Октябрьни 30-31-чил’ Дагъыстанэй ракьамни инкишафын ёкьудъэсын Каспийин форум илгъечIес. Манчиква багълыда РИА «Дагъыстанни» майдамее пресс-конференция ыхьа. Форумыс вуккеккани гьаIзирийвалике журналистаршис гаф республикайни ракьамни инкишафни министре Юрий Гьамзатове гьавъу.
Гьини элейс республике илгъечIесын хьебыдъэсын форум водун. Гьийдни сенбышеени форумбышее хаариджыле ва Россиейни регионбышейнче абыйни хил’дже эл’черше иштыракау. Манбышике геллесынбы гьайни сен аблес гьаIзирувхьа вобунбы.
Журналистаршиквани горуше ракьамни инкишафни министре Ю. Гьамзатове увгьойн: «Форум Дагъыстанэй алгъайгъайхъаб хаIбна макьсад вобна. Йишди республикайн хаIдданани хаариджи оIлкабышиква къоншивалла гьааъа. Мани оIлкабышди аIрайл’ Шимал-Джануб йаIхъ алгъааI. Манбы — машнена , хьинена ва хаIйбышейнчена йаIхъбы водунбы. АIхырейни сенбышее мана программа гуджнаква гьаIракатейхъа абчы. Мани карее хаIдын кумаг шас ши алгъайгьени форумбышин гьели».
Гойне хьинне министре журналистаршис форумейхъа аблесди эл’чершди гьаIкIеедын ихтелет гьау. Манкъуни увгьойка, гайни сен форумейхъа хъобтIулынйбышин сиягьыйид хаIдын водун. Манбы IТ индустриейн ишчер, къуллухчер, ишкар инсанар вобунбы. Кьомани джаргэй Россиейни ракьамни инкишафни, связьни ва хаIдданани коммуникациебышда министр Максут Шадаев ва сабара федерал такшкилатбышин вукIлелинбы вухьес. МагьаIбна хабар министре гьинчиле сабара вахтна гьихъа республикайни хааIрынкъуква С.Меликовыка илгъечIуйни горушее гьуво.
Форумейхъа Иранылен ва Къазахстангъанчен мигьманар аблес гьаIзирувхьа вобунбы. Манбыше гьийдни форумбышейид иштыракауйн.
Къийна ёкьудъэсди Каспийни ракьамни форумыс гьаракатука гьаIзироохьи вобунбы. Маджлис Каспийскни шагьаре вухьес. .
Пресс-конференциее Юрий Гьамзатове журналистаршис къийна связыква багълыбани Дагъыстанэй яранмишувхьайни дагъамийвал’бышикеб маIълумат гьувойн. Манкъуни джуваббышихъа гора, маIгьабна вазият садджу йишди республикейджаб деш, Россиейни хаIдданани регионбышее вобна. Манаб, шокIле ацIан, оIлкее яранмишувхьайн гичIыква алаакьаба. Манчихъа ил’дяакы, къийна ракьамни инкишафни министерствайн джурайна иш вуккекка. ЧIакIни алыш-веришни марказбышее вая хаIбба инсанар сабайлени джигабышее джурайда вайфайбы ачухаъа. Мааъад инсанаршихъад связь аххъасын имканбы водонбы.
Пресс-конференциейни аIхырее министре журналистар форумей иштыракаъас хъобтIул. Манкъве мааъад хаIдда медын марахукван тадбырбыд ихьесынва агъмишау.
