СВО хаIбба цIаIхни миллетын джаванар вурушмишоохье вобунбы. Манбыше игитершехьинне Ватанни гьийдын джон бордж хъели, йишди оIлкайна садибийвалла гьувааджи.
«Нур» кIазете манбышди хаIббананбышди игитийвалике ва джомардийвалике одкIунийн. Йишди эскерарше, душманаршиквани вурушбышее гьаагвани дирибашийвалийс гыргынбыше ахтына кьиймат гьооли.
Къийнийни йишди макьалайн кьаIгьраманар деккий дих вобунбы. Манбы Муслагъни хивее ешемишоохьен Маллаев Урудж маъаIллимна дих Сейфуддин ва нева Тажудин вобунбы.
Маллаев Сейфуддин 1976-ъэсди сен едике ыхьа. Хивын йыIкьнекин мактаб быкырау, манкъве джун хъаIдхъий Дагъыстанни девлетни аграрни университетей давамау. Амма мааъад манкъус аIхрелхъаме хъаIдхъас кьисмат дехьайн. Сейфуддине сабара гагьыле мани ааIли мактабейдын хъаIдхъий таргауйн.
С. Маллаеве джуна ыIмыр полициейни саIнаъатыка алакьа гьавъу. Эскерийвалиле хъийгъа, 2011-ъэсди сен мана МВД ишилхъа иккечIу. Сабара сенбына мааъар ишлемишхьайле хъийгъа, Росгвардиейхъа илгъечIу. 2026-ъэсди сенилхъамее мааъар ишлемишхьа.
СВО гидгъылни йигъыке мана джуни гьамбазаршиква саджигее махъа йаIххъыл’ гьау. Мана 2022-ъэсди сенна мартна ваз вухьа. Россиейни эскераршиниме мана гееб дагъамна вахт вухьа. Миллетчерше хаIдда сенбына аххъыйн торпахбы йыIкьаIлхъа алятIасдимее Россиейни эскерарше чIакIын вурушбы ыккы. Вурушбы ыккеканбышди аIрайл’на сайир Сейфуддин Маллаев ыхьа.
Мана хаIдданани дагъамни вурушбышда иштыракчий ворна. Сейфуддин Херсонни, Харьковни, Белгородни ва Донецкни вилаетбышил’ ыхьа. Добы агъмишауйни вилаетбышил’ ыхьайни вурушбышди гьаIкIее гаф гьааъанкъаI, манкъве увгьойн: «СВО цIеддыйн йигъбы гыргынбышис хьинне засыд дагъамынбы ыхьа. Манке шахъад вурушбы ыккейс хаIдын таджруба ыхьа деш. АIрейнче сабара вахт абкIынийле хъийгъа, зы, йизын гьамабазар къулайлхъа гябкIыйнбы. Йишди къошунбыше душманаршини йыIкьена сини гьавакьаравъуна. Къийна йишди эскерарше миллетчершини кьошунбышис аман гьооли дешда. Манбы кIылда-кIылда дагъылмишаъанбы».
Йишди кьаIгьраман С. Маллаев джуни гьамбазаршикIле, командираршикIле гьаIкIена игит хьинне ацIа ворна. Манкъухъад хаIдда гьокуIматни суракен наградабы водунбы.
Гьинчиле сабара вазбына гьихъа мана пенсиейхъа хъигъечIу. ГьаIшде мана СВО ветеран ворна. Къийна манкъун саIнаъат манкъуни духэе Тажудине давамаъа.
Тажудине эскерийвалла быкыравъу, Миноборонайкван контракт одкIун. АIрейнче сабара вахт абкIынийква, мана джуни гьамбазаршиква СВО йаIххъыляу. Къийна джаван эскер деккее илгъевчIуйни йаIххъыле аIл’гьааIс чалышмишехьи ворна. СВО джун гьаIракат ва баджарух гьагван. Тажудинни игитийвалис ва дирибашийвалис джуни гьамбазарше гьаммаше ахтына кьиймат гьооли. Мана Дагъыстанни КьаIгьраманни доюс лайикьра къаджы.
Зы СВО воохьени эскераршикIле гьаIкIен ватанпарварар вобунбыва эйгьи. Манбыше йишди оIлкайн садджу къийнийн йигъ деш, гьамыд геледжагъ гозетяъа. Россиейн эскерар мани фыкырбышиква ешемишоохьен хаIдда сенбы водунбы. МанбышикIле ацIан, джо авхъуна йаIхъ гьаIкIена вобна.
СВО воохьен гыргын эскерар хайбышейхъа сагъба-саламатба хъавалес кьисматаъан. Манбышихъад гьинчиле хъийгъа садджу югун ва шадын йигъбы ихьенбы!
