Июнни 22-чил’ Дагъыстанни марказее, Достваллайни Хааъад хаIдын иджлас « СВО иштыракчера — йишди замаанайн кьаIгьраманар» илгъечIу. Мани иджласее республикайни хаIрункъвее Сергей Меликове иштыракаъы ва хаIдын чыхышаъы.
Форум илгъечIессе сабара йигъбына гьихъа «Память гор» регионни джамаъаIтни ташкилатни регьбере ва фондыни директоре МаIгьач Шамилове умуд гьувы, мани иджласын СВО-ни иштыракчершис ва джони хизанбышис кумагаъасын гьаIракат гьелес. Эле мани хаIдни иджласе иляккан аIсас суал гьаманчини гьаIкIеедын ыхьа.
Джуни чыхышее С. Меликовее увгьойн : « Къийна СВО иштыракаъан эскерар, офицерар , контрактникар, добровольцар маIгькамын хасиятбынан, утIумни рыIгьыкван, Ватаныхъа джан гёдхьанан игитер вобунбы. Гьар асырбышее йишди оIлкайхъаб маIгьбын ватанпарасар вухьайнбы . Къийна энки вааджибна ва лазымна гьоIкуматыл’на иш — ши СВО гъамувхьай ва мааъад иштыракаъани эскераршис ва джони хизанбышис кумаг гьувой, хыл’авхъуй, манбышди балее авхъуй вобна. Гыргын ши гьаIллаъан суалбы, гьаъан ишбы, гьаман кар фыкрее аххъы гьаъас. Халкьыни иджласылхъани Къахувые, нягьаIдый манбышис ва джони хизанбышис кумаг гьелес, зы манчини гьаIкее хаIдын маIълумат гьувы…»
Сергей Меликове сабыйнбышис йикIелхъаляъы, шацыйни сенни июнни вузаке РФ-ни Президентыни мислягьаIтыква ачмишаъыйни фондын «Защитники отечества» филиал республике ишлемишехьи водун.
Республикайни регьбере хаIбна кьиймат республике ишлемишехьени хайирхагь фондбышис «Инсан», «Надежда», «Чистое сердце» ва медынчис гьувы.
« Сагъул, йишди республике ешемишоохьени раIгьымнани инсанаршис. Манбыше вахтале — вахталхъа СВО аIлгъаани джигабышеехъа эскераршис ва мааъаб ешемишоохьени инсанаршис гуманитарный кумаг оIтираъа. Зы республике ешемишоохьени ва йыыIкьале хъооIни джегьил’ гадебышиле, ичершиле разийра ворна ва гуянмишехьена. Шадехьена мактаббышее хъаIдаххъани шигыртаршини гьаIракатбышиле, манбыше ойкIанни эскераршилхъа кагъызбышиле ва оIтираъани басиркIабышиле. Маныд югни тербиейн лышанга водун. ШакIле къеджен нени гьаIракатбышиквайий батальон «Каспий» ва медни военный подразделениебышис кумаг йаIххъыляъа. ВаIшбышиква кумагыкван машинбышин караванбы оIтираъы.
СВО иштыракаъани ва раIгьматыхха абкIынни эскераршини хизанбышис писихолог ва медын кумагбы фондын «Мы вместе» гьаъа водунбы. Мани фонде эскераршин едяар, сипIырер, хьунащер вобунбы. Джони ыкIарыхъа, хаджалатыхъа, хунызыхъа ил’дяакы, манбы гьаммаше эскерар къорамишааъас, йикI’бы гьелес ва мыга къабчес гьазирба вобунбы,- С. Меликове увгьы. Манчиле гъайре, республикайни регьбере гьиджо ихтиярбыйи ва нен льготбыйий гядакIва эскераршис ва джони хизанбышис увгьо ва манчини гьаIкIее социал ташкилатбышис тапширыгъбы гьувы. Манчини гьаIкIее манкъвее диххъатукван ихтелет’ гьаъы ва амырбы гьувы.
Мани иджласее сабыйнбышди гьийр СВО иштыракаъан, отпускеехъа хъабыйн, яраламишивхьа маалиджебы гьаъан эскерар ющенавъу. Манбыше фронтеена вазият увгьо ва нишихъа горайий джо укранацистаршикван вурушбы ыккекка увгьо.
Иджласее къирагъыл’ни регионбышеенче, федерал джамаъаIт ташкилатбышеенче абыйни эл’черше, офицерарше, депутатарше марахыкван чыхышбы гьаъы. Манбыше Дагъыстанче СВО-хъа гьабкIынни джегьилершис хаIбна кьиймат гьувы. Манбышди увгьойква , дагъыстанлыбыше мысаджар джуна гьамбаз балее гьайсар деш, душманыле ул’ савайкьан деш, гьенки дагъамни вурушбышеехъа джо икебачIи. Манбышди джанее къорху дешда, манчихъа гора чIакIни гьоIкуматни медалбышис, орденбышис , кьаIгьраманни къизлени хаIнейс лайикьааъа.
Конференцие « СВО иштыракчера — йишди заманайн кьаIгьраманар» Рутулни районеенче адыйни делегациейныд иштыракаъы. Махъа районна хааIрна Давуд Сулейманов, СВО-на иштыракчий Ренат Демиров, СВО раIгьаматыххъа аркIынни эскерна АIбдул- Маджит ЫIсмаиловна дек’ Гьамзат ЫIсмаилов, СВО раIгьаматыххъа аркIынни эскерна МаIгьаммад Садрановна ед’ Перихан Садранова, СВО раIгьаматыххъа аркIынни эскерна Арсен МагьаIммадона ед’ Эл’мира МаIгьаммадова, Рутул районни УСЗН директор Амур МагьаIммадраIгьимов , Рутулни, Ахтыни, Дохъузпарайни районбышеени фонд «Защитники Отечества» координатор Лейсан АIбдуллаева абы.
Конференциее медын суалбыд иляккыйнбы. Гыргынбы мислягьаIтеехъа хъабыйнбы мана вуккеккана иш гьалеб гьаIракатеехъа абчIес. Республикайни хаIрункъвее гыргыни гьаIбтIуйни эскераршини деккяршис, едяаршис башсалыгъийвалла гьувы ва гьабтIуйнбышилхъа раIгьмат къахувы.
