Кьуръанее одкIун водун, ненкъвейий гьайни дюнйейл’ Аллагьни дойиле шитIершин акваамена манзик алявъэ, Аллагье манкъус гьаIкIени дюнйейл’ хансарайбы аляъас. Мани джуваббышихъаб кIорана маIънаа вобна : Аллагьни йаIххъеехъа гьааъани сувабыквани ишихъаб хаIбна гудж вобна. АIхратыл’ ши манчике хайир алеетIас.
Советна девыр хъавалессе гьихъа, йишин миллет динни сардан маIгькамын ыхьа. Хъийгъа Советни девырее манчис оIги гьели ыхьа деш, манчихъа ил’дяакы, йикIее диннани, Аллагьни караматбышилхъа инамнани инсанарше кубарыд гьаъыйнбы, сиварыд аххъыйнбы.
АIлгьамдуллягь, гьаIшде инсанаршихъад югун ишбы гьаъасын имканбы водунбы. Валхъа бирмишавъуна хьобле фарз цIебба быкыраааъас вуккан. Манчина цIеббыйна эн ваджибна фарз, куб вобна. Кубына гуджиб, суваабыд манке маIгькамда эхьи, агар гъу мана джамаъаIтыква саджигее манзикее гьавъэ. Эгьес эйхьи къийна хаIдданани цIаIхбышди хиваршее манзикбы водунбы. Сабара хиваршеедын йиссейн манзикбы тезелемишаъы, сабаранчее цIедын манзикбы аляъы ва гьаIшдед аляъа водунбы. Ненкъвейий махъа пыл къайиккы, Аллагье манкъуни кисайс барака гьевлесда. Садджу гьайни сен хьебни цIаIхбышди хиваршее: Миххьейе, ХыIягъа, Хьойикке манзикбы тезелемишаъы. Советни деврее манбы искIалатбышилхъа ва медни ташкилатбышди идарабышилхъа сакIалаъы ыхьа. Шукур Аллагьылхъа манбы, мед хиваршини игит’ духйебышди кумагбышиква, манзикбышилхъа сакIалаъа водунбы.
Сайиб мани сардан шадна хабар Бабаюртни районенче хъабы. Манчини гьаIкIеена хабар шас Мавлиддин ГьаIсилове гьувы.
ШакIле ацIан, Бабаюртни районе Рутул районын бинабы водунбы. ГьаIшде манбы хиваршилхъа садкIыл. Гьалекийс манчихъад хиваршин статус дешин, анджах мани бинабышил’ медпунктбы, маданиятын марказбы, мактаббы, манзикбы ва медын ташкилатбы водунбы. Манчина иш, манзикбышиле гъайре, гьаIракатеехъа абчесдимее кумаг гьоIкуматын гьели. Анджах манзик Аллагьын хав водун. Манчихъа гора, Аллагьын хав аляуй гыргынкъун бордж водун. Калел’ни бинайл’ ишлемишоохьена кьоIбле манзик вобна. Са хаIбна манзик вобна, сайиб магьаIлна вобна. МанчикIле авубни магьаIлна манзик эйгьи. Къийнийна йишда гаф мани манзикни гьаIкIеена вобна. Хивын агьалий хаIдхъехьи летти, кубар гьаъанбы, сивар аххъаххъанбы хаIбхъебаххьи вобунбы. Манчихъа гора манзикыб хаIбхъааъас вуккан. Хивни джамаъаIтын мислягьаIт къавджена дагъайбни убайна манзик хъааъас. Манбыше гьаарункъве джуни кьул’пеенче гехьан пыл манзик тезелемишааъас саъы. Къийна манзик тезелемишааъа вобна. Манзикын адын ишбы гьаъа водунбы: къаъадкIуйн сувагъбы тезелемишаъа, маадын токIани ишхена шунур тезелемишааъа, кьуIмана джил’ гьааъа вобна, гиджаIрахийбы аляатIан джигабы аляъа, манзикна маIгьалла абрелхъа хъаляаъа вобна. Ман ишбы Аллагьни йаIххъехъа устадарше: Давудов МагьаIммадсаламе, Мусаев ШейхаIлийе, Джанаев Фейзуллагье, Джанаев Сейфуддине, Ибиев ГьуIсейне, Джумаев Нураддине гьаъа водунбы. Манбышис фегьляалла гьааъас йигъыс хивын джегьилера абайли. Устадаршини увгьойква , Рамандини ХаIдни йигъылхъассе манзик хъавъу таамувхьесда. Ин ша Аллагь, ХаIдын йигъын кубар мааъад гьаъас гыргынкъус кьисматхьенбы. «Нур» кIазетни редакциейн манзик хъааъа ишлемишоохьени инсанаршикIле къел’-хылес кьудрат гьелен ва вушин заIгьматбы Аллагье суваабыс окIананбыва эйгьи.
