Исламни диныс ыIбаадат гьаий, манчилхъан инам йикIеенче ыхьай ва динни гьаIкIеедын кIорааленчен ацIаал’ алеетIуй хаIдын сувааб водун. Гьайни гунагьбынани дюнйейл’ ешемишехьенкъаI, гьар инсане гьаммашийни дюнйеехъана джига гьазирааъас вукан.
Гыргыба ши мусурманаршини уммайнбы вобунбы, манчихъа гора диныс ыIбадат гьаъас ыккан. Темизна мусурманий ихьесдиме, хьодле шартI водун бирмишаъу: Шаъадат гьауй. (Аллагьыле гъайре мерна дешда, МаIгьаммад (с.аI.с.) манкъве къаховуна пейгъанбар ворна). Агар гьаман джуваббы йикIеенче, каамил’ни фыкреква увгьее, мана мусурманий ворна. Ыкканни миллетна, ыкканни сифатыквана мана ыхьай, тафавут сыкIылин джад дешин; йигъыс чини вахтал’ хьобле куб гиджараIххий алеетIу гьавъуй; Рамандина ваз авхъуй. Рамандини вуза мусурманаршилхъа бирмишау водун сивар аххъый, гыргыни писди карбишике къирагъылхъа хъувхьай, нягьаIкьни карбышике туба гьавъуй; ФитIра къайищий. Гьар мусурманийн бордж водун сенис джуни девлетике, малаке фитIра хъувой касибаршини, чIырынбышди йаIххъеехъа хъувой; гьаIдж къил’мишавъуй. Агар имкам вобхьее, мусурманийн бордж водун ыIмырее са элеесхьейир ГьаIджилхъа гьаркIыний. Маккеени ва Мадинеени зияратбышис ыIбаадат гьауй, горханабышилхъа гьаркIыний, чIакIни манзикбышее джамаъаIт кубар гьауй, бирмишауйн аIгьдбы быкырауй.
Исламнын дин дюнйейлхъа энки аIхрее адыйн дин водун. Ман еймишаъасдимее Аллагье дюнйейлхъа аIхреена МаIгьаммад пейгъанбар (с.аI.с.) къахову. Манкъулхъа джилда — джилдана Кьуръан къахову. МаIгьаммад пейгъанбаре (с.аI.с.) манчина маIъна (мусурманийн кьаанун) джуни уммайлхъа ашкарау. Сен-сениле манкъуни йаIххъыл’ аIлгьааIни инсанаршин сай хаIдхъехьи водун. МаIгьаммад пейгъанбыр (с.аI.с.) дюнйейс гьувойн нур водун, миллетин маIргьамат водун. Манкъвее джуни миллетиле оодын улух, раIгьам камааъа деш. Шинар йикIее мана гьуваджес ыккан.
МаIгьаммад пейгъанбар (с.аI.с.) хиджрайква Рабиул’ Аввал’ни вуза дюнйейлхъа ары. Эле гьаIшде гьамана ваз вобна эвчIу. Мани вуза мусурманарше МаIгьаммад пейгъанбарыс (с.аI.с.) къассырыйн маджлисбы алгъайгьи. Агар григорянни календарыква тутушмишавъэ, мана 10 йигъна гьар сен ихъа хъавайли. Гьайни сен Рабиул’ Аввал’на ваз августни вузани 24-чил гибгъыл ва сентябрьни 22-чилхъа меега цIыцIавхьес. Мани вуза мусурман оIлкабышил’ йишда пейгъанбар МаIгьаммад (с.аIл.с.) исламни диныква багълыданан маджлисбы илгъечIи, манкъуни гьаIкIеедын бейтбы, ваъаIзбы хъаIдаххъа.
Гьайни, пейгъанбар МаIгьаммад (с.аIл.с.) едике ыхьайни Рабиул’ Аввал’ни вуза, мавлидбы, ин ша Аллагь, Сувал’ни магьаIлыл’ни , Бабаюртни, Къызларни районеени цIаIхбышди хиваршее, Аллагьни кумагыква, алгъагьас кьисматаъанбы! Гыргынкъуни йикIбышис сабырбы гьеленбы. Иман, исламни динылхъан инам гьалед йишди йикIбышее утIумхьен. Амин!
