АIбдураIгьман ЫIмаров (УлуцIаIхий) дойиквана цIаIхни миллетна шааир, язычий, тарджумачий ворна. Мана дараджа, гьуIрмат манкъвее джуни инсаныйваликва, ватанпарасыйваликва, одкIунни ва ойкIанни асарбышиква къазаммишавъу.
УлуцIаIхее хьодле китаб : «Суван тIеIт», «Сурак’ авхуна ыIмыр», «КIарын тюльпан», «Йишин шагьидар», «ЧIаIрана папах» къайиккы.
Мани гыргыни китаббышехъа муIгьубни, Ватанни, ыIмрени, йишди миллетни ешайишни, инсанни заIгьматни, гьамбазыйвал’ни гьаIкIеедын асарбы гядкIу водунбы.
Манкъвее одкIунийн сабара шечIбы, хабарбы, меххвар сабара дагъыстанни, кавказни ва хаариджи мизяршилхъа сакIалаъы ва Россиейни ва Къузайл’ни Кавказни адабиятни Антологиебышеехъа эчIу.
ХаIдданан УлуцIаIхийн шечбы «Нур» кIазетее, «Лачын» журналее чапаъы ва манчис кIазет, журнал хъаIдахъаIнбыше, адабиятни гьаваскарарше ва танкьитчерше ахтына кьиймат гьуво. Манкъуни гыргыни асарбышихъаб кIорана маIъна вобна.
АIбдураIгьман ЫIмаровын шечIбы, хабарбы мактабни телябабышис одкIунни китаббышеехъа эчIу.
Дагъыстанни девлет университетни ва Дагъыстанни педагожи университетни телябабыше манкъуни китаббышике курсовой ва дипломный ишбы ойкIан.
Хьебыдле китаб — «Суван тIетI», «Сурак’ авхуна ыIмыр», «КIарын тюльпан» цIаIхни мизел’ кириллицайл одкIун; кьоIдле китабыд : «Йишин шагьидар», «ЧIаIрана папах» латынни хатIыл’ одкIун.
«ЧIаIрана папах» гьайни сенни декабрьни вуза чапыке хъигъечIу. Махъа вудже одкIунийн ва урусни мизеле цIаIхни мизелхъа сакIалаыйн меххвара эчIу. Ман китаб шааире ушахаршис пайис одкIун.
Гыргын китаббы, «Йишин шагьидар» гъайре, УлуцIаIхе джуни харджийбышиква къайиккы. Ман китаббы редактировать ва корректировать «Нур» кIазетни ишчерше кумагаъы.
Ватан , миз, адабият гьуваджес чалышмишехьена ва джан гийххьена УлуцIаIхий ворна. Мысаджар мана «кокси гета» ва «диленджийвалла» гьааъа ийкыр деш. Манкъус китаббы къайиккас кумаг гьаъана ва манкъуни ишис кьиймат лайикьна гьоолена йишди миллетыхъар къуллухчий ва ишкар ыхьа деш. Гьайни фаани дюнйейл’ гыргыни гьаIкIени шааирна, ватанпарасна кьисмат гьаIмагьаб воохьи. Анджах сакар зас эгьес ыккан : « УлуцIаIхе джун до къизлени гьаIрфбышиква цIаIхбышди таарыхе гьадсырыйн. Манкъуни асарбышиква хаIббанани архабыше тербие, билиг, ацIаал’ алетIас. УлуцIаIхий , гъу хъавгьуни адабиятни лампайн иших, инсанаршис хъобкуна йаIхъ гьаагван ихьен! Чодж, ешемишхье !!!»
