Хьебыдъэсын сен водун Россиейн Украине душманаршиква мубариза вуккейкан ва маа ыккейкани спецоперациее йишди эскерарше къаIгьраманийвалла гьаагва вобна.

Эгьес эйхьи, манбышди джаргее 500 гьеххаба йишди гыргыни хиваршенче иштыракаъан игитер вобонбы. Манбы садджу мобилизованныйбы, джони хагьишиква абкIынийнбы джаб деш, военный училище тамаъау эскерийвалла гьааъанбы, контракт одкIун абкIынийнбыб хаIбба вобонбы. Манбышда сайир миххьегIалий, хааIрна лейтенант АIлиев Аким Межмединна дих ворна.
Аким АIлиев, эгьес эйхьи, СВО гидгъылыйле хъийгъа маа душманыква къаIгьраманхьинне вурушмишехьи ворна.
Манкъве Дальневосточный военный округе къуллухааъа вобна ва артиллерияйни батареяйни взводна командир ворна. Къийнийни йигъыл’ манкъун ман военный санаъаIт спецоперация ыккейкани джиге лазым ыхьа ва мааъад Акимее джулхъа гехьан военный тапшырыгъ игитеехьинне, къаIгьраманхьинне гьаллаъа водон. Манчихъа гора манкъус джуни командираршини сураке орденбы, медалбы ва медын мукафатбы гьуво водонбы.
Масалан, оIтмишхьайни сен июнни 17-че Россиейна Президент Владимир Путинни кьараруква манкъус «Жуковын» медал гьуво, гьайни сен медни указыква манкъус «За Отвагу» медал гьуво. Ши мана мани медалбышиква табрикаъана ва гьалед хаIдын медалбы ва орденбы алятIас къисматаъанбыва эйгьи.
Къийнийний йигъыл’ МиххьегIни хивеенче СВО-е садджу Аким АIлиев джар деш, вурушмишебахьи мебынбыб вобонбы. Манбышин хаIббананбы МагьаIчкьаленче, Къызларгъанче ва Россиейни медни шагьарбышенче махъа абкIын.
Гьелбетте, даIвъий иткидена воохьена деш. МиххьегIни хивенчена СВО-ни иштракчершина кьоIйре ватан къорамишааъа гьабтIуйнбы. Манбы Сафаров Артур Гъарыбна дих ва Шихамиров ГьаIджий АIбдуллайна дих вухьа. Манбы къаIгьраманархьинне вурушмишебхьа ва шагьид вухьа. Манбышда игитийвалла, кьаIгьраманийвалла мысаджаб шас кIеливханас деш ва ши манбышиле гуянмишоохьенбы.
Ши ГьаIджийс ва джуни эскер достаршис джанана сагъвалла ва хылийна ыIмыр аIрзуламишааъа, гойнед манбы гъамебхьа джони хизанбышехъа сабкIылий Аллагьыке гозетяаъа водон.