Эскерийвалин бордж хъувой, ватан къорамышавъуй гьар адамийн бордж водун. Сабара вахтыле ёкудле сен быкырейхьи Россиейн Украине СВО алгъайгьен. Мани вурушбышее йишди эскерарше игитийвалла гьаагва вобна. Мааъаб къийна медни миллетбышди джегьилершиква саджигее цIаIхбышин джегьилераб кIылба дешобунбы. Йишин миллет сайис кIылда ыхьейид, амма мебынбышихъа иляаканкъаI СВО-йин иштыракчер шахъаб сайис сикыI хаIбба вобунбы. Манбы махъа контракт одкIун, мобилизациейква, ва джони хагьишыква абкIын. Манбышди игитийвал’ни, кьаIгьраманийвал’ни гьаIкIее одкIуний йишин бордж водун.
Манбышин хаIббананбы гьоIкуматни орденбышис, медалбышис лайикьавъу. Анджах джони аIрее Ватаныс джан гьувойнбыб вобунбы. Манбы миллетни фыкреенче, йикIбышеенче мысаджаб ааIс деш.
Къийнийна йизда гаф миллетна игит эскер АIлиев ШуаIй Максимни духайни гьаIкIее вобна.
Мана Дагъыстанни Къызларни шагьарее 1998-ъэсди сен едике ыхьа ва мани шагьарее мактаб таамаъу. Амма манкъуна кок Рутул районни МиххьегIни хивейнче вобна.
Мактаб таамаъуйле хъийгъа, ШуаIй 2018-ъэсди сен Саратовни шагьарее дохтурийвалин колледж таамаъу ва силибышди техникын санаъаIт алятIу. Гойне манкъус Севастопольни шагьарее Черномоский флотни военный госпитале ишлемишхьес ыккыйкын. Амма военный билет дехьайхъа гора, манкъус кьоIни сенийсын контракт окIанас теклиф гьаъу. Хъийгъа контракт быкырхьаме, мани госпиталеехъа силибышда дохтурна аляртIасва гарданахъа алятIу. Амма са сеныле СВО гидгъыл ва ШуаIй контрактыква асасан Черноморский флотни дерйагьни пехоте къулухааъани джигейнче Украине аIл’гьаани вурушбышехъа аркIын. Мана СВО гидгъылыйле хъийгъа маа ворна ва джун позывной «Зубник» (Силичий) водун.
Къийна кIынна лейтенант ШуаIй АIлиев мааъар гьуIджумни пехотайни взводна командир ворна. Донбассни джурабаджур сент’бышее вурушмишхьа ва мааъар мана кьоIни элейс яраламышхьана. Госпитале ярабы сагъалмишаъуйле хъийгъа, мер вурушмишхьес аркIын. Къийна мана Курский вилаете душманыке къорамышаъа водон. СВО-е къаджейни игитийвалихъа гора, манкъус командираршди ва гьоIкумматни сураке мукафатбы ва наградабы гьуво. Масалан, Россиейни Президентни Указыква мана «За отвагу» медалыс лайикьра къаджы. Манчиле савагьийда манкъухъад медын наградабыд водунбы.
Къийна ШуаIй АIлиев ва гыргын йишин эскерар джон баба-дидерхьинне нацистаршиква ва фашистаршиква вурушмышебахьи вобунбы. Масалан манкъуна баба-дидей АIбдурагьман Кьасымов ХаIбни Ватанни даIвъийна иштыракчий ыхьа ва джааъар батмышхьанахьинне ацIа ыхьа. Амма ШуаIйни деккее Максим АIлиеве джуни дидейна някьв тIабалавъуна. Мана Калужский вилаетыл’ мебни даIвъэй гьабтIуйни эскераршиква са нюкьнее (братская могила) бастураъу ворна. Гьар сен 9-ъэсди майил Максим джуни дидейни нюкьнелхъа зияратаъас гьайкIанна.
ИншаАллагь ШуаIй ва гыргын йишин эскерар джон баба-дидерхьинее къамувхьа душманыле сагъба-саламатба хайбышейхъа хъавалесынбы ва ши манбы уфтанба, тентенейква къаршыламишааъасынбы. Аамин!
