Ши гьаммаше редакциехъа абыйни мигьманаршиле шадба вобонбы ва гьаммаше манбышис йишин акка ачухда водон.Гьайни йигъбышее йишда мигьман Дагъыстанни Правительствайна Брянскни вилаетыл’на нумаенде ДжинаIгъни хивейнчена АIлим ШаIъбанна дих СултIанов ыхьа. Мана гьар элейс Дагъыстанейхъа арыйнкъаI, шасахъа иккечIена ва джукасана вуджее къаджейни ишбышди гьаIкIее гаф гьааъана.
АIлим чоджий Рутул райони ДжинаIгъни хивее едике ыхьа. Мактаб таамаийле хъийгъа, манкъве Буйнакски шагьарее финансовый техникум быкыраъу, гойне Москвайни шагьарее гиябыда хивни тасарруфатын институт. 1977-ъэсди сеныле мана Брянскни шагьарее джуни хизаныква ешемишехьи ворна. Мана хаIдда сенбына Брянске джурбаджур къуллухбышил‘ чалышмышхьайле хъийгъа, пенсиехъа хъигъечIу.
2014-ъэсди сеныле къийнийлхъамее мана Брянскни вилаетыл’ йишди республикайна нумаенде вор. Манчиле савагьийда мана мани регионе югна джамаъаIтчийхьинне (общественник) ацIа ворна. СВО гидгъылийле хъийгъа, Брянскни вилаетыл’на Россиейни Миноборонайна мааъаб къуллухааъани эскераршиква горушбы алгъайгьени комиссиейна уIзву ворна. Манчиле савагьийра АIлим чоджий сабара менни комиcсиебышда ва советбышда уIзву ворна. Манкъве Брянскни вилаетыл’ къеджени ишбышин сиягьий окIанас хъадей джига аахвас деш.
Масалан, 1996-ъэсди сен манкъуни иштыракыква Дагъыстанни ва Брянскни вилаетын алакьабышда мукьавиле багъламышавъу вухьа, гойне 2023-ъэсди сен кьоIни регионын экономикайн, маданиятын, ыIлимын ва таIгьсилни алакьабышда итIумааъана мукьавиле багъламышавъу. Манчиле савагьийда манкъуни гьаракатуква Брянскни вилаетни Севский районе ХаIбни Ватанни даIвъийе гьабтIуйни эскераршис кьоIбле гьаIйкал алявъу.
Йишди республикайна нумаендехьинне мана мааъад эскерийвале къуллухааъани йишди эскераршиква, маани институтбышее ва колледжбышее хъаIдаххъаIни телебабышиква экIда-экIда горушбы алгъайгьенбы ва манбышди бале ахвана. АIлим чоджее къеджени ишбышис Брянскни вилаетни, Брянскни шагьарни, Севскийни районни администрациебышди ва сабара менни ташкилатбышди суракке ахтына кьиймат гьуво ва манкъухъад 20-а авадкIырийн медалбы, грамотабы ва медын мукаафатбы гьуво водонбы.
Гьайни сен АIлим ШаIъбанна дих Аллагьни йаIххъехъа ыIбаадат гьаъас гьаIджилхъа гьаркIын ва мааъад манкъве зиярат гьаъу. ГьаIдж къылмышавъуйле хъийгъа, манкъве гьаIджийва до алятIу ва динэгьлий ыхьа.
Мани ахтыни доюквасана мана къийна Брянскни шагьарни имамна маIвинхьинне чалышмишехьи ворна.
Динэгьлершиква алакьабы итIумда водонбы ва мани сардан манкъве къооджени ишыс Россиейни динни управлениейни садрые Равил’ Гъайнуддине грамота гьуво.
АIхрейни сенбышее манкъве йишди кIазете динни гьаIкIее, цIаIхбышди шейхаршди, динэгьлершди ва йишди хиваршени зияратбышди гьаIкIее хаIдда материалбы одкIун ва гьаIшде манкъун мани карбышди гьаIкIеедын «ЦIаIхбышин шейхар ва зияратбы» донан китаб чапханехъа хъуво водон. Ин Ша Аллагь ман китаб гьайни сен ЦIаIхни мадрасайн 950 сен къейдаъасди вахтал’ чапыке хъигъечIесын.
АIлим-гьаIджийхъа уфтанна хизан вобна ва манкъве джун ушахар тербиейква, аIкIеликва камалыква чIакIы хъааъа вобонбы. Дагъыстаныке, Рутулни районыке аIкьана ееемишоохьи вухьейиб манкъве джуни ушахаршис ед’на миз, миллетин аIдатбы кIелиханаъас гьайсар деш.
Ши АIлим чодже къеджени ишбышис угъурбы ва джус джанана сагъвалла, хыллийна ыIмыр аIрзуламишааъа!
