Сентябрьни 2-чил, АцIаал’ни йигъыл’ , шыгыртаршиниме чин аккабы шарааитбышиквани, къийнийни тIалаббышис уйгъунни тезе 20 мактабын аккабы аахъы. Мани мактаббышейхъа йигIни аазырыле гьеххан ушахар хъабы. Манчиле гъайре са тезе ушахни бахчейн ачылыш ыхьа. АIхреени вахтал’ манмееган цIедын мактаббы Дагъыстанэй ачмишаийнбы дешдий.
Мани шадни маджлисбышее Дагъыстанни ГьоIкуматни Садреэ АIбдулмуслим АIбдулмуслимове, республикайни вице-премьерарше, муниципалитетни чIакIынбыше, министерствабышдийий ведомствабышди вукIлелинбыше, Халкьни Маджлисни депутатарше иштыракау.
Дагъыстанни ГьоIкуматни С адреэ АIбдулмуслим АIбдулмуслимове Каспийскни шагьаре Россиейни КьаIгьраманни М. МаIгьаммаджановни доюлин 16 № гимназие-мактаб ачмишау. Гойне манкъве ачухни эфире республике тезеда ачмишехьени мактаббышди марафоныс старт гьуво. Манчее тезеда мактаббы ачмишехьени муниципалитетбыше иштыракау. Регионни министраршини кабинетни башчийе Дагъыстанни хаIрынкъуни доюле мураджият гьау.
Джуни чыхыше премьер-министре аIхреени вахтал’ республикайни хъаIдхъыйни сферени бадалыйвал’бышди гьаIкIее гаф вукку. МаIгьад, 370 агъаллани мактаббышее капремонтбы гьау, манчеехъа тезе дезгагьбы ва мебель хъады. Къийнийни йигъыл’ бербадни вазиятылин мактаббы кIыл’хъыхьа. ГьаIшде 7% ммактаббышин аху.
Хъийгъа ВКС-ни режимыка марафонни иштыракчерше, хусусан вице-премьерарше, шагьарбышдийий районбышди чIакIынбыше, депутатарше ва менни къуллухчерше джигабышейнче объекбышди гьазирийвал’ни аллан маIълумат гьуво.
ДР-ни ГьоIкуматни Садрыйни маIъвыне Ризван ГъазимаIгьаммадове тентенейквани линейке Казбековни районе Гертмайни хивын йыIкьнекин мактаб ачмишау. Тезе мактабни партабышилхъа 200 агъаллан шыгыртар гювъарас. ХъаIдхъыйни ташкилатыс доюкани къуллухчийн, аIзизни районни хъаIдхъыйни сферайниме чалышмишхьайни МуIгьуддин АIбдулмуслимовун до гьуво.
Дагъыстанни вице-премьере Нариман АIбдулмутIалибове тентенейква Сулейман-СтIални районе 150 шыгыртаршис джиганан мактаб ачмишау. Герейхановни доюлин 2 № кьоIни мертабанани бинайке ибаратда. Мааъад 13 сыныфбышин утагъбы, актовый утагъ, спортука машкьулоохьен утагъ, кар ойхьанан утагъ ва медынбы еррашмишхьа. ГьаIшде манчее 135 ушахын хъаIдхъас.
Вице-премьер Муслим Телякавове Хасавюртни районни Солнечное хивеени 804 шыгырт джиганани мактабыс старт гьуво. Районни хаIрынкъука, мактабни директорука ва шыгыртаршиква саджигэ манкъве чIаIрана лента къацIабкIын. Ёкьудле мертабабынан мактаб хьони блокыке ибаратда. Мааъад 39 сыныфбышин утагъбы еррашмишхьа. Манчиле гъайре гьиняаъад инвалидаршиниме лифтбыд водунбы.
Республикайни Правительствайни садрыйни башчийни маIъвыне Рамазан ДжаIфарове шадни шарааитыл’ МаIгьаррамкентни районни Самурни хивеедын мактаб ачмишау. Мактаб хьебни мертабайкева ёкьни блокыке ибаратда. Манчеехъа кар ойхьанан утагъ, актовый утагъ, спортука машкьулоохьен утагъ гехьа водунбы.Мактаб ачмишаъанкъаI вице-премьер Рамазан ДжаIфаровыле гъайре Россиейна КьаIгьраман Муслим Муслимовейд иштыракау.
Хъийгъа эстафета вице-премьер АIбдураIгьман Магьмудове кьабылявъу. Манкъве Кизилюртни шагьаре Расул Гьамзатовни доюл’ги 7 № мактабыс старт гьуво. Мааъад 250 ушахе хъаIдхъас. Тентенейквани линейке иштыракаъаIнкъаI къуллухче увгьойнки, тезе мактабни корпусын ачмишхьай гьам районниме, гьамыд республикайниме вааджибна гьаадиса вобна. Гыргыни гьаIшдийни тIалаббышис уйгъунни мактабе 10 сыныфын утагъбы ва медын утагъбы еррашмишехьи.
ДР-ни ХаIрынкъуни ва Правительствайни Администрациейни Регьбере МаIгьач УIмарове, республикайни парламентни вице-спикере СайгьидаIгьмад АIгьмадове, МаIгьачкъала шагьарни башчийе Юсуп Умавове ва Россиейни КьаIгьрамане Темирлан АбутIалимове Дагъыстанни пайтахте 27 № мактабын тезе блок ачмишау. Тезе блокын хьебни смена проблема гьаллааъас.
Хьебыдле мактабый са ушахаршин бахче МаIгьачкъалэй ачмишхьа. Манчиле гъайре тезе мактаббы Кизилюртни, Табасаранни, ЦIумадайни, Дохъузпарайни, Курахни, Казбековни, Ногъайни, Силейман-СтIални, Хасавюртни, Къарабудахкентни, МаIгьаррамкентни, Левашийни районбышее ачмишхьа. Гойне хьинне ушахар тезе мактаббышика Каспийскни ва Кизилюртни шагьарбышее шадавъу.
Социал объектбы «Образование» , «Демография» ва Респуликайни инвестиционни программабышди кумагыка аляу.
Тезе хъаIдхъыйни сен республике партабышилхъа 486 аазырыле гьеххан ушахар гювъур. Манбышике 50 аазырыле гьехханбы цIеббыйни сыныфейхъа хъабыйн шыгыртар вобунбы. «НУР» кIазетни редакциейн маъаIллимар , шыгыртар, телябабы хъаIдхъыйни цIедни сениква табрикааъа ва джони дагъамни заIгьмате угъурбы аIрзуламишаъа.
