Майни 9-чил Россиейни Федерациейни гыргынанкъаI хьинне, Дагъыстанэйид ХаIбни Ватанни даIвъийе Гъамувхьайни 81-сенийс къадсырыйн шадлыгъбы илгъечIу.
Каспийскни шагьарни маркази майдама мани гьадисайс къадсырыйн эскераршин парад ыхьа. Мааъад Дагъыстанни чIакIынбыше иштыракау.
Парад гигъалассе гьихъа, сабара гагьна республикайс хаIбвалла гьааъана Фёдор Щукин даIвъийна ветеран Муса Багьаутдиновыка, СВО-ни иштыракчершиква ва тадбырни шараф тамашачершиква горушмышхьа.
Парадыс хаIбвалла Каспийни флотилиейни хаIрынкъуни маIъвыне контр-адмирал Анатолий Долгове гьавъу. Парад Каспийни флотилиейни хаIрынкъве вице-адмирал Олег Звереве кьабыляу.
Тентенейквани маршиква маркази майдамыле Дагъыстанэй еррашмишхьайни къошунбышин эскерар илгъебчIу.
Джуни чыхышее Фёдор Щукине дагъыстанныбы Гъамувхьайни йигъыква табрикавъуйле хъийгъа, увгьойн: «Йишди оIлкайни таарыхе гьин аIзизын йигъ водун. Гьин насылбы саджигэйхъа саъан байрам водун. Къийна шас ачухын дюнйе гьадсырыйнбышди гьийд вукIул’бы кIёзараъа, гьабтIыйнбышис раIгьматбы къихели. Майин 9-ле таарыхе гьаммашийс ахвас, ман нишикеджад ва шавукеджад пызмышаъас аIхас деш».
Манкъве йикIел’ хъаляуйнки, даIъвийн уцIурбы советни оIлкайни гьаарни хизаныс хъетIу.Республикайни башчийе ветеранаршилхъа, даIвъийни ушахаршилхъа ва архайл’ни фронтни заIгьматчийершилхъа мураджият гьау. Гьелбетте, вушда гееб дагъамна йаIхъ вухьа. Амма шу гудж идявхейиб, умуд къалебчу деш. Шас хошбахтыйвалла гьувойс, шаква са вахтал’ ешемишейбхьайс шос хаIдын сагъул, -Фёдор Щукине агъмишау.
Джурайда манкъве СВО-ни иштыракчершини дёлесинбышилхъан мураджият гьау. Манкъуни увгьойка, къийна Гъамувхьайни эскераршина иш йишди джегьилерше давамааъа вобна. Манбыше оIлкайни президенте Владимир Путине гиххьыйн мисалабы угъадука гьаллаъа водунбы. ГьаIмагьбын игитер, гьаIкIен адамер хаIбхъавъуйхъа гора, шос миннатдарийвалла агъмишааъа.
Парад МаIгьачкъалайни эскераршини гарнизонни оркестрын гьавъуйни «Гъамувхьайн Йигъ» машгьур маIънийква таамхьа.
Парадыле хъийгъа республикайни хаIрынкъве «ОIлумденан полк» акциее иштыракау. Манкъус гьамбазыйвалла , регионни парламентни спикере Заур Аскендерове , ДР-ни пермьер-министре МаIгьаммад Рамазанове, СВО-йни иштыракчерше, эскераршини едяарше, гьуIкумни ташкилатбышди чIакIынбыше, джамиятни идарабышди эл’черше, телябабыше, шыгыртарше гьавъу.
Гьайни сен акциее хьебцIал’ аазыр маIгьачкъалалабыше ва пайтахтни мигьманарше иштыракау. Манбышин маршрут Расул Гьамзатовни кучейле СтIал Силейманни доюл’ни паркэйхъаме цIыцIахьа. Аварни драмтеатрни гьийд акциейни иштыракчершиниме байрамын кIанцерт гьуво.
Гъамухьайни йигъыс къадсырыйн шадлыгъбы МаIгьачкъалэй хаIдни кIанцертука таамхьа. Дагъфилармониейни къыIлийни майдама республикайни лайикьыквани артистарше даIвъийни вахталийн маIънийбы гьау, маданиятни маданиятни мактаббышди шыгыртарше тамашебы гьагу.
