Камиль Шамхалов
Гьар сен майни 12-чил дюнйейл’ медсестрабышин йигъ алгъайгьи. Мани йигъыл’ таарыхе энки доюкана раIгьимнана сестра, англиейлы Флоренс Найтингейл едике йихьа. Крымни даIвъийни вахтал’ (1858 – 1856) маIнкъее цIебба раIгьимнани сестрабышда къуллух тешкилявъу. Едарше яраламишивхьайни эскераршихъа иляака вухьа ва дохтураршис операциебышее кумагаъа ыхьа.
Медсестрабы здравоохранениее энки хаIббанан ишчер вобунбы. Манбышди къулайике, гьунарбышике чIырынбышда гьал-зугар аIслыба. Няъас увгьее больницабышее, поликлиникабышее хаIббанана хидмат медсетсрабыше гьааъа.
Россиейл’ ешайишис дагъамни джигабышее медсестрабышикена кеситийвалла вобна. Манчини аллад гьоIкуматын «Земскмй фельшер» программа ишилхъа абчу. Манчин джегьил дохтурын саIнаъат сечмишаийнбышис югун имканбы гьеле. Манбы пылыкад багълыда водунбы. Йишди миллетни эл’чершед мани «Земский дохтур» ва «Земский фельшер» программабышике гьавасука истифада гьаъа водун.
Рутулын район республикайни марказыле энки аIкьаIнани районбышин са водун. Мани сабабыхъа гора, дохтурын саIнаъат сечмишаийнбышин хаIббананбы маIгьадни джигабышее ишлемишивхьес телесмишоохьи деш. Манбыше ешайишис раIгьатын, шараитбынан джигабы тIабаляъа. Манчихъа ил’дяакы, аIкьанани районбышейиб югун дохтурар, медсестрабы, джони саIнаъатын гьаIкIен устадар кыл’ба дешобунбы. Манбышда сайир Рутулни йыIкьнекни больницайна медсестра Ибрагьимова Севда УIмаргьаIджийна йиш ворна.
С.Ибрагьимова Рутулни больнице ишлемишейхьена 15 сен водун. МаIнкъее Къызларын медучилище быкыраийнчилее хъийгъа, мани медташкилатейхъа ишилхъа иккейчIу. ГьаIшде мана ушахаршини отделенениейна медсестра ворна.
2019 сен, ковид къайнемишивхьайни вахтал’, гыргынанкъаI хьинне Рутулни больницайни ишчершилхъа дагъамийваллабы хъады. ЧIырынбышин сай ваIшбышиква ыхьа. Мани азарын хьуледса инсанна ыIмыр вукку. Мана чаIпална азар еймишоохье гибгъылни йигъыле больницайни ишчершихъаб хаIм-йигъ ыхьа деш. Манбы чIырынбышди балее аахва вухьа. Джойиб ковидыке чIырувхьайни къорхуйхъа ил’дяакы, дохтурарше, медсестрабыше, медицинайни кIыл’ни персоналын джолхъа тапширмишавъуна иш саламатба вуккейка вухьа. Манбышди джаргее Севда Ибрагьимовайир йихьана. МаIнкъыни гьунарыс, баджарыгъыс больницайни чIакIынбыше грамотабышис, премиебышыс лайикъайъы.
Севдайн дохтурни саIнаъатылхъан аIшкь дек’ УIмаргьаIджий Керимовыква багълыда водун. Манкъве бабаюртни зонайл’ хьебыд аазырыле агъаллани агьалийс хидмат гьааъа. УIмаргьаIджий чоджий цIаIхни миллетни доюкани дохтураршина са ворна. С. Ибрагьимова чалышмишейхьена чIырынбыше, коллективни ишчерше джен дойид садджу югни сурале агъмишеъэджен. Йиджыд джеке эйхьен.
«Нур» кIазетни редакциейн Севда ва гыргын йишди миллетын медсестрабы оIгийле хъооIни джони саIнаъатни байрамука табрикааъа, хизанбышее саламатийвалла, ишбышее угуъурбы аIрзаъа.
Шикылэй: солни сурак’ С. Ибрагьимова
