Ши, «Нур» кIазетын журналистар, гьар къеккани кIазетни нумрее чалышмишоохьенбы СВО иштыракаъани цIаIхбышди игитершини гьаIкIее окIанас ва манбышин гьаIракатбы, гьунарбы ва дагъамийвал’бы гьагвас. Анджах, шахъаб гыргынкъу-ни гьаIкIеена хабар девхьайхъа гора, сабаранбышилхъа фыкыр гьидёву аахва. Ман йишин тахсир дешодун. Манбышди гьаIкIеена информацие хивни администрациейн, мактабни дирекциейн, эскераршини гогьарбыше гьевлес вуккан. Йишдимее гыргына цIаIхбышда джегьил’ гранра ва барабарра ворна. Гыргынбы манбы Ватан къорамишааъан игитера вобунбы.

Февральни 28-чил’ Гыл’мецIни йыIкьнекни мактабее маъаIл­лимаршин, шигыртаршин СВО-че отпускыс хъарыйни эскерыкван Исрафилов Умахан Манафни дихыкван горуш илгъечIу. Мана саламыква къарышламишаъан чыхышбы мактабни организаторе А.А. Мирзоеве, военруке А. Б. Давудове, хааIрни вожатыйе А. Э. Рамазанове гьаы. Манбыше СВО иштыракаъани йишди джегьилершис ахтына кьиймат гьувы ва манбышди игитийвалиле гуянмишоохьенбыва увгьы. Манбыше горуше мебын Гыл’мецIни хивын джегьилерыб агъмишавъу.
Гойне ушахаршиква, маъаIл­лимаршиква гаф Умахане гьавъу. Манкъвее хабар джуни эскерни йаIххъыни гьаIкIее гьавъу. Нягьарый вудж СВО-хъа гирхьы. Манкъвее джуни командираршини, эскер-гьамбазаршини игит’ гьаIракатбышди гьаIкIеедын гафбы гьаъа. Умаханни увгьойква, гьаIшде фронтеедын гъамувхьайбы джони сурак’ водунбы. Яваявашба укранацистар дагъылмишааъа вобунбы. Хаариджийле хъооIн манбышисын ярахыд, техниквад къитIокIалаъа водун. АIхреени вахтал’ хаIбба ВСУ эскерар есирна алебтIу. Манбыше джон джигабы гьассыр гьейбхынбы. Манбышди аIрее менни оIлкабышин наёмникарыб кIылба дешобунбы. Анджах, шакIле ацIан ши нишихъа горайий вурушмишоохьи. Ши саакитба ешемишоохьени, азгъуныйвалла гьидяаъани инсарашис хъоотIа деш. Манбышис ши лазымдахьее кумагыд гьаъан. Манбышин шалхъан майилид къеджен.
Гойне манкъвее мактабни маъаIллимаршис, ушахаршис джанана сагъвалла, хъаIдхъее югун гьаIракатбы аIрзуламишаы. Джуни чыхышни аIхрее увгьойн: «Шакдена, ши гъамувхьесынбы! Хъобкувалла йишди сурак’ вобна!»
АIхрее мактабни маъаIллимаршейий ушахарше Умаханыкван шикыл’бы едигарыс цIыцIаы.