Октябрьни 1-3-чил’ МагьачIкъалайни шагьаре «Сувал’ни торпахбышин маIгькамда инкишаф гьаъуй» КьоIдъэсын халкьбышди арайлин форум илгъечIес.
- Ман форум СНГ-ни Парламентбышди Ассамблеяйн, РФ-ни Совет Федерациейн, Россиейни ыIлимбышди академиейн, Дагъыстанни Правительствайн ва Россиейни ДжаIмиятбышди палатайн тешкиляъу водон.
Форуме 13 гьоIкуматыле абыйни 300 авабкъырни инсане иштыракаъас ва манбыше мааъад дюнйейни сувабышди торпахбышда вазиятагъмишааъас.
Ман форум няхуIде илгъечIес, маaъад нени суалбышихъае иляакас ва чике гьиджо хайир йишди республикайс ихьес, октябрьни 25-чил’ Дагъыстанни Правительствайни Садрее АIбдулмуслим АIбдулмуслимове РГВК телеканале илгъечIуйни журналистаршиквани горушее агъмишаъу. Гойне манкъве журналистаршди суалбышис джаваббы хъуво.
Мани горушее сабара Форум гьазираъуйни ташкилатбышди нумаендебыше ВКС-а иштыракаъу ва манчини гьаIкIее йишонаваъу, хъийгъа гьувойни суалбышис джаваббы хъуво.
АIбдулмуслим АIбдулмуслимовни увгьойква, гьайни йигъбышее республике илгъечIесын форум Дагъыстанни ХаIрынкъуни Сергей Меликовни къайгъе водон ва ман югда илгъечIуйниме хаIдда ишбы къеджи водонбы. Манкъуни джуваббышихъа гора, сувал’ни форумехъа джурбаджур гьоIкуматбышиле, Россиейни регионбышиле аблесди мигьманаршиле савагьиба форумни сайте 725 инсане иштыракаъасва гардана алятIу водон.
«Форумехъа аблесва джуваб гьувойни гьоIкуматбышди джаргее Азербайджан, Къыргъызстан, Таджикистан, ОIзбекистан, Къазахстан, Эрменистан, Пакистан, Гьиндистан, Иран ва Беларус водонбы. Форуме 20-е гьеххада тадбырбы илгъечIес. Манчини аIрее — джаванаршин форум «Сувабышин сес», туризмын форум, гыргыран истолбы, ишлемишехьени дестебышин ва комиссиебышин иджласбы, пленарный иджласбы, тентенейкван форум ачмишаъуй, маданиятуквана концертна программа, выставкIабы ва ахтыйни дараджайкван горушбы. Абыйн мигьманар Казбековни районехъа, Сулакни каньонехъа ва сабара республикайни сувал’-ни уфтанни джигабышехъа воIххъас», — АI. Абдулмуслимове увгьо.
АI. АIбдулмуслимове форуме алгъагьасын тадбырбы информациейква тешкиляъасди «Аргументы ви факты в Дагестане», «Парламентская газета», «Это Кавказ.ТАСС», «Дагестанская правда», РИА «Дагестан», РГВК «Дагестан», Радио «Страна гор», «Молодежь Дагестана», «Этномедиахолдинг», ЦУР Дагестана ташкилатбышис ташаккурийвалла агъмишавъу.
Гойне манъкве сабара журналистаршди суалбышис джаваббы хъуво. Суалбы форум илгъечIуйни гьаIкIее, манчике гьиджо хайирий республикайс ва форумехъа адыйни гьоIкуматбышис ихьес ва сувабышин инкишаф югда ихьесдимее къейдаъуйн программабы няхуIдий ишлемишхьес ыхьа.
«Мани форумын сувабылин инкишаф югда ыхьайнимее ва ваджибын ишбы къаджесдиме хаIдын кумаг гьелес. Сабара федерални программабышин проектбышин ва ЦIеддыйни форумын тадбырбы назареехъа алятIу водонбы, гойнед Дагъыстанни ХаIрынкъун Сергей Меликовын феьни марказылхъан республикайни сувал’ни районбышин инкишаф югда ыхьайниме гьаъуин мураджиетбы фыкырехъа аххъы водонбы ва мана хаIбна иш вобна. Йишин форум сувал’ни торпагъбышин инкиааф югда ихьесдиме алгъайгьен водон ва шахъад манчике хаIдда гозет’бы водонбы», — АI. Абдулмуслимове увгьо. 
