Сабара вазбышиле Украине СВО аIлгъаан ёкьудле сен быкырхьес. Мани вахтни аIрее дюнйейл’ хаIдда карбы бадалхьа, хаIдда дюгленын карбы акьвалхъа ашкархьа. ДаIвъийн хыл’ гьаммаше писин, зияныкван, нягьаIкьын ыхьа. Анджах гьалед хаIдни зиянбышекейий, дагъамийвал’бышике къорамишивхьесдимее хылехъа ярах алеетIас гехьа.
ОIтмышхьайни асырбышее хаIдда даIвъийбы ыхьайнбы. Гьаарни даIвъийн оIлкабышди аIреедын сергьатбы бадалаъы. Сассабы дагъылмишхьайнбы, сассабы тезеда къурмишхьа. Гьаарни даIвъийхъаб чина сабаб вухьа. Гыргыни даIвъийбыше дюнйелхъа мысвалла, мыкIаалла, хаджалатбы, нагъбы ва эб абы. Гьар элейсыб манчин дюнйейле эн югун джегьилера вукку.
Украинее аIлгъаани СВО метлеб цIеббыйке джаб вухьана мааъад ешемишехьен урусаршин миллет, джона миз укранацистаршике къорамишаъый. ЦIебба чалышмишивхьайнбы ман ишбы мислягьаIтыква къаджей, анджах укранацистар Авропайни ва Америкайни гьаIракатбышиква мислягьаIтеехъа хъидябыйнбы. Россия маджбырба вухьа Украинайни машрыкьыл’ ешемишоохьен урусни мизел’ йишонааъан джон чоджар ярахыква къорамишааъас ва манбышин ихтиярбы гьуваджес.
СВО гидгъылни сабара вахтале Донецкни ва Луганскни республикабышее ва Херсонни ва Запорожьейни вилаетбышил’ референдумбы илгъечIу. Джони гьавасыква манбы Россиейни таркибеехъа илгъечIу. Россиейна сергьат хылливалилхъа цIыцIавхьа. Ман субъектбы къорамишаъасдиме укранацистаршике ва авропайнийий , амеркайни наемникаршике йишин къошинбы махъа эчIу. Эскераршис кумаг гьелесдимее , 2022 сенни цывылихъа йишди гьоIкуматыл’ кIылин мобилицацие ыхьа. Ватанын ихтиярбы кьорамишаъас махъа джегьилер хъобтIул. Манбышиле гъайре, СВО иштыракаъас джони гьавасыква вуIххъанбыб кIылба деш вухьа.
Джаванаршина игитийвалла хизан, оIлка дагъамийвалеенанкъаI ваацIохьи.
Йишин цIаIхбы мани карее гьаммаше джан гийхьен ва джомардынбы вухьа. Къийна йишди кIыл’ни миллетыке СВО 200 агъаллана джегьил’ ворна. Гьел’бедти, мааъаб джан ватаныс гьувойнбыб , батмишивхьайнбы вобунбы. Йишди нениджад джегьиле миллетын до бейабыраъы деш. Командирарше гьийб гивхьуна месала манбыше игитершехьинне быкыравъуна.
Йишди джегьилершини гьаIкIеедын макьалебы «Нур» кIазете гьеленбы. Ши чалышмишоохьенбы манбышиква хъызаахас, манбышин дагъамийвал’бы ацIахьес. Гьаарна йишди миллетна джегьил’ чечнайсын китаб окIанас лайикьра ворна.
Манчиле гъайре, СВО-че отпускеехъа хъабыйн йишин джегьилер горушис «Нур» кIазетеехъа хъоотIал. МаIгьдын са горуш оIт’мишхьайни уIл’джумее мобилизациейква аркIынни АIлий Сулеймановыква ва джуни гьавасыква (доброволецна) аркIынни Азан АIшураIлиевыква илгъечIу. КьоIйирсана джегьил’ са хивеенченбы (ЦIаIхеенченбы), са частил’ ва са войскабышее вобунбы. Эгьес эйхьи , манбы СВО гидгъылни сенике мааъаб укранацистаршиква ва хаариджи наёмникаршиква вурушмишоохьи вобунбы. Манбы даIвъийни цIайикеб, хьинекеб илгъебчIуйнбы. Хьуленихье элейс манбы гьоIкуматни, республикайни орденбышис ва медальбышис лайикьавъу. Мани игитершини гьаIкIее ши оIт’мишхьайни кIазетни нумрабышее одкIунийн ва телеверлишбышее манбышди гьаIкIеедын маIълумат гьагуйн.
Гьайни элесын манбышикван горуш йишди кIазетни мухбирее Рамил’ АIбдуллаеве редакциейни горушбы, иджласбы илгъечIени утагъее тешкилаъы.
АIлий Сулейманов отпускеехъа хъары, Азан АIшураIлиев джуна дек’ АIшур Шафийна дих раIгьаматтыхъа аркIынва, мана доъаIйс къайиккы хъары. Вахт девхьейиб, манбы йишди хатирес хъидёотIу, редакциехъа абыйнбы. Эскерар саламыква кIазетни хааIрни редакторе Байрам АIбдуллаеве ва редакциейни ишчерше къаршламишавъу. Мана маджлис Б. АIбдуллаеве вукку. Гойне абыйни мигьманарше журналистаршис фронтеена вазият юшенавъу. Манбышди увгьойква, джо тезе торпахбы, хивар, шагьарбы душманаршике темизяъа гьихъа аIлгьаа вобунбы. Гьел’бедти, дагъамын месалабы гьийд гьаIллаъасын ыхьейид , йишин гьаIракатбы манбышике даянмишаъас аIхас деш. Ман карыд дюнйейкIле къеджи водун. Ши хъобкуни йаIххъыл’ вобунбы. Командираршин амурбы нишихъаджаб ил’дяакы, ши вурушбышее гьаIллаъа водунбы. Камандираршинаб, йишдаб метлеб укранацистар гьаIлакавъуй вобна, гъамувхьа дюнйел’ тезе суIлгь къурмишаъый. Ман суIлгьыд маIгькамын ихьес ыккан. Йишин ушахар селлимни, къорху дешди гьоIкуматыл’ ешемишивхьес вуккан.
Хъийгъа манбыше нягьаIдый мебни цIаIхбышди джегьилершиква СВО алаакьабы гьуваджи хабарбы гьаъы, нягьаIдый сана-санкъус хыл’ авхъааххъа.
Горушни аIхрее Б. Абдуллаеве кIазетни редакциейни, ДжамаъаIтни палатайни , цIаIхбышди джегьилершини ташкилатни, Рутул районеени цIаIхбышди ветеранаршини ташкилтни дойиле Азанысий АIлийс грамотабы гьувы.
Рамил’ АIбдуллаеве горушеехъа абыйни мигьманаршисахъа фронтеехъа саъыйн басиркIа хъувы. Ман йишди миллетни гьаIракатыквани ва хыл’ачухни джегьилерше саъы. Гойне едигарыс шикыл’бы саджигеедын цIыцIаъы.
Манчиле хъийгъа СВО-хъа аIлгьаани джегьилершис джанана сагъвалла ва сагъба- саламатба нацистаршиле гъамувхьа хизанбышеехъа хъавалесын дилягбы, аIрзубы гьеххъы.
