Мартни 7-чил’ МаIгьачкъалее, «Горная долина» шадлыгъбы илгъечIени утагъее цIаIхни миллетын ифтар илгъечIу. Мани маджлисее 600 инсанее иштыракаы.
Ифтареехъа абыйнбышди аIрее Дагъыстанни динэгьлершини управлениейн, муфтиятын эл’чер, гьар хиваршеенче, шагьарбышеенче – МаIгьачкъаленче, Дербентгъанче, Къызларгъанче, Каспийскенче ва Рутулни, Бабаюртыни районбышеенче адыйн цIаIхбышин джамаъаIт ыхьа. Джони аIрее хиваршин имамар, динэгьлер ва мебын инсанар вухьа.
Ифтар АIбдулла-гьаIджий Эфендиеве хъаIдаххъани нашидбышиква ва дуъаIбышиква ачмишивхьа. Манкъве аIрабни, цIаIхни, азербайджанни мизел’ манбы хъадхъыI.
Гойне мани маджлисее Дагъыстанни муфтиятна нумаенде АIгьмад Кахаев йишонхьа. Манкъве муфтиятни сураке ифтареехъа абыйнбы табрикавъу ва увгьойн: «ЦIаIхийн миллет таарыхбышиква диныква ыхьа ва мани миллетыхъаб Джабраил-эфендий, Магьмуд-эфендий, Усман-эфендий ва мебын динын ааIлимар вухьа. Манбыше Дагъыстанее исламын дин еймишаъас ха.бна иш къавджу. Гойне ЦIедни-Хушетни манзикна имам АIгьмад Пахрудинов йишонхьа. Манкъве джус къийнийна ифтар гееб кьабыливхьанава ва Аллагье кьабыляъанава увгьо.
Рутул районни депутатаршди иджласни садрые Умахан ГьаIджиеве, Дагъыстанни ДжаIмаъат палатайни уIзвуе Сабир Сайдумове, «Нур» кIазетни хаIрни редакторе Байрам АIбдуллаеве, Дагъыстанни хаIрынкусанейни кьаIсынбышди советни уIзвуе Айдын Бабаеве джони чыхышбышее ифтареехъа абыйн инсанар Рамандини вузаква табрикавъу ва аххъыйн сиваар, гьувойн садакьабы, гьаъыйн кубаар Аллагье кьабыляъанбыва увгьо.
Зы йишонхьайле хъийгъа, «Инсан» донани фондни Сувал’ни дерайил’ни нумаендейс АIсадуллагь-гьаIджий Рамазановыс «НУР» кIазетна грамота, кIазетын логотипнан гурушкIа ва ед’ни мизелин «Шааираршда маджлис» донан китаб пайис гьуво.
Гойне АIсадуллагь-гьаIджее джуни чыхышее оIтмишхьайни сен МагьаIчкъалее, Сувал’ни дерайл’, Москвае, ЦIаIхни хивее ЦIаIхни мадрасайни 950-сен быкырхьайни юбилейис къадсырийни маджлисбышди гьаIкIее увгьо. Мани маджлисбышее югун иштракаъуйнбышис манкъве ташаккурийвалла агъмишавъу ва манбышди сабаранбышис фондуни сураке грамотабы ва миннатдарийвалла бил’дираъан кагъызбы гьуво.
Сувал’ни дерайни имаме Эл’дар Сулейманове, шавайе ифтар алгъагьас кумагбы гьаъу манбышикIле сагъулва увгьо. Гойне манкъве са-кьоIбле кьураненчен дуъаIбы хъадхъыI, хъийгъад джуни сураке волонтераршис грамотабы гьуво.
Ифтарехъа абыйни ушахарше АIбдулла-гьаIджийква сана уфтанын нашидыд хъаIдхъыйн ва манбышис зы цIаIхни мизел’ къоокана «Лачын» донана журнал битIалавъу.
ХаIнелин он аляумее, сабыйнбыше саджигее сиваар гьахувы, гойне джамаъаIт кубар гьаъы.
Кубаршиле хъийгъа махъа абыйни инсанаршди аIрее пайбы гьувагы. Мани пайбышди аIрее кьоIбле Умрейхъана путевкIа вухьа. Манчина са сабара вахтна гьихъа раIгьматыххъа аркIынна цIаIхбышда шааир Юсуфов Юсуф-гьаIджийни невайс кьисмат вухьа, сайиб маджлисейхъа мигьманхьинне арыйни са джаваныс. Ифтаре «Нур» кIазетни ва «Этномир Кавказ» донани турфирмайни сураке сайигъийсди турна путевкIа гьувагы ва мана махъа арыйни са йишди баджийс кьисматувхьа.
МаIгьаб цIаIхбышда ифтар таамувхьана.
