Къийнийни йигъыл’ «Нур» кIазет йишди миллетни мизени, аъдабиятни, таарыхни, маданиятни, аIдатбышди гьаIкIее ойкIанан гьунарыкани ташкилатбышин са водун. Манчиле савагьийда редакциейни кумагбышиква джурбаджур маданиятын, идманын ва диныс аидын ишбы алгъайгьи. Мани ишбышее хаIдын гьаIракат «Нур» кIазетни Редакциейни советын гьели. Мааъаб миллетын гьуIрматнан инсанар вобонбы. Манбы ва мебын йишди миллетын уIзвубы вахт-вахтал’ редакциейн мигьманар воохьи.
Гьайни йигъбышее йишди редакциейн мигьманар Набережные Челны шагьаре ешемишехьена «Цахур-строй» донани компаниейна хааIрна, дзюдойна машкьчий, миллетна активист ФаIргьад АIлиев, ЦIаIхни хивни администрациейна хааIрна Вагиф АIлиев ва ЦIаIхни магьаIлыл’ни Республикайни ветеранаршди ташкилатна уIзву НезирмагьаIммад АIгьмадов вухьа.
Редакциейхъа сабына макьсад аIкьанани шагьареенче арына миллетна активист ФаIргьад АIлиев редакциейн къооджени ишыква танышаъуй ва манкъве Азербайджан ва Дагъыстане ешемишоохьени цIаIхбышди хиваршеехъа гьаркIын ва джаа ыхьайни горушбышди гьаIкIее гаф гьавъуй вухьа.
ФаIргьад АIлиеве сабара сенбы водонбы соцсетьбышее йишди миллетыс къадсырыйн группабы ачмишаъу ва мааъад цIаIхбышди мизени, адабиятни, маданиятни, хиваршее ешемишоохьени инсанаршди гьаIкIее ойкIан ва махъа гьаркIын горушбы алгъайгье.
Гьайни сен январьни ва февральни вузаршее мана Азербайджан ешемишоохьени цIаIхбышди хиваршее хил’дже горушбы алгъавгьу. Гойне мана хъары Дагъыстанни сувал’ни магьаIлыл’ ыхьа ва маани хиваршее инсанаршиква горушмишхьа. Эгьес эйхьи, редакциее манкъве миллетни инсанаршиква ыхьайни горушбышин екун ыIхы.
«Йизда макьсад кьоIни джигейхъа джурахьайни йишди миллетна миз, маданият ва аIдатбы гьуваджий, гойнед соцсетьбышее манчини гьаIкIее йишди джаванаршис мани карбышди гьаIкIее маIълумат гьувой ва танышавъуй вобна. Зы мани ишыква машкьул эйхьен йицIыдле сеныле хаIбба вахтобна. Мана зы къооджена иш йизди харджийква гьааъа вобна»,- манкъве увгьо.
Гойне зы редакторхьинне арыйни мигьманыс редакциейн къооджени ишыке гаф гьавъу ва манчика танышаъу, манкъукIле увгьойн: «Къийна ед’на миз гьувааджес хаIббанана иш йишди кIазетин къооджи вобна. Няъас увгьее кIазет къайиккыйле савагьийда, ши ед’ни мизелин китаббыд гьаIзираъа водонбы, теле- радиоверлишбы гьаIзираъанбы, ушахаршда журнал къоокка вобна, манчиле савагьийда шахъад кIазетин сайт, соцсетьбышее сагьифабы водонбы ва мааъад йишди мизел’ маIълуматбы гьели.
Манчике джуни соцсетьбышеени группабышее истифада гьаъу, джаванар танышааъас вухьесынбыва увгьо».
Сайид са кар ФаIргьад чоджийкIле зы увгьо, мани вуджее ыккейкани группабышее лазымдешин хабарбы, миллетбышди, динни арейна къалмагъал вухьес вуккан деш. Сабара вахтал’ мани группабышее джаванаршин аIрабы аликкы ыхьа ва санасанкъуква къалмагъалбы эйхьи ыхьа. МахуIбынбы авакIаанаъас вукканва зы увгьо. Махъа Азербайджан ва Дагъыстанее воохьени цIаIхбышин югун хабарбы, къеджен ишбы ва инсанаршди гьаIкIее окIанас ыкканва хагьишау. Мани ишее джус угъурбы зы арзуламишаъу.
Манчиле гъайре абыйни мигьманаршиква гьайни сен ши Редакциейни советыква саджигее къаджесди ишбышди ( профессор Гь. Ибрагьимовын 100 сен, ЦIаIхни мадрасайн 950 сен, «Нур» кIазетин 30 сен, ветеранаршис къадсырыйн майни вуза футболын турнир) гьаIкIеена гаф вукку.
Ши гьаммаше йишди редакциеехъа абыйни мигьманаршиле шадба ва манбы къаршиламишааъас гьаIзирба вобонбы. Мед эйгьен, шахъад гьайни дюнйейл’ миллетни къайгъве аахван, йишди ешайишни ва дагъамийвал’бышди гьаIкIее маIълумат гьихьараъан ташкилатбы хаIдда дешодунбы. Мани сардан манбы гьувааджес ва манчина дараджа ахты хъааъас чалышмишебхьес вуккан!
