МагьаIгьачкъале, Достыйвал’ни хааъад къийна терроризмайс эксинани форумна иш гибгъыл. Ман октябрьни йицIыссанчилхъамее йишди республикее цIыцIахьес.

Форум ДР-ни миллетни сиясатни ва динбышди ишбышди министерствайн къурмишаъы вам ман кьоIни республикайни шагьарбышее – МагьаIчкъалэйий Дербент илгъечIес. Форумни ишее иштыракаъас молидваIшилхъа аваркьыл’на инсан ары. Манбышин хаIббананбы джегьилер вобунбы. Терроризмайс эксина къадсырни форумеехъа экстремизмайква эксина иш, мубариза вуккеккан экспертбы, СВО иштракчера, динбышин эл’чера, джамаъаIтчер-активистар, джегьилершини ташкилатбышин эл’чера, ыIлимбышиква маIшкьулоохьен джегьилер, журналистар абы.
Къийна Достыйвалин хав, форумеехъа абыйни инсанаршиква гяцIыйий. Бинаани адни майдама СВО-ни эскераршин шикыл’быйий ыIхы ва истолбышилхъа тамашейс БПЛА-бы ва эскерын ярахый гёку.
Форумна иш Россияйни гимныква гибгъыл. ДР-ни правительствайни хаIрункъуни маIъвыне Рамазан ДжаIфарове абыйн мигьманар саламыква къаршламишавъуйле хъийгъа, форумна метлеб ва гьийд гиххьыйн суалбы къалхымишаъы. Республике гьиджо иший экстремизмайква ва терроризмайква вуккеккава увгьо. Хъийгъа манкъвее СВО-ни гьаIкIеена гаф гьавъу ва мааъад иштыракаъан игитер йикIел’хъавалявъу.
Форумни пленарный иджласее Маск1авни Патриархни экспертни советни садрее Иеромонах Григорие, Дагъыстанни муфтийни маIъвыне, федерал каналбышди военный мухбирарше, стратегик ишбы ыккеккани марказбышди чIакIынбыше,аали мактаббышди ааIлимарше терроризмайква ва экстремизмайква багълыданан чыхышбы гьаъы. Манбыше манчина кок, таарых, гьелен зиян гьагу ва нягьI1бий манчиква мубариза вуккейс увгьо.
Хъийгъа форумеехъа абыйн мигьманар ДР-ни МВД-ни гьийбни гьаIйкалылхъа тIетI’бы гиххьес гьабкIын ва хаIйбышеехъа джагваран шарбы къайиккы.
ЙыIкьыгьлийле хъийгъа абыйн эспертбы секциебышилхъа битIалувхьа. Манбыше мааъад абыйни инсанаршис лекциебы хъаIдхъы, мислягьа1тбы гьувы, нягьаIдый профилактиква республике экстремизмайквайий терроризмайка ыккейс.
Форумын екунбы манчина иш таамувхьайле хъийгъа гьелес.