Спортуни устадыквана ва Ватан къорамишааъани цIаIхбышди игитикван Саид АIзизовыкван интервью.
— Саид , ассалам аллейкум! Гъу йишди миллетни джаванаршини аIрее йигъни гьаIракатбышиква гьуIрмат къазаммышавъуна джегьил’ хьинне ацIа. Дора йишда гаф йигъни гьаIкIеени ихтелетиква гивгъалас. Няане ва мысане гъу едике ыхьа?
— Аллейкум салам ! Йизди гьаIкIее югун джуваббы увгьойс сагъул!
ЦIеррыйке зы цIаIхийгъалий ворна. Йизда дек’ ЦIаIхеенчена ворна , раIгьматтыгъ едир Миххьейни хивеенчена йихьа.
Едике зы 1992 сенни декабрьни 24-чил’ МаIгьачкъалее ыхьа. Зале гъайре, йишди хизанее са чоджий, са йичи вобунбы. МаIгьчкъалайн йыIкьнекни 12 № мактабее хъаIдхъы ва ман таамаъы. Сагъул зас дарсбы гьувойни маъаIллимаршис етыгъын ацIаал’ ва тербие гьувойс. Манбы гьаммаше югвалис йикIел’хъаляаъа.
— ШакIле ацIан гъу такьатыквана спортсмен ыхьай. Гъу мааъад югун натийджабы гьагу ва чIакIни медалбышис, кубокбышис лайикьра къадже. Манчиква гъу миллетын джад деш, гъу гьазирехьени спортыни утагъыныд, тренераршиныд, республикайныд до ахтыхъаъы. Манчини гьаIкIеедын кIылин маIълумат «Нур» кIазет хъаIдаххъанбышис гьеле….
— Зы спортыква маIшкьулехьи 14 сен быкырхьайнкъаI гиргъыл’. Спортыни оIл’чибышиква, тIабалбышиква сыкIыл’ра зы геджра гиргъыл’. Чалышмишхьана вахтыква авакьарас. Манчихъа гора, зы зале ооъар хааIрра ишлемишхьа. Зы цIерра боевой самбойни секциехъа оIххъа гиргъыл, хъийгъа алликыйни гьичIобкырыйбышилхъа илгъечIу. Йизын тренерар АIбдулманап НурмагьаIммадовий Расул МагьаIммадаIлиев вухьа. Йизда джегьилийвалла манбышди спортни мактабее илгъевчIу. ЦIеддыйн ыIмрен ва спортыкен дарсбы , эгьес эйхьи, мааъад алетIу. Манчиле зы шадехьена ва разийра ворна.
МаIшкьулехьени спортын екунбы, спортсмене гъагуйн ва гьагван натийджабы водунбы. Манбыд гъу няIгьарий гьазирхьа, ва шаваайий гъу гьичIокарас гьазираъы, манчике аIслыда. Вахъад хьуледле профессионал гьичIоркылийне ыхьа ва манчин статистика гьиджон водун?
— Зы 6 профессионал сачабхырийбышее иштырак гьаъы. Мааъар гыргынчее гъамхьана. Манчиле гъайре Садибни гьичIобкурийбыщди баIстбышда Россиейна чемпион ворна, Дагъыстане ва СКФО илгъечIуйни ММА (аликкыйни гьичIобкырыйбышда) чемпион ворна. Джурабаджур Россиейни регионбышее илгъечIуйни боевой самбойна ва хылеббышиква сачаахарни турнирбышда призёр ва гъамхьана ворна. Мани гьагуйни натийджабышиле хъийгъа, зас спортни устадна дараджа гьуво. Манчее хаIбна заIгьмат йизди деккинайий едина, йизди тренераршина, спортни гьамбазаршина вобна. Агар вас югун спортее натийджабы гьагвас ыкканхье, йигъыс вале ооъар ишлемишхьес ыккан. Гуджиле гъайре психологиейд маIгькамын ихьес ыккан. Телесмиш дехьа, атдым- атдымна гьихъа аIл’гьас ыккан.
-Саид, спортын вас гьиджоне гьуво ? Ваке гьаIшдийни джегьилершис гьиджо мислягьаIтбы гьелес аIхайий?
— Ман, йизди увгьойка, югун суалод. Спортын хаIдын кумаг ыIмыр хъобкуба вуккейс гьели. ЦIеддыйке, джегьилершин джолхъан ыIгьтибар гьеххаъа; кьоIдъэс, сабыр хаIдхъаъа, тербие гуджлемишаъа, хаIрункъуна ва кIылинкъуна гьуIрмат авхъас хаIбхъааъа; хьебыдъэс, ишлемишебхьес, нягьаIкьни ишбышин оIги ыIхас, дагъамни ыIмрени вазиятеехъа гябкIыйнкъаI манче адамер хьинне хъигъебчIес; хьодъэс, спортын йигъын психологие, фыкыраммышхьай маIгькамаъа; йихьыдъэс, спортыква маIшкьулехьени инсаныхъаб заалумийвалла ва тахсирдешда инсан гетый, тюкаписяъый эхьи деш, агар мана гьаIкIена спортсмен ыхьее; йигъыдэсыд , спортын йигъын джан утIумаъа; молидъэсыд манчин гъу аIракьийке, пIапIрысыке ва сабара медни нягьаIкьни ишбышике аIкьана хъаъа.
Зас йишди миллетын джаванар гейб вуккан. Манчихъа гора, зы мислягьаIт манбышис гьоолена спортыква гьамбазыйвалла гьааъас. Спортыхъад гьар джура оIюнбы водунбы. Ненкъус нений кьабылехьи, манчиква маIшкьулхье. Мани гыргынчина макьсад, зы ооъад гьувойни мислягьаIтбышее вобна дюгулювхьа.
— Дора ши меб хъаIдхъийлхъа, санаъаIтылхъа, ишилхъа йигъни илгъебчIес. Гъу нени ааIли мактабеене хъаIдхъы? Гьиджо санаъаIтне алетIу? Няане ишлемишехьи гиргъыл’ ?
— Зы Дагъыстанни девлет аграрный университетын экономикайн факультет таамаъы. Йизын санаъаIт бухучет, анализ ва аудит водун.
Университет таамаъыйле хъийгъа, зы судебный приставни къуллыхыл’ ишлемишехьи гиргъыл’. Гьале хъаIддахъанкъаI джар, мани къуллухни командайна уIзвы ыхьа. Джурабаджур спортни баIстбышее манбышди сураке иштыракаъы ва призовой джигабы аххъы. Мааъад зы « Зеленый берет» алетIу. Ман армие гьелени «Краповый беретын» акаран джура водун. Сабара гагьна мааъар ишлемишхьа зы эскереехъа Ватанын бордж хъелес аркIын. Маайиб йизда эскерна къуллух спорт ротее илгъевчIу.
Эскеренче хъары, ДР-ни Росгвардиейни СОБР « Ястреб» ишлемишехьи гиргъыл’. Къийнар мааъар ишлемишехьи ворна. Шахъад ши гьаIллаъан гьоIкуматын ваджибын месалабы водунбы. Ши къеджени ишбышди гьаIкIеедын аIтрафлы маIълумат гьелес шахъад иджааза дешин.
-Саид , къийна гыргынкъуни мизел’ Украине аIлгъааIн СВО водун. Ши гыргынкъвее гозетяъан мана даIвъий таамувхьа, гыргын джегьилер джони хизанбышеехъа сагъба- саламатба сабкIылый. ШакIле ацIан, гъунар хьуленихье элейс мааъар командировке ыхьана. Мааъад шу вушди оIгеехъа гьоIкуматын гиххьыйн месалабы гьаIллаъа водунбы. Гьиджо эгьес аIхайий вакIле манчини гьаIкIее….
— ГьаIкен водун, зы хьуленихье элейс СВО ыхьана. Мааъад ши шалхъа тапширмишаъыйн месалабы гьар элейс гьаIллауйнбы. Ватан укранацистаршике ва хаариджи оIлкабышиле хъабыйни наёмникаршике къорамишааъасдимее, шаке вааIхана иш къооджена. Ман гыргынкъун Ватанни гьийдын бордж водун. ЭскераршикIлед, офицераршикIлед, волонтераршикIлед ман кар ашкарда ацIа водун.
Къийна прогнозбы мысайий мана таамувхьес яраб шавукеджад аIхее. Йигъыс джурабаджур фыкреехъа хъидялесын джад гьаIдисабы аIреехъа эчIи. Мана даянмишивхьай хаIдданани карбышике ва гиххьыйн месалабы гьаIллауйке аIслыба вобна. Анджах шак дешин, ши мааъаб гъамувхьесынбы. Хъобкуйвалла йишди сурал’ вобна. Къийна гьоIкуматна армиеб, силагьын ташкилатбы, джамаъаIт саджиге, са худ хьинне вухьес вуккан. Манке йишди аIрее ледж адчес аIхас деш. Къийна йишди эскерарше, мобилизованныйбыше ва добровольцарше джона иш пIланыква къооджи вобна, душман джуни «куйиле» сыхмишаъы аххъы ворна.
Захъад йишди ведомствайни ва гьоIкуматни сураке гьувойн наградабыд водунбы. Манбы ши душманыле гъамувхьайни йигъыл’ коксийххъа хъаъас.
— Саид, вас йишди суалбышис джаваббы хъувойс сагъул. Йигъни хизаныс джанана сагъвалла , спортее тезе гьалед чIакIын угъурбы, къуллухыл’ саакитыйвалла аIрзуламишааъа.
— «Нур» кIазетысыб хыллийна ыIмыр ва югун-югун макьалебы окIанас кьисматхьенбы. Йишди миллетыс садибыйвалла ва баракат аIрзуламишааъа. ХъооIн Рамандин ХаIдын йигъ баракайда ихьен. Аххъыйн сивар, гьаъыйн кубар, гьелесын фитIрабы Аллагье кьабыляъанбы!
