едике ыхьайн 70 сен быкырхьа. ДжинаIгъни хивни йыIкьнекни мактабни коллективын, манкъве дарсыбы гьувойни шыгыртарше агъсаххъал маъаIллим юбилейиква табрикаъа. Манбыше манкъус хылийна ыIмыр ва джанана сагъваллла аIрзааъа!
