Дагъыстанни халкьбышди садибыйвал’ни Йигъын байрам алгъайгьен хаIбба вахт дешобна. Ман алгъагьас 2010-ъэсди сен Дагъыстанни миллетбышди хьебыдъэсди съездее кьарарылхъа хъабы. ГьаIшде гьар сен сентябрьни вузани 15-чил’ республикее тентенейква манчина шадвалла вуккекка .
Гьайни сен регионни хаIдданани джигабышее мани йигъыс къадсырыйн йигъынджагъбы, шадлыгъбы, джурабаджурайн тадбырбы илгъечIу. Дагъыстанни халкьбышди садибыйвал’ни Йигъыс къабсырна мыджагна маджлис Мишлешни хивейиб вухьа.
Хивын джаIмаъат накьра зурнайни сесилхъа йыIкьнекни мактабни магьаIллейхъа сады. Мактабни шыгыртарше манбышис йишди эл’ни аIдатбышиква багълыданан уфтанын тамашебы гьагу.
Шадлыгъбы гигъалассе гьихъа, мактабни маIъаллиме Фейзулла ЫIсаеве мани байрамни таарыхни гьаIкIеен аIтрафлы маIълумат гьуво. Манчиле хъийгъа, Ф. ЫIсаеве оIгийл’ни вахтбышил’ хайбышее ишлемишаъан къаббы гьагу. Манбы нишис ва няайе ишлемишаъа хабаравъу.
Мани йигъыл’ мактабни магьаIллейхъа сабыйнбыше истагъ балканылхъа гейъэни аIдатыке лезет алятIу. Мактабни джегьилерше манчика багълыбанана гееб югна тамаше гьаагу.
Истагъ балканылхъа гейъый цIаIхни халкьын йиссейн аIдат водун. Гьихъа хиваршее истагъылхъа балканаршикваний гьавайкIан. Истагъылхъа гьаIзиравъуни балканыс ярашугъний гьелен. Манчис тезе ягьарный ыIвхыйхаIна. Манчиле гъайре балканни лигайс уфтанни безегбышикван гьайкалний хъаъан. Бег’ни гьамбазарше –хивни къазахарше балканаршини карваныква истагъылхъаний гьавайкIан. Ичийни хааъад маIъарака гьаагуйле хъийгъа, цымайни хаахъаний сивийкIал. Истагъылхъа гьабкIынийн къазахар мушдуллухыс балканарный къадахьванаъанбы. Истагъ хивейхъа гьирхьылийнкъаI, маIнкъыни гьийд гелсинбыний гьаъанбы. Гелсинбы мыкIаршин аIдат водун. Истагъыква хъарыйни хаIрынкъве нубатыква бегин деккий ед’, гугьар-гьамбазар, достар, даватбышейхъа абыйн мигьманар мыкIаршисный хъигъаагьанбы.
Къийна ман йиссейн ва шадын аIдат, эгьес эйхьи, аIрейнче адкIынийн. ГьаIшде истагъар машинбышиква хъавайли. Балканылхъа истагъ гяйъэн аIдат таарыхейхъа адкIын.
Мишлешни хивни йыIкьнекни мактабни шыгыртарте мани аIдатыс кьоIбъэсда ыIмыр гьуво. Манбыше мани аIдатее водун гыргыда карбы хаIдни къулайква мактабни магьаIллейхъа сабыйнбышис гьагуйнбы. Шадлыгъбышис ярашугъ джегьилерше аляуйни палтарбыше гьуво. Ичейрше йиссейни къайдайлин аIкьын донбыйий калагъайбы аляу ыхьа. Гадебыб вукIлел’ кьаччийбышиква ва мыгабышил’ литяршиква хъигъебчIы.
Дагъыстанни миллетбышди садибыйваллайни Йигъни байрамейхъа шыгыртар хыл’ кьаIраб абы деш. Манбыше гьийгъанче-гьихъа хайбышее хъодхьурийн нуIъматбы ады. Мани йигъыл’ махъа сабыйнбышихъад йиссейни цIаIхни халкьыни хорагбышике дад гьаъасын имканбыд ыхьайнбы.
Байрам мыкIаршиква таамхьа. Мактабын шыгыртар, маъаIллимар, хивын джамаъаIт мани йигъыл’ къулайда мыкIар гьауйнчиле хъийгъа хайбышейхъа сабкIыл.
