Къийнийни йыгъыл’ йишди сувал’ни хиваршее саджу Билайнна хаIтI ишлемишоохьи вобна, ахуйнбы дешинбы. Билайн йишди хиваршехъа миллетни доюквани инсане ШаIъбан Кьасымове цIыцIаъу ва маничихъа гора манкъс джамаъатын гьаIшдед алхышбы гьаъа ва сагъулва эйхьи.
Ишыхбы адкIынийнкъаI хиваршее телефон ишлемишоохьи деш, манчихъа гора инсанар лазымни вахтал’санасанкъуква йишонувхьас дагъамийвалла цIыцIаъа.Мани сардан ши гейд одкIунийн ва сабара лазымни джигабышехъа мураджиетбы гьаъуйнбы. Мани сардан зы Дагъыстанни цифровой инкишафни министерствайни хаIрынкъуква Юрий Гьамзатовыка горуш алгъавгьу ва манна масала къалдырмышавъу.
Гьайни йыгъбышее Сувал’ни магьаIлыл Мишлешни хивни кIане Мегафонын станция гиххьи водун. Ман махъа гихьесдиме хаIбна заIгьмат Мишлешни хивни хаIрынкъве Ислам Ибрагьимове гьавъу. Мана мани компаниейни чIакIынбышиква горушмышхьайле хъийгъа иш гьихъа аIлгьа гибгъыл.
Мегафонни компаниейн ишчеер станция къурмишаъа хьодле-йигьыдле йыгъбына ишлемишебхьа ва манбышис мани карее хаIдданан кумаг Мишлешни хивни харынкъве Ислам Ибрагьимове ва хивни джамаъаIтын гьъу.
Мегафонын станция гихьийле хъийгъа йишди хивааршее Билайныле савагьийда Мегафоныб ишлемишувхьесда.
АIхрейни сенбышее йишди хиваршее сабара югын ишбы къеджи воднбы. Ман ишбы югда адкIынийниме хаIбна заIгьмат хиваршди чIакIынбышике аслыда водон. Мишлешни хивна хаIрна Ислам Ибрагьимов махуIбни чIакIынбышда са ворна. Мани хивее манкъве джамаъаIтыква саджигее хаIдда ишбы къаджу ва гьаIшдер чалышмышехьи ворна хивыс цIедын мактаб, футболын стадион, клубыс ремонт гьаъасдимее.
Са-кьоIдле сенна гьихъа манбыше хивни къаршеедын Хейгъва эйгьени джигеехъа трахторуква йаIхъ цIыцIавъу ва ата-бабайн сук, сикIыл’, кIартIоф, ва медын одхьанан тасарруфат эзан джигабы тезелемишаъу ва мааъад лазымын карбы эзасын ишбы къадже водунбы.
Манбыше махъа ишыгъ, хьян цIыцIаъасда мислягьаIт къооджи вобна. Манчиле савагьийда мани хивни джаванарше юххьан гидгъылийква КьыIджал донани сувалхъа, ивийкарна йаIхъ ремонт гьавъу ва махъа ишыгъен диракбы, бадалаъу.
Гойне хивни джаванарше мани сувал’ чобанар аахван хав ремонт гьаъу. Махъа лазымын материал аIмалершиква гьаххъы ва мани хавын даха ва диварбы тезелемишаъу.
Манбышди увгьойква, ман чобанаршин хав аляъуйле хъийгъа ремонт гьаъу дешдий ва мумкум вобний манчин диварбы отIкIул авур инсан ахвас. ГьаIшде мааъаб сувалхъа кокаъас хъыкийн малбишкан чобанаршис гёгъийке, кулякыке ва шейике къорху дешда.
Мишлешни джаIмаъатын садджу къышлагъбышее джад деш хивни аIредын ишбы къаджесын имааджийбыд гьаъанбы. Манбыше Султан шейх — Эмирни зияратын даха краскIаламишаъу ва ман уфтан хъау.
Хивее къеджени ишбышин хаIддананбы хивни администрациейна хааIрна Ислам Ибрагьимове тешкиляъа ва мани ишее манкъус хивни джаванарше хаIдын кумаг гьели водун.
Гьелбетти манбыше ман ишбы хивни агъсаххъаларшика мислягьаIт гьавъу гьаъа водонбы, ва манбышин сабарабы мани ишбышис къошилмишеебахьенбы.
Гьар хивын ярашугъ джаIмаъат, манбышин мигьманар къаршыламишавъуй, уфтанын хайбы, темизин кучебы ва хааIрна — кIынна ацIахай водон. Ман гыргын карбы Мишлешни хивее водонбы.
