2024-25 хъаIдхъийн сен таарыхеехъа аIлгьаа водун. Са-кьоIни вузале ОГЭ-бы , ЕГЭ-бы хъувойле хъийгъа, санихьийн дерд’бы дешин мактабын ушахар хаIбни, хыллийни джурабаджур «доламабынани», « алхъааIни-гяаIни» ыIмреехъа иккебчIес. Агар хъодкуда увгьее, зы манбышда пахылыйвалла цIыцIааъа деш, няъас увгьее манбышин геледжагъ наIгьадын ыхьай къеджи дешод. Тезе хъаIдхъийни къурлышин мункум вобна джегьил’на ыIмыр «гьавакьарааъас», нейиб шадааъас. ОIгийл’ мактабын гьаIкIени ацIааликван, тербиейкван, ыIмрес гьазиравъуйн ушахарний къоокка. Манбышди гьаарункъухъаб мураад вухьа. ГьаIшде санихьийни ушахни оIгее «мычIахын чIалаг» водун. Манчихъа ил’дяакы, шахъад умыд вобна гьар гьайни сен мактаб таамауйни ушахее джусда хъобкуна ыIмыреехъана йаIхъ тIабалааъасда. Гьар инсан джуни ыIмрена устад вудж ворна.
Майни кьоIдъэсди сурал’ Россиейни гыргыни йыIкьнекни мактаббышей алидни сыныфбишин ушахар къоокан маджлисбы илгъечIи. ОIгийл’ манбы садибда 25 майейни илгъечIенбы. ХъаIдхъийни таркибеехъа ОГЭ-бы, ЕГЭ-бы аккяыйле хъийгъа, мактаббышее аIхреени зенгыс къадсырыйн маджлисбы джурайни йигъбышил’ алгъайгьи. Мани йигъыс къадсырыйн шадлыгъбы, мактаббышее гейдни ярашугъыква алгъайгьи. Садибда цIаIхбышди ушахарше Рутул районни ва Бабаюртни районбышеени мактаббышее хъаIдаххъа водун.
Йишди, цIаIхбышди, мактаббышеед ман йигъынджагъбы гьаIракатука илгъечIу. Къийнийна гаф Бабаюртни районеени мактаббышее нягьаIдый аIхреедын зенг илгъечIы вухьес. Манчини гьаIкIеедын маIълумат шас Калел’ни йыIкьнекни мактабни завуче ТIагьир маъаIллиме ва Теземуслагъни йыIкьнекни мактабни директоре Ширинбег маъаIллиме гьувы.
Калелин йыIкьнекин мактабыд, Теземуслагъын йыIкьнекин мактаб, Камбулатын йыIкьнекин макаб (Камбулатни йыIкьнекни мактабее аварбышдийий цIаIхбышди ушахарше хъаIдаххъа – Кь.О.) Бабаюртни районеени югни сыранеехъа эчIуйн мактаббы водунбы. Ман йишин мактаббы Къизилюртни хъаIдхъийни ТУ гядакIва. Гьар сен мактабын хаIбба билигнан, кар ацIан ушахар къоокка. Мани мактабее тербие, ацIаал’алеетIуйни джегьилерше Россияйн джурабаджур чIакIын университетбы , институтбы, академиябы таамау.
Сенис мани мактаббышди ушахарше Дагъыстане, Россиейл’ едини мизеке илгъечIени конкурсбышее, олимпиадабышее ва форумбышее иштыракбы гьаъа ва ахтыйн джигабы аххъаххъа. Манбышис 1-3 джигабы аххъыйн дипломбы ва медалбы гьели. Гьел’ бедти, цIедда, ман маъаIллимни хъобкуба вуккуйни ишин натийджабы водунбы, кьоIдъэсыд мактабни директорын ва завучин гьаIракатбы водунбы. Мани мактаббышее гыргын шарааитбы едини мизелин дарсбы ыккейсын яратмишаъы водунбы.
Калел’ни мактабе гьайни хъаIдхъийни сенийн аIхрееедын зенг майни 24-чил’ ыIхы. Мактабни директорни Фергьад АIлиевни амурыква ОГЭ-бы, ЕГЭ-бы хъелес гьайин 9 ва 11 сыныфбышин шыгыртар къавуккы :

9 сыныф. 1. АIлиева Б., 2. АIлиев З., 3. ГьаIсилова С., 4. Къаратова Н., 5. Къараев И., 6. Мусаева М., 7. Мусаев Н., 8. Рамазанов С.., 9. Улаханова Д., 10. Улуханов А.
11 сыныф. 1. АIлиев И., 2. АIлиев М. 3. Джанаев М., 4.Карибов Р., 5. Магьмудов З.
ИнтагьаIмбышеехъа къавуккуйни шыгыртаршин сиягьий хъаIдхъийле хъийгъа, аIхреени зенгыс къабсырна маджлис гибгъыл. Мана мактабни магьаIлле илгъевчIу. Тамашейс хивын джамаъаIт, мактабын ишчер ва шениса сыныфбышин ушахар сабы. Махъа сабыйнбышди гьийд къооккан ушахар табрикааъан ва джос угъурбы аIрзуламишаъан чыхышбы хивни гьуIрматыквани адамерше, едарше, деккярше, едярше, джос дарсбы гьувойни маъаIллимарше гьаъы.
Маджлисна шарафуквана мигьман 40-50 сенна мактабее маъIллимна ишлемишхьана филолог Джамал маъаIллим ыхьа. Манкъве чыхыш гьаъанкъаI увгьойн :«Азизын мактаб таамаъан шгыртар! Къийна вушди ыIмырее геед шадын ва хошун йигъ водун. ШокIле ацIан, йишди мактабейнче гьар сен хаIбба югун билигнан шыгыртар хъигъеебачIи. Шунаб гьаIшде манбышди джаргее вобонбы. Къийна ши гьаIзиравъуйн шыгыртар Дагъыстанее, Россиейни медни вилаетбышил’ ишлемишоохьи вобунбы. Манбышди аIрайл’ къуллухбышил’ ишлемишоохьенбыб кIылба дешешобынбы. Зы умуд гьааъана, шунаб манбышик акаранбы вухьес. Шос югна йаIхъ! ЕГЭ-бы югни кьийматбишис хъуво, фыкрее аххъыйни аали мактаббышейхъа иккебчIес кьисмат гьааъанбы..»
Манчиле хъийгъа дагъайдни сыныфбышди шыгыртарше мактабыква саламаттамишоохьенбышис батIрайн шечIбы хъаIдхъы, тIетIбышин тIуччер гьуво. Манбышед хурни ушахаршис гыранын пайбы гьуво. АIхреени зенгыс къабсырна маджлис маIъракайкайий едигарыс цIыIауйни шикыл’бышиква таамувхьа.
Гьамани джад йигъыл’ аIхреени зенгыс къабсырна маджлис Теземуслагъни йыIкьнекни мактабе илгъевчIу. Манчини гьаIкIеена хабар шас ва шикыл’бы завуче Давуд Кьасумове оIтираы. Гьаммаше хьинне, маджлис мактабни майдама илгъевчIу. Мана мактабни завуче Давуд маъаIллиме вуккы. Гьайни сен аIхреедын зенг садджу 9 сыныфни ушахаршис ыIхы. 2024-25 хъаIдхъийни сенее Теземуслагъни мактабыхъад 11 сыныф ыхьа деш. Джуни 9 сыныфын ушахар табрикааъани чыхышее Давуд маъаIллиме увгьойн : «АIхреедын зенг садджу гьар сен Россиейл алгъайгьен байрамджад деш водун. Мани йигъыл’ 9 сыныфын ушахар каамилёхьи. Манбы хурни ушахийваленче чIакIни шыгыртаршини джаргеехъа илгъеебачIи. Манбышин фыкырбы бадалехьи. Дюнйейни геледжагъылхъа медни улеббышиква иляака гивийгъал. Ши – маъаIллимарше, едярше деккярше манбышис хылявхъас вуккан, югун умудбы гьелес ыккан. …».
Манчиле хъийгъа, ОГЭ-бы хъелес къавуккуйи 9 сыныфни ушахаршин сиягьийи директорни Ширинбег маIъаллимни амурыква тасдикьауйн хъаIдхъы :
9 сыныф. 1. Баширова С., 2. ГьаIджумурадов Д., 3. Магьмудова М., 4. МагьаIммадов М., 5. Кьасумов М. 6. ЫIсмаилова Н., 7. Субботина С.
Гойне маджлис вуккекканкъве джуваб мактабни директорыс Ширинбег Наврузовыс гьувы. Ширинбег маъаIлиме 9 сыныфын ушахар, мактабын маъаIллимар, ушахаршин деккяр, едяр байрамыква табрикавъу. Ушахаршис интаIгьамбыше угъурбы аIрзуламишаъы. Маджлисее къооккан ушахар табрикааъан, насигьаIт гьелен чыхышбы сыныфни регьбере Б. Я. Наврузовае , медни мактабни маъаIллимарше, маджлисеехъа абыйни мигьманарше, къоокканбышди деккяршейий едярше гьау.
Маджлисни аIхрее 9 сыныфни ушахарше джос дарсбы гьувойни маъаIллимаршикIле, тербие, къык гьувойни деккяршикIле , едяршикIле сагъул-варул увгьо ва манбышис тIетIбышин тIуччера гьувы. Маджлис маIънийбышиква ва мыкIаршиква таамувхьа!
«НУР» кIазетни редакциейн гыргыни цIаIхбышди мактаббы таамаъани 11 сыныфни джегьилершис ва 9 сыныф таамаъани шыгыртаршис угъурбы аIрзуламишаъа. ЙикIеедын мурадбы вушин быкырхьенбы!