Сентябрьни 1-чил Дагъыстанее 28 цIедын хъаIдхийн тикинтибы таIгьвулна хъуво. Манчини аIрее 13 мактаб ва 15 ушахаршин бахче ыхьа.
Мани йигъыл’ МагьачIкъалайни шагьарее кьоIдле хаIдын мактаб ачмишхьа. Манчин са Ипподромни, сайид Семендерни микрорайоне ачмишау.
Ипподромысанейни мактабни ачмишхьее Россиейна Президент Владимир Путинее (видеосвязьни линиейква), ва Дагъыстанни хаIрынкъве Сергей Меликове иштыракау. Мани мактабыс игитийваликва СВО гьалакхьайни Каспийскни флотилиейна майор Алексей Сухановын до гьуво.
Мактаб ачмишаъа Сергей Меликове увгьойн: «Алексей Суханове ва вуджее хаIбвалла гьааъани батальонни джомардийвалин Донецкни вилаете ешемишоохьен инсанар душманыке къативхьанааъас имкан гьуво. Йишди ушахаршикIле кIыл’ни вахтале Ватан къорамишааъани кьаIгьраманаршин добы ацIахьес ыккан».
Гьамани йигъыл’ мактабни магьаIлле Россиейни флотни кьаIгьраманын мемориал плита ачмишау ва цIедни мактабе Алеrсей Сухановни доюл’на десте къурмишавъу.
Алексей Сухановни хьунашее Ирина Cухановае адамийн до гьувойни цIедни мактабни шыгыртаршис наIсигьат джуваббы агъмишау.
«Къийна АцIаал’ни йигъыл’ цIедын мактаб ачмишехьи. Шыгыртаршиниме гьин ачухни рангбышикван хошбахтни ыIмырын тика водун. МаъаIллимаршис, ушахаршини деккяршис ва едяршис сабыр ва угъурбы арзуламишаъа, шыгыртаршис хъаIдхъийна ыIмыр йикIел’ аахвасда вухьенава» — И. Сухановае увгьо.
Мактаб ачмишаъанкъаI Россиейна Президент Владимир Путине мактаббышин ачылыш гьа]анкъаI Ирина Сухановайс миннатдарийвалла агъмишавъу ва ушахаршис тербие гьелени ишил’ угъурбы аIрзау.
ЦIедни мактабни ушахарше Россиейни призидентыс хошгелди гьавъу ва Расул Гьамзатовун Ватанни аллан шечIбы хъаIдхъы.
«Балабы, шос сагъул! Шу энки югна шечIоб сечмишавъу! Энки хъодкуйн ва аIсасын джуваббы Ватанни гьаIкIеедынбы водонбы! Умудааъана, ман джуваббы шу ненкеджад кIелиханаъас деш», — Владимир Путине увгьо.
Мактаббышин сайид Семендерни микрорайоне ачмишхьа. Мани 54№ мактабе 1224 ушахысда джига вухьейиб, амма махъа 1500 ушах саъас эйхьи ворна.
Мактаб ачмишаъас Дагъыстанни Правительствайна садры АIбдулмуслим АIбдулмуслимов ары ва манчина чIаIрана лента къацIабкIын.
Манкъве мактабын маъаIллимар, ушахар, манбышин деккяр ва едяр Дагъыстанни хаIрынкъуни Сергей Меликовни ва джуни сураке табрик гьааъанкъаI увгьойн: «Къийна йишди республикайл’ хаIдданани шагьарбышее ва районбышее цIедын мактаббы ачмишаъа водонбы. Мысаджад манимееган мактаббы ва ушахаршин бахчебы йишди республикайл’ 1-ъэсди сетябрыл’ ачмишауйнбы деш. КьоIни сенийни аIрее Дагъыстанее 56 мактаб ва ушахаршин бахче таIгьвул’на хъуво. Вушин мактаб республикайл’ энки гьихъан водон. Федеральный марказни, ва республикайни суракке гьайни сен мани сардан хаIбба иш къавдже ва къооджи вобна».
Мактабна директор Сапижат Мазаевае заквани гафее увгьойн: «Сентябрьни 1-чил мактабеехъа Семедеренче ва Красноармейскенче 900 ушах хъады, джона 180 садъесди сыныфеехъа хъабы. Къийнийни йигъыл’ мактаб гыргыни караке таIъмираъу водон ва нишинаджаб кеситийвалла дешда».
Зас гьаман эгьес ыккан, Сапижат Мазаева Россиейна КьаIгьраман НурмагьаIммад ГьаIджимагьаIммадовна ед’ ворна.
Семендерее къийнийни йигъыл’ хаIбба цIаIхбы ешемишоохьи вобонбы ва мааъад мактаб ачмишхьай манбышдимейид югда водон. Мани мактабее садджу цIаIхбышди ушахаршисджаб деш джига вухьес, маъаIллимаршисыб вухьесда. Манбы цIедын мактаб ачмишхьайка табрикааъа ва джони ушахаршис угъурбы арзуламишаъа!.
