Йишди республике фаляакат вухьайн са уIл’джум оIтмишхьессе, меб кьоIбъэсда мисийбат абы. Мартни вузани аIхрее гуджнакван гёгъуйбы ыхьа. Манке сабара республикайн шагьарбы, хивар хьинени шагьрабыше аххъы. Дамабышин, дерабышин, этякбышиле хъооIни гомабышин хьянбы чIакIы хъыхьа, манбы чини археенче эндерхьайнбы инсанар ешемишоохьени хайбышеехъа, малкъара ухьийхьанни торпахбышилхъа. Мани шагьарбышее, хиваршее ешемишоохьени агъсаххъаларшини увгьойква, джокIле цIебба маIгьабна хьинеква багълыбанана фаляакат къооджи.
ОIийлид республике манчилед гуджнакван гёгъуйбы эхьи ыхьа ва йизбы гёгъа ыхьа, анджах манчин маIгьад хаIдын зиян гьелен дешдийки. Хьян эммишхьа чини археенче, канализациебышди дурбабышеенче деръягьылхъа айкIананний. Къийна няъасый мани фаляакатыс ши гьазирба девхьа, инсанаршихъад хаIдда фыкырбы водунбы. Сабаранбыше эйгьен, дамабы, дерабы айкIанни архбышин ши оIгибы багъламишаъы. Манчини оIгее хайбы, магазинбы ва медын тасарруфатын бинаабы аляъы. МаIгьад аIлгьаани хьинени архан оIгибы богъмишаъы. Хьянбы свёдк1ур, гойнед манбы шагьарбышилхъа, хиваршилхъа хъаккядкIын. Манчин цIеббыйн тахсиркарар маIгьадни джигабышее хайбы аляъас иджаазабы гьувойн къуллухчера, аляъанкъаI оIги даянмиш гьидяъуйн гьуIкумын ишчер, хъийгъаб мааъад хайбы аляыйн инсанар вобунбы. Джибеехъан магарыш гьидхьырмее, гыргынкъвее «улеббы садчийнбы». Къийнаб ши манчина «бар» алябатIа вобна. Мед мык кIивI1ни джигеенче хъодху. Фагъыр- фугъыр инсанар хав-уджагъ дена авху.
Мысаджаб табиятни кьанунбышиква эксина аIлгьаас вуккан деш.
КьоIдъэсыд, ши мани « сихбы» донани чIырвалике хъидвабкыйнбы. Хьянбы аIлгьаасын архбы, кIаналбы, хъодкуйн канализациебы гьаъасдимее, йаIхъбы, йыIгъаар гьаъасдимее федерал хазнеенче гьар сен фланкьадаран пылбы къекка. Манбы дыIгъеехъан хьян хьинне айк1ан. ХъоIхъан…
Хьебыдъэсыд, ман фаляакатбы инсанар азгъунувхьайнкъаI, къихели. ШакIле къийна къеджен йишин миллет сен-сениле нишилхъайий сийкIал. Нена адамий ыхьай, нена хьунаще йихьай хъуваацIа деш. Чатубы хъодуни чаврайлхъа сабкIыл. Хизанын адаббы, хааIрна-кIыл’на хъуваацIый, сана-санкъуна гьуIрмат авхъий, иман гьуваджий гьадкыл аIлгьаа водунбы. Фаляакат гьагван госатмабы водунбы.
Гьелбедти, хаIббанан инсанар йишди республике югунбы, маIърафатыканбы, сана-санкъуни балее авхъааххъанбы вобунбы. Писди инсанаршиле алла, югунбышеб зулум цIыцIааъа.
МаIгьадни фаляакатбыше ва гьаIдисабыше инсанар камилийвалеехъа, саджигеехъа, мислягьаIтеехъа сааъа. Республикее вухьайни фаляакатын йишди дагъыстанни миллетбышин югун, эбеедын хасиятбы ашкараъы. Санкъуна баляа, гыргункъуна баляа вухьа. Инсанарше сана-санкъус хылявхъу.
ЦIеббыйни фаляакатын аIсас хыли Къузайлни Дагъыстанни районбышеехъа ва МагьаIчкъалайни, Хасавюртни шагьарбышехъайий ва манчини гьихъийаллани поселокбышилхъа, хиваршилхъа хъады. Са йигъни аIрее быкырни ыIмрее инсанарше саъыйн кар, аляуйн хайбы, малкъара селин ыккы. Гыргын кар веранхьайн. Манке зиян хъетIуйн инсанар джони баляаква текба гьабсыр деш. Инсанар имааджийбышис хъигъебчIу, охьанасын кар, илёгъасын хьян, аляъасын палтар, къалябкIасын джигабы гьуво. Гьелбедти, са-кьоIни йигъни аIрее гыргын кар чини къайдалхъа адчес шавукеджад аIхас деш. Манчинимеега вахт вуккан. Къийна гыргын къарышмишхьа водун.
КьоIдъэсда фаляакат апрельни вузани кьома меб хъабы. Гьайни элейс мани мисийбатын хыли мед МагьаIчкъалайлхъа, чини гьихъийаллани поселокбышилхъа ва гунайлни Дагъыстанни районбышеехъа хъады. Гьайни элейсди мисийбатын инсанаршин ыIмырбы алеетIу. ГьабтIуйнбышди аIрее ушахар, кьаIсин инсанар ва ушах ихьесда джегьил едаршина йихьа. Мана эн хаIбна баляа ва уцIур водунбы. Республикайни марказе хавна бинаа гьыIгъабкыр. Сабара бинаабышын диббы , кIаджарбы хьинен гьодгъул, чок гьуво водунбы. Мункум вобна бирданхьессе гьыIгъаккарас.
Мана гьаIдиса вухьайни джигеехъа республикайна хааIрна Сергей Меликвов ва шагьарна хааIрна Джамбулат Салавов абы. Манбы мани хайбышее ешемишоохьени инсанаршиква хъызаххы ва джуваб гьуво кумаг гьелесын. С. Меликовни увгьойква, гьалекийс зиян хъетIуйн инсанар ши меннянкъаI аахвас оIтирааъас. Хъийгъа гьыIгъадкыр аIлгьааIни хайбышин экспертизабы илгъечIуйле хъийгъа, ши фыкырамишивхьесынбы манбышис хайбы няайий гьелес. Къийна ши сабыр гьуваджес ыккан. Гыргын ташкилатбы республике чини къайдайл ишлемишехьи водунбы. Профильный министерствабыше иш вуккекка вобна. Республикайс федерал кумагыд ихьесын. Текба шу вушди баляаква гьавассарас деш, — республикайни хаIрункъвее къейд гьаъы.
Мисийбатын хаIдын зиян Дербентни, Къаякентни районбышис гьуво. Гёгъыйни гёгъуйбыше Геджухна хьинена нав гяацIявъу, хьян хъаккидхьу оогъанче эндермишхьайн хивааршеехъа. Мамедкъалайна хив хьинеке авхъа хъувхьа. Инсанар усулывхьайнбы хайбышенче гьейбхас. Хьян хайбышди дахалхъабышилхъамее къалхымишхьа. Манбы паIлчукьенче, селершенче, хьинеенче хъыгъааъасдиме Дагъыстанни районбышеенче, хиваршеенче, шагьарбышеенче техникайква, охьанасди, аляъасди карака инсанар абы. ХаIм-йигъна манбыше инсанар, малкъара къадтихьанаъы. Къийнаб мана иш таамувхьа дешобна. Къонши республикабышеенче ва медни Россиейни шагьарбышеенче, вилаетбышиле кумаг хъооI водун.
Дагъыстанее вухьайни фаляакатни гьаIкIеена хабар федерал гьуIкумылхъаб гьибхьыр вобна.
Россиейни Президентыс Владимир Путиныс манчина хабар Россиейни МЧС-ни министре Куренкове ва Дагъыстанни регьбере С. Меликове гьуво.
РФ-ни Президенте Дагъыстаныс кумаг гьелесда амур, манчини гьаIкIеедын иджлас манкъвее алгъавгьу, ва гьиджо ишбыйий зарада къаджес тапширмишау. Федерал гьоIкумыле гъайре , Дагъыстан къелилхъа хъаъас кумаг чIакIын ишкарар ва хаариджий оIлкабы гьазирда водунбы.
Манбышди аIрее цIеббыйнбы Палестинайни Гъаазе ешемишоохьен мусурманар вухьа. Къийна мааъаб гьиняадынчиле къат-къатна дагъамна вазият вобна, манчихъа илдяакы манбыше аIхреедын джон кар гьелес гьазирба вобунбы.
Апрельни 6-чил Мамедкъалэй селершике яранмишавхьайни вазиятыква танышхьес республикайна парламентна садры Заур Аскандаров гьаркIын. Манкъве джигайл’ зиян хъетIуйни инсанаршис кумаг гьелесын башарабы къаджы.
УIл’джумни далатийни йигъыл’ Дагъыстанна премьер-министр АIбдулмуслим АIбдулмуслимов Новокулийни хивее ыхьа. Мааъад манкъве халкьыкван горушбы ыккы ва инсанар баляаква текба гьавассарас дешва джуваб гьуво.-
ХаIдын юк джолхъа Дагъыстанни муфтиятын, динэгьлерше, фонд «Инсанын» алеетIу. ЙицIыдле йигъ водун, манбыше зиян хъетIуйни инсанаршис кумаг одхьунийква, хьинеква, палтарыква гьелен. Муфтиятын, аали мактаббышин, колледжбышин телябабы йигъыс кумагыс хъигъеебачIи. Хайбы, йаIхъбы, кучебы баттагъыке, гьаIшике темизяъа.
Инам гьаъан, гьайна фаляакат шас дарс ихьес. Аллагье йишин халкь йыIкьни баляабышике гьуваджесын! Аамин! 
