ГьуIрматыкван цIаIхбышин джамаъаIт!
«НУР» кIазетни Редакциейни советни сураке шос гыргынкъус цIедын 2025-ъэсын сен мубаракда ихьен ва шос джанана сагъвалла, суIл’гь ва болвалла арзуламишааъа. Гьасре гьайин сен йишдимее югын ихьеджин ва умуд гьааъана СВО таамхьа йишин эскерар сагъба — саламатба хайбышейхъа хъавалесынбы.
Са-къоIбле кал’ма йишди Редакциейни советын оIтмишхьайни 2024-ъэсди сен къавджейни ишни гьаIкIее эегьес вуккан.
Йишин совет ишлемишехьен хьебыдъэсын сен водон ва совете йишди гьар хивенче саваднан, гьуIрматыкван инсанар вобонбы. Ши мааъад йишди миллетыс ааидни дагъамийвалабышди гьаIкIее ва манбы оIгийле алятIасын тадбирбы къаджесди гьаIкIе гаф гьааъа, ва лазымни джигабышеехъа (республикайни чIакIынбышилхъа, министерствабышеехъа ва медни ташкилабышеехъа) мураджиетбы гьаъа ва манбышке ман дагъамийвалабы гьаллауй телебаъа.
ОIтмишхьайни 2024-ъэсди сен мани сардан хаIдда ишбы къаджу.
Масалан, ПАО «Россети» ва Дагэнерго донани ташкилатбышехъа йишди советни сураке мураджийат гьаъу, Сувал’ни магьаIлле ишыхбышда хаIт ва сабара джигабышее ишыхен диракбы бадалаъу. Ман ишбы къаджес 10 млн 500 аазыр манат къавукку вухьа.
МаIгьабна иш(ишыхен диракбы бадалаъу) Бабаюртни зонайл’ ЦIебни Мишлешни хивейиб къавджена.
Манчиле савагьийда, Дагъыстанни маданиятни министерствехъа мураджият гьаъу, Мишлешни хивни клубыс цIедын мебел’ хъады.
ОIтмишхьайни сен йишди советни уIзвубышди кумагуква хиваршее манзикбы ремонт гьаъу ва манбы тезелемишаъу. Масалан, МиххьегIни хивее, эгьес эйхьи, цIебна манзик алавъу, ЦIаIхни хивее мадрасайс ремонт гьаъу, Хьойикни хивее мыралий алявъу, ХыIягъни хивее манзик ремонтавъу, ЦIаIхни хивее ХаIбни Ватанни даIвъэ иштырак гьауйнбышис гьаIйкал гивхьу ва манбышин добы махъа адчу, гойне мани хивеехъа аIкяани джигехъа хаIдни гьаIрфбышква хивун до одкIун, Муслагъни, Лекни хиварше йаIхъбы темизяъу ва медын ишбы къаджу.
Ман ишбы гьаъас хаIбба заIгьмат редакциейни уIзвубыше Мамед Мамедове, МагьаIч Сафарове, Айдын Бабаеве, НезирмагьаIммад АIгьмадове, ГьаIзрат Гераеве, АбутIалиб Мурадове, ШаIъбан Кьасымове, Имам Рамазанове, ШаIъбан Мамедове, ХанаIгьмад Гераеве, АIадуллагь Рамазанове, Исакь Балаеве ва сабара мебынбыше гьавъу. Манбышис джанана сагъвалла ва кисайс барака гьевленава эйхьи.
Йишди хиварше сабара ишбы къаджес кумаг МаскIавни шагьарее ешемишехьени меценат Павел Высоцке гьуво. Мани кумагуква МиххьегIни, ХыIягъни, Мишлешни хиваршехъа булахбы гиххьы, сайд манкъве МиххьегIни хиве Самурни дамайл’ огъан аддамадж ремонтаъас 40 аазыр манат кумагыс гьуво. МанкъукIлед сагъулва эйгьи, гьасре манкъухъа иляакы сабара йишди миллетни пылнани инсанаршина хыл ачухувхьеджин.
ОIтмишхьайни сен ноябрьни 20-ил’ югна маджлис редакциейни уIзвубышди иштыракуква Дагъыстанни муфтияте илгъевчIу. Маъад Усман афанди аль-Цахурийн «Тухфату аль-ахбаб» донан китабын презентация илгъечIу. Ман презентация алгъагьас редакциейни узвубыше Гьасан-эфенди Магьмудове ва Сувал’ни магьалылна йишда имам Эл’дар-гьаIджи Сулейманове хаIдын кумаг гьаъу.
Манчиле савгьийда 2024-ъэсди сен редакциейни советын уIзвубы Дагъыстанна муфти шейх АIгьмад-эфедий АIбдуллаевыкани горушее иштырак гьаъу.
Мани ишбышле савагьийда редакциейни советын уIзвубы республикайни сабара министерствабыше ва ташкилатбыше вуха ва Госдумайни депутатаршиква горушмишебхьа хиваршее йаIхбы, ишыгъбышин хатIбы, цIыцIауйни, Бабаюртни кутаныл’ СПК «Ленина», сувал’ Мишлешни хивее ушахар идманыква машкъулувхьайс шараитбы яратмишауйни гьаIкIе мани горушбышее гаф гьавъу ва кумаг гьеххъы.
Мани агъмишауйни ишбышле савагьийда редакциейни уIзвубыше сабара медни милетнимее къеджени ишбышейид лазымын иштыркбы гьауйнбы. Масалан, йишди кIазетыс, ушахаршди журналыс подписка гьаъас, лазымни джигеехъа садакьа гьелес ва медни сабара ишбышис джоке аIхан кумагбы гьаъойнбы.
Умудааъана гьайни сеныд манбыше йишди милетыс лазымын кумагбы гьелесынбы ва къайгъвее ахвасынбы.
Гьайни сен шахъад хаIдда къаджесын ишбы водонбы. Манчини аIрее эн ваджибынмы ЦIаIхни мадрасайн 950-ъсын юбилей, йишди миллетни кIазетын 30-эсын юбилей, профессор, «Нур» кIазетна хаIрна редактор Гьарын Ибрагьимовын 100-сенийн юбилей ва сабара медин югун тадбирбы къаджес фыкырее аххъы водонбы.
Ин ша Аллагь Редакциейни советни уIзвубышди, миллетни гьуIрматуквани инсанаршди, ва шавусее йишин миллет гыранда ва чини къайгъве ахва манбышква саджигее ман фыкырее аххъийн ишбы алгъагьасынбы ва манчиле савагьийда миллетыс лазымын ишбы къаджесынбы!.
