Декабрьни 15-чил ДР-ни маIълуматни ва чапни Агентствее СВО зонэй ишлемишоохьени журналистаршис гьелесди регионал кумагбышис къадсырыйн горуш илгъечIу.

Мани горушее Агентствайни регьбере Арсен Юсупове, ДР-ни ХаIрынкъуни пресс-къуллухни къуллухчийе Амина УIмаровае, «ЦIеббыйни канални» мухбире ГьуIсейн ГьуIсейнове ва оператор Фарид Муслимове иштыракау. ЙикIел’хъаляъанки, канални цIыцIаъани дестейн хусуси ярахни даIвъийни цIеддыйни йигъыле мааъаб гьаракатукана иш къооджи вобна. Мани сардан манбыше телетамашечийершис дагъыстанны игитершини аллан хил’дже сюжетбы гьагу.
Арсен Юсупове къейд гьаийнки, декабрьни 15-чил Россиейл’ джони саIнаъатын бордж ерина етирмишаъанкъаI гябтIуйн журналистар йикIел’хъаваляаъа. Гойне манкъве журналистаршис военный мухбираршис гьелесди кумагбышин проект тагдимау. Ман кьабыляъас лазымдава джун фыкырбы Сергей Меликовукани ачухни эфире НТВ-ни военный мухбире УIмар МаIгьаммадове агъмишау. ГьаIшде мана ишиква алаакьани командировкее, СВО-ни аIл’гъаани зонэй ишлемишехьи ворна.
Иляакани тадбырбышди аIрее гьам пылыкван кумаг, гьамыд льготбы ыхьа. ДаIвъий аIл’гъаани джигабышэй ишлемишоохьени мухбираршихъаб гьоIкуматын хыл’ авхъасдава умуд вухьес вуккан.
Иджласни иштыракчерше льготбышди гьаIкIеени къайдейхъа сабара бадалыйваллабы адчу.