Дюнйейни акьвал’ хаIдда джурабаджура саIнаъатбы водунбы. Манчини аIрайл’ дагъамийвалейхъа гябкIыйни инсанаршис экIда кумаг гьелен, манбышда ыIмыр, мал-девлет гьуваадженбыд кIылда дешодунбы.

Манбы МЧС-ын ишчера вобунбы. Мана пеше сечмишавъуйнбышихъад хаIм-йигъ эйхьен деш. МЧС-ын ишчер гьар вахтал’ инсанаршис кумаг гьелес гьаIзирба воохьи. Мани саIнаъатыс къуллух гьагваанбышда сайир Раджабов АIгьмад Эл’дарна дих ворна.
АIгьмад Раджабов МЧС-ни ташкилатее ишлемишехьен хаIдда сенбы водунбы. Манкъун до ЦIаIхни дерайл’ни Хьойикни хивни цIа кIядхъаъани ташкилатыква багълыда, няъас увгьое манкъвее сувал’ тезе ташкилат къурмишехьенкъаI, хаIбна заIгьмат гьавъу. Манкъве джуни гьамбазаршиква саджигее хиваршее ешемишоохьени инсанаршис хаIдын кумаг гьуво. Манбыше хьулехьей хайбы, йицIабы, сабар медын аваданыйбы цIайике къадихьанау. Джуни дестейква санад АIгьмаде гьагуйни гьаIракатыс, баджарухус инсанарше ахтыйна кьиймат гьуво.
Къийна АI. Раджабов Республикайни МЧС-ни кьомани ташкилатее ишлемишехьи. Мана цIабы кIятхъаъани службайна хаIрна саIнаъаткар ворна. Мани къуллухулхъа хъарыйн хаIдда сенбы дехьейид, манкъве вудже вудж джуни гьабазаршини аIрайл’ югни сураке гьагу. Мана гьар вахтал’ джус гьагуйн тапшырыгъбы быкыраъас гьаIзирра ворна.
Гьайни дёлесвалей АI. Раджабов гьоIкуматни суракени наградайс лайикьра къаджы. Манкъус республикайни МЧС-н министрей Н.М. КазимагьаIммадове ташкилат кьурмишхьайни 30 сениква багълыданан медал гьуво. Манчиле гъайре мана гьамыр таIрифни кагъызес лайикьра къаджы.
АлятIуйни медалыка багълыда ши АI. Раджабовыка алаакьа аххъы. Шаквани ихтилете манкъве увгьой: «МЧС ишлемишхьай зас кьабыл’да водун. Ман гьаIкIедад адамершик аваакIыйн саIнаъат водун. Зы геледжагъылид сечмишауйни ишил’ гьинчилер югра ишлемишхьес чалышмишхьес».
«Нур» кIазетни редакциейн Раджабов АIгьмад Эл’дарна дих алятIуйни медалыквайий благодарственный кагъызеква табрикаъа. Манкъве вуккеккани хайирхагь ишил’ угъурбыйий джанана сагъвалла аIрзааъа!