Гыргынанкъа1 хьинне сентябрьни санчил’ цIаIхбышди мактаббышейид тезе хъаIдхъыйн сен гидгъыл. Гьайни сенид манчис къадсырыйн тадбырбы хаIдни тентенейква илгъечIу. Рутул районни хъаIдхъыйни управлениейн гьувойни маIълуматхъа гора, ушахар 2023-2024-ъэсди сенбышис хъаIдхъас хъавалессе гьихъа, мактаббышее югун гьаIзирийвалла вуккуна.
АIхырейни сенбышее Россиейл’ ушахаршини хъаIдхъыйс хаIбна фыкыр гьооли вобна. Манчика багълыда тезе йыIкьнекин мактаббы, манбышда сагъаламийвалла гьувааджесдимее джурабаджура идманын майдамбы аахъа. Мани сардан Дагъыстанейид хаIдда ишбы къаджы водунбы. Гьар сен ушахарше югун ацIаал’ алятIасдимее тезе мактаббы аляу истифадейхъа хъели водунбы.
Тезе хъаIдхъыйни сенис гьаIзирауйн тадбырбы цIаIхбышди гыргыни мактаббышее илгъечIуйнбы. Манбы линейкайка гидгъыл. АIдат гьуваджы, мактабни магьаIллейхъа сабыйн ушахар директорарше, манбышис геледжагъыл’ ацIаал’ гьелесди маIъаллимарше табрик гьавъу. Манбышис угъурбы аIрзау. Тезеба сифтыйни сыныфбышейхъа хъабыйнбы джос дарсыбы гьелесди маIъаллимаршиква таныщавъу.
Мишлешни хивын йыIкьнекин мактаб ЦIаIхни дерайл’ хаIдын водун. Гьийдни сенбышее мактабейхъа хъавайлени ушахаршин сай къийнийхъа иляаканкъаI хаIддынний. Мактабе ишлемишоохьени ешли маIъаллимаршини увгьойка, манке гьар сен цIеддыйни сыныфейхъа хьебцIал’-ёкьцIал’ ушахный тезера хъарайли. ГьаIшде ушахаршин сай йицIни элес кIыл’ хъыхьа. Мактабна директор Арсен маIъаллимни увгьойка, гьайни сен цIеддыйни сыныфейхъа хьойре ушахар хъабы. Сениле-сенилхъа сифтыйни сыныфбышейхъа хъавайлени ушахаршин сай садджу Мишлешни хивейджад деш, ЦIаIхыйни дерайл’ни гыргыни мактаббышее растына хъайли водун. Масалан, тезе хъадхъыйни сен 1 ушах Муслагъни хивни йыIкьнекни, 3 ушахыд Гыл’мецIни хивни йыIкьнекни мактаббышейхъа хъады. Мусалагъни хивни мактабна директор Мустафа МагьаIррамове, гьаIшде мактабейхъа хъавайлени ушахаршин сай кIыл’ хъыхьай, хиваршее джаванар идявхыйке къеджи: «Хиваршее водун йыIкьнекин мактаббы саджу къырагъыле ушахар хъабыйка гьуваджес ахаIс. Хиваршейнче шагьарейхъа кочмишувхьа абкIыйнийбыше, джон ушахар хъаIдхъасдимее хиваршейхъа оIтирааъас вуккан» , — М. МагьаIррамове эйгьи.
Гьайни сен дагъамна вазият ЦIаIхни, МиххьегIни ва Хьойикни мактаббышее яранмишувхьа. Добы агъмишауйни мактаббышихъад цIеддыйн сыныфбы дешинбы. МиххьегIни хивейни йыIкьнекни мактабе къийнийни йигъыл’ са шыгыртын ацIаал’ алятIа. ЦIаIхни хивни мактабыхъадыд 2-3 сыныфбы аху. Маабыб кьоIни-хьебни шыгыртын хъаIдаххъа. Хьойикни хивни дагъайдни сыныфбышди мактабна директор Эфенди Бабаеве заквани ихтелете увгьойн: « Къийна мактабыхъад кьоIдле сыныф водун. Ушахаршина кьоIйре хьебыдъэсди сыныфее, сайир ёкьудъэсди сыныфбышее вобунбы. гьайни сен мактабыхъад цIеддыйн сыныф ыхьа деш».
ДжинаIгъни хивни мактабыс гьайни сен геед уфтанын капремонтбы ыккы. Манчин адын-къадын джигабы абрелхъа адчы. Мактабыс тезе мебел’ хъады. Ушахар гьуваагасдимее спортын майдам адчы. Гьайни сен сифтаба мактабейхъа 4 ушах хъары.
Къийнийни йигъыл’ Рутул районни Бабаюртни зонайл’ хьебыдле цIаIхбышин мактаббы ишлемишехьи водунбы. Манбы Калел’ни, Тезе Муслагъни, Камбулатни хиваршейдын мактаббы водунбы. Камбулатни хивни мактабее аварбышика саджигее цIаIхбышед ацIаал’ алятIан. Манбы муIхаIхбышин ушахар вобунбы.
Алид добы агъмишауйни мактаббышда вазият сувал’ни мактаббышихъа иляаканкъаI писба дешда. ЦIеддыйни сентябрыл’ мактаббышейхъа хъабыйн ушахаршин сай нимеехье агъаллада ыхьа. Масалан, къийнийни йигъыл’ Калел’ни хивни йыIкьнекни мактабе 109 шыгыртын хъаIдаххъа водун. Манбышди аIрайл’ 9 ушах гьайни сен тезеба мактабейхъа хъабыйнбы вобунбы. Тезе Муслагъни хивни мактабе 93 ушахын хъаIддаххъа. Гьайни сен цIеддыйни сентябрыл’ тезеба 9 ушахар хъабы. Камбулатни хивее ишлемишехьен мактаб, махъа ацIаал’ алятIас хъавайлени ушахаршини сай энки хаIдын водун.
Мактаббышихъад мани сардан водни дагъамийвал’бышихъа ил’дяакы, манбы ишлемишехьи водунбы. Манбыше гьуIкуматни сураке хъаIдхъыйни программе гьагуйн гыргын дарсыбы чини къайдайл’ ыккеккнанбы. Мактаббышее ишлемишоохьен маъаIллимар йикIдена хъоохьи деш. Манбыше джохъад водун билиг ушахаршис гьихьараъасдимее хаIбна иш вуккекка. Йигъыс дарсыбышейхъа гьаIзирба хъавайли. Ушахарыб мани саягъыл’ вухьес хъоотIал.
Гьалекийс тезе хъаIдхъыйн сен цIаIхбышди мактаббышее гидгъылыйн. «Нур» кIазетни редакциейн тезе хъа1дхъыйни сениква шыгыртар, манбышис ацIаал’ гьелен маъаIллимар йикIейнче табрикааъа. Манбышис хъаIдхъее угъурбы аIрзаъа!
