Гьар сен октябрьни хьончил’ Россиейл’ маъаlллимаршин йигъ алгъайгьен аlдат водун. Маъаlллимийвалла дагъамын ва лазымын санаъаlт водун. Мана пешейс къуллухааъана инсан медынчилхъа джан айгье деш. Манкъуна ыlмыр ушахаршис тербие, ацlаал’ гьувойка багълыба воохьи.

Йишди миллетыхъабыб мани санаъаlтылхъа аlшкь гьагуйн ва гьагван инсанар кlылба дешобунбы. Манбышда гьаарна са ахтыйни доюс лайикьра ворна.
Маъаlллимийвалла гьааъани инсаныхъаб ацlаалиле гъайре, сабыр, раlгьымийвалла, инсафыйвалла вуккан. Манбышди йикlее нагьаlкьийвалла, кубытийвалла, сарсахийвалла мыссаджаб девхьес вуккан. Кар ацlани маъаlллимее ушахаршис гьаммаше югун билиг, тербие гьелес, шыгыртаршис хъодкуда ешайиш ыккейс йаlхъ гьаагвас. Мани саягъылин маъаlллимар Дагъыстанни гьар сурал’ вобунбы.
Ши гьаммаше йишди савадукани, камалукани, абырыквани маъаlллимаршиле гуянмыш вухьа. Манбы шахъаб гьар вахтал’ вухьайнбы. Къийнийни йигъылиб мактаббышее, аали мактаббышее миллетын, республикайн до ахты хъаъан маъаlллимарыб хаlбба растына хъавайли. Манбыше джони ишиква, санаъаlтыс гьаъани кlыл’валика гьалалын къык одхьан водун.
Маъаlллимаршини йигъыл’ ши манбы йикlел’ хъаваляаъа, манбышиква горушмишоохьенбы, шас гьувойни тербиейс, ацlаалис миннатдарийвалла бил’дирааъа.
МагьаIбынбышда сайир Джумаева Зарханум Оруджна йиш ворна. З. Джумаева МагьаIчкъалайни шагьарее №61 йыIкьнекни мактабее чалышмишейхьи. Мана дагъайдни сыныфбышда маъаIллима ворна. МаIнкъей Дербентни шагьарейдын маъаIллимар гьаIзирааъан1999-ъэсди сен колледж быкырау. ГойнеМишлешни хивни йыIкьнекни мактабее ишлемишейхьи гиргъыл’. Зарханум маIъаллимайни увгьойка, мааъар ишлемишейхьенкъаI, закIле са кар ацIахьа – маъаIллимна иш садджу ушахаршис ацIаал’ гьувойджад деш, гьамыд манбышис хъаIдхъее кумаг гьувой водун. Къийнад зы мани усулыква ишлемишейхьена. Ман ушахаршис югун билиг гьелесдимее геед югун методика водун.
З. Джумаевайни джуваббышихъа гора, маъаIллимийвалла гьавъуй джена мураад вухьа. Мактабее хъаIдаххъанкъаI, джехъаб югун ва кар ацIан, джони саIнаъатылхъан аIшкь гьагван хаIбба маъаIллимар вухьа. Манбышда сайир АIбдулла маIъаллим ыхьа. Геледжагъысда пеше сечмишааъанкъаI манкъве джес хаIдын кумаг гьуво.
Са вахтал’ АIбдулла маIъаллиме увгьойний: «Югна маъаIллима йихьесдимее хаIдда хъаIдхъас, гьар вахтал’ дарсейхъа гьаIзирра хъайелес йиккан. Шыгыртаршиква югун алаакьабы къурмишаъас ыккан. Манбышис югун ацIаал’, тербие гьелесдимее шыгыртаршини аIрайл’ хъаIдхъыйлхъан гьавас гуджлемишаъас лазымда. Маныд садджу маъаIллимныйий шыгыртни аIрайл’ доствалла къурмишивхьайле хъийгъа ахаIс».
Зарема Оруджна йиш джени саIнаънатыле геер разийра ворна. Къийнийни йигъыл’ мактаббышее ишлемишоохьени маъаIллимаршихъад хаIдда дагъамийваллабы ыхьейид, маIнкъее зигаара гьааъа деш. МаIнкъей закван ихтелет геед уфтанни ва х маIънайквани джуваббышиква таамау: «Йизда ыIмыр маъаIлливийваликва багълыба. Манчис къуллух гьавъуй йизын бордж водун».
«Нур» кIазетн редакциейн мани саIнаъатыква джона ыIмыр багъламишавъуйн инсанар маIъаллимни йигъни байрамыква табрикааъа. Манбышис джанана сагъвалла ва угъурбы аIрзаъа!