Гьар сен февральни 15-чил’ йишди гьоIкуматыл’ йишди эскерарше Афганистан интернационал бордж хъуво хъигъебчIуйн йигъ алгъайгьи. Мани йигъыл’ джурабаджур майдамбышее мани йигъыс къадсырыйн йигъынджагъбы илгъечIи.
Афганистан вухьана даIвъий, йишди гьоIкуматни таарыхна са кIаарна варакь вобна. Ватанын ихтиярбы гозетяъа, мааъаб хаIбба джаванар йишин гьабтIу. Мани сенбышее йишди гьоIкуматын хаIдын хайир ишбыд Афганистан къаджейнбы. ЧIакIын бинаабы аляъы, йаIххъар, йигъаIр, ёххаIбы ва медын ташкилатбы аляъы. Къийна эспертбыше, таарыхчерше мааъаб вухьайни даIвъийс джурабаджур кьиймат гьооли. Анджах шавухъадджад иджааза дешин мааъаб эскерийвалла гьавъуйни эскераршикIле, офицераршикIле нягьаIкьын джуваббы эгьес. Манбыше мааъад джон бордж Ватанни гьийдын хъуво. Мааъаб вухьайни даIвъийе йишди миллетни джегьилершед иштыракаъыйн. Манбышди аIрее джан гьувойнбыб вухьайнбы. ХаIббананбы чIакIни гьоIкуматни наградабышис лайикьавъу.
Къийнад йишди миллетни джегьилерше, мебынбышиква саджигее, Россияйн тераф Украинайл’ аIлгъаани СВО гозетяъа водун. Манбы фашизмайна, нацизмайна кок юзмишааъас чалышмишоохьи вобунбы. Йишин эскерар мааъаб садджу укранацистаршикаджаб деш, манчиле гъайре НАТО-ни , наемникаршини къошунбышиква вурушмишоохьи вобунбы.
Ййишин бордж водун йишди эскераршис хыл’ джувабыква авхъуй ва аIхан кумаг гьувой. Къийна маIгьабна хизан дешда цIаIхбышихъаб, СВО гогьар, дёлесна дешда. Манбыше джони гьаIракатбышиква гъамувхьесын йигъ дёлесхъаъа водун. ЦIаIхбыщди игитерше джон сувахъанын рыIгь вурушбышее гьагван. Манбы гыргынбы йишин кьаIгьраманар вобунбы. Ши гьаммаше чалышмишоохьенбы манбышди гьаIкIее окIанас ва манбышиква горушмишивхьес.
ОIт’мишхьайни уIл’джумее «НУР» кIазетни редакциее , гьар сенийни аIдатеехъа эчIуйн, афганни даIвъийни ва СВО-йни иштыракчершикван горуш илгъечIу. Мана маджлис «Нур» кIазетни журналисте Рамил’ АIбдуллаеве къурмишавъу. Манбышиква гаф гьааъас «Нур» кIазетын ишчера, ГТРК «Дагъыстан» цIаIхни мизелин верлишбы ыккеккана журналист Юсуф Бабаев, ДжамаъаIтни палатайна цIаIхбышикена уIзву Сабир Сайдумов, цIаIхбышди джегьилершини Союзна садры Руслан Алхасов ва мебынбы абы.
Маджлис «Нур» кIазетни хааIрни редакторе Байрам АIбдуллаеве ачухавъу. Манкъвее маджлисеехъа сабына сабаб ашкаравъу. Гойне манкъвее йишди гьоIкуматыл’ ыхьайни ва гьаIшде аIлгъаани гьаIдисабышди гьаIкIеедын чыхыш гьаъы. Чечнайс йишди игитершин гьаIракатбы йикIел’ хъаляъы «Нур» кIазетни редакциейн мани сардан вуккеккани ишини гьаIкIеедын маIълумат гьуво.
Гойне манкъвее джуваб горушеехъа абыйни мигьманаршис гьуво. Сабир Сайдумове чыхыш гьааъанкъаI увгьойн: « … Къийна шу йишди гьоIкуматын тезе таарых ойкIанан инсанар вобунбы. Ватанын вушда игитийвалла кIеливханааъас деш. Шинаб чалышмишивхьесынбы шохъад, вушди хизанбышихъад камын , кесирын мехьеджен. Агар документбышиква багълыданан , ушахар бахчебышеехъа, аали мактаббышеехъа гивхьуйкван, маалиджебы гьауйкван шохъад дагъамийваллабы водхьее, шалхъа бил’диреъэ. Ши чалышмишивхьесынбы экIда манбы гьаIллаъас…..»
Ислам ПирмагьаIммадове Афганистан вухьайни даIвъийни гьаIкIеедын чыхыш гьаъы. Манкъвее СВО иштыракаъани йишди джегьилершис мислягьаIтбы гьуво ва нишилхъайи фагьам гьевлес вукканва, увгьо. Чыхышни аIхрее, маджлис къурмишавъуйхъа гора, редакциейс миннатдарийвалла агъмишавъу.
Манкъуле хъийгъа, чыхышбы гьаъас Б. АIбдуллаеве СВО-ни иштыракчершис хааишаъы. Джегьилерше джон фыкырбы увгьо ва нени дагъамийвал’бышиквайий джо растына хъабайле агъмишау. Манчиле гъайре, джигайл’ гьаIлла гьидяъани ишбышди гьаIкIеедын ихтелет’бы гьаъы.
Ю. Бабаеве джуни чыхышее увгьойн: « Джегьилер хъобкуба вобунбы. Сабара джигайл’ хиваршини администрациебышее гьаIллаъасын ишбы «цIыцIаъанбы». Сабара хиваршини администрациебышди чIакIынбышикIле хьулени джегьилейий джони администрациенче СВО иштыракаъа ацIа дешин. Кумагни гьаIкIей, зы гьале эйгьи деш. Манбы СВО воохьени эскераршини хайбышейхъа акка аахъы эйбачIи деш, нягьаIбий манкъуна хизан ешемишоохьи, гьиджойий манбышихъад камын-кесирын, нен суалбыйий гьаIллаъас ыккан, манчини гьаIкIее балее аахва деш..».
К. Шамхалове ,Кь. Омаханове джони чыхышбышее джегьилершис СВО-че сагъба-саламатба, гъамувхьа душманыле, хизанбышеехъа хъабый аIрзуламишаъы.
Гойне джуваб Р. АIбдуллаевыс гьуво. Манкъвее джуни чыхышее абыйни мигьманаршис миннатдарийвалла агъмишавъу. Рамиле увгьойн: « Ши вахтале- вахталхъа гьаIйнягьдын горушбы алгъайгьенбы. Йишин бордж водун Ватаныс хидматааъани джегьилершина гьуIрмат гьувааджий ва манбышис кумаг гьувой. Шаке ман гьаъас аIхасын кар водун. Джегьилершини гьаIкIее одкIунийн макьалебыд, манбышис фронтеехъа оIтираъан басиркIабыд , гьелен грамотабыд кумаг водун…»
Гойне Рамил’ АIбдуллаеве шавайий ман ишбы гьаъас джус кумаг гьели, манбышис миннатдарийвалла агъмишавъу.
Горушни аIхрее абыйни мигьманаршиква саджигее чейбы илёдгъу, СВО-ис , афгани гьаIдисабышди ветеранаршис редакциейни дойиле грамотабы гьуво, фронтее иштыракаъани джегьилершис басиркIабы оIтираъы ва едигарысын шикыл’бы цIыIаъы.
Ин ша Аллагь, гьайни элейсын манбышикван горуш душманыле гъамувхьа, сагъба-саламатба хъабыйнкъаI аIкьни суфрабышил’ ихьес.
