Ноябрьни 4-че Россияйл’ халкьыни садибни Йигъын байрам алгъавгьуй аIдатеехъа гидхьу. Манчин тезе таарых 2004 сениле гийгъал водун. Ман йигъ оIлкеени динбышди Советни мыIслягьатыква тасдикьау.
Байрамна макьсад Россиейни Федерациейл’ ешемишехьени миллетбышда, джурабаджурайни динбышис ыIбаадат гьаъани халкьбышда садибыйвалла ва манбышин джони арайлин алаакьабы гьалед сых хъауй вухьа.
Россияйни тезе таарыхе ман байрам цIедда кьоIд аазырий хьодъэсди сенни ноябрьни ёкьунче къейд гьаъа гидгъыл. Амма мани байрамыхъад йиссейн таарых водун. 1612 сен Кузьма Минине ва Дмитрий Пожарскийе хаIбвалла гьааъани ополчениейн МоскIав интервент полякаршике аазадавъу. Эле гьаман байрам гьамани гьадисайква алаакьа гьау.
ГьоIкуматни тезе таарыхе Урсиятни халкьын садибын Йигъ 2005 сенни ноябрьни 4-че цIедда Дагъайбни Новгородни шагьаре алгъайгьи гидгъыл. Мани йигъыл’ шагьарни марказе Кузьма Мининыс ва Дмитрий Пожаркийс къабсырна гьайкал гивхьу. Гойне байрамын гьаракат быкырни оIлкайлхъа еймишхьа. Мани йигъыл’ Россиейни Федерациейни гыргынанкъаI халкьбышди арайлин муIгьуббат артмишаъан йигъынджагъбы, маджлисбы, тамашебы, кIансертбы илгъечIи.
Къийнийни йигъыл’ Россияйни халкьына садибыйвалла джувабыхъаб гьалеб хаIбна кьувват вобна. Украинайл’ СВО гидгъылыйн ёкьудъэсын сенодун быкырехьи. Манчина макьсад Донецкни, Луганскни Республикабышее, Херсонни ва Запорожьейни вилаятбышее ешемишоохьен урусар киевни режимыке къорамишавъуй вухьа. ГьаIшде ман торпахбы Россияйни таркибе водунбы. Агар Украинайс Авропайн, АмеркIайн гьар суракен кумаг гьидяъийнхьий, ши йишди мыраадылхъа оIгийл’джаб гьивхьарасынбыний.
ДаIвъий нимее хылийба цIыцIавхьее, вурушбышее гьабатIани эскераршин сайид хаIдхъехьи. Манбышди арайл’ цIаIхни халкьын игитерыб вобунбы. СВО йицIыхьвар дагъыстанны Россияйни КьаIгьраманни доюс лайикьра къаджы. Замаанайн Ватан къорамишааъас манбы сечмишавъу. Манбыше йишин, йишди балабышин ачухын геледжагъ ихьесдиме джон джанбы цIаейхъа гьуво. ГьоIкуматын манбышиле ва манбышди хизанбышиле мугъайитивхьай бордж водун. Мани сардан гьоIкуматын йишди кьаIгьраманаршихъа ва манбышди дёлесынбышихъа нишикенаджаб кеситийвалла девхьайниме гуджнакан гьаракатбы къеджи водунбы.
Гьайни йигъбышее даIвъий явашувхьесын хаIдын умудбыний. Манбы Россияйни Президентни В. Путинни ва АмеркIайни Президентни Д.Трампни Будапештени горушыканий багълыда. Анджах къирагъыле шиш гьааъанбыше манчис имкан гьуво деш. Авропайни оIлкабышис Украина дешодун хъийккан. Манбышис кьувватнана Россия къидевджес вуккан. Няъас увгьее заIъыфын дюнйе идаара гьаъий раIгьатда водун. Джолхъа «дюнйейн гьуIкумдарар» до алятIуйнбышис гьаIшдилхъаме ишлемишехьен къайдабы бадалаъас ыккан деш. Манчини аллаб гыргынанкъаI тIубааъа, ледж адаччи.
Гьел’бетти, «дюнйейни саIгьыбаршиква» барабарна гаф гьавъуйниме шахъад такьат ыккан, артмишехьен экономика ыккан. Манке йишин манбышикван ихтелет джитIан ихьес. Россияйни таарыхе гьинчилед геед дагъамын вахтбы ыхьайнбы. Манчини ыIгьтейнче гьаммаше угъадука хъабыйнбы. ГьаIшдеб хъавалесынбы.
ГьоIкуматна кьувват халкьыни садибыйваликва багълыба. Ши саджигенанкъаI, шас нишикенаджаб къорху дешда. Гьаргьаммаше Россия манчис мыIгькамба вухьа. Гыргынбы гьийгъанче хъооIни байрамука табрикааъа ва югун дилягбы гьеххъа!
