ХаIбна Ватанна даIвъий таамувхьайн 80 сен быкырхьа, анджах манчин гьувойни ярабышин уцIур асырбына цIыцIахьесын. ДаIвъийн баляа, кIаарна хабар итдябыйн, зиян гьидёвойн хав гьассыр деш. Манчин кIаарын хыл’ гыргыни цIаIхбышди юрдылид гьаIррамишауйн. Мани баляан хаIдданани хайбышеедын ишыгъ кIядхъаы. ДаIвъийенче къарахабар хъидябына хизан шахъаб авху деш.
Сувани маIгьалыле, АIранеенче Ватан душманыке къорамишааъас аазырбышиква энки уфтанын, кьуватыкван, сагъын джанан цIаIхбышин игит’ джегьилер абкIын. Манбышин хаIббананбы даIвъийе батмишивхьа. Сабарабы ичкIыры дена абкIын. Къийнад манбы гябтlуйн ва бастуравъуйн джига ацlа дешодун. Мани даIвъийн хьулейре инвалидне, хьулейре етимне, хьулейре сипlырийне гьавъу, садджу АллагьыкIле ацIа. Халкьыни аIрайл’ эйгьиводки: «Вахт абкIынле хъийгъа, архайн акьва бадалхьайле хъийгъа, ярабышин ыкIар кIелийханан».
Йишди увгьойка, мани джуваббышихъаб гьаммаше деш кьувват воохьи. Мана даIвъий дюнйейни таарыхее эн хаIбба эскерар, кьаIсинбы, ушахар гьаIлакавъуна гьааIдиса вухьа. Манчин гьувойн уцIурбы къийнад мейид водунбы. Йишин бордж водун, ши сагъба летти, манбышда едигар гьувааджес ва раIгьмат манбышилхъа къихевлес.
ДаIвъийни вахтал’ ЦIаIхий хаIбна хив вухьа. Садджу мани хивеенче фашистаршиква вурушмишивхьес даIвъийехъа 240 джегьил’ аркIын . Манбышике йыIкьалхъа 62 инсан хъары. Авхуйн джегьилера даlвъийни уммане гьабтIуйнбы, батмишебхьайнбы. Къийнад манбышди гьаIкIеедын маIълумат архивбышеенче тIабалаъа водун. ЦIаIхни хивеенче батмишивхьайнбышике 58 инсан нени джигее, нени сен гикIуй ацIа водун. ДаIвъийе гьабтIыйнбышин сиягьий архивбышеенче АIлиев Темрезе Рашидни дихее саъы, йишди редакциехъа хъады. Шинад манбы чапауйнбы «НУР» кIазете. 17 инсан хъикIуйн джига гьаIшдед ацIа дешодун. Ин ша Аллагь манбыб тIабалааъасынбы.
ДаIвъийе иштырак гьаыйнбышди аIрее йизди дидейна чодж УIмаханов ЙаIгье ГьаIджиумаханна дих ыхьа. Мана Сталинградни вуруше пулемёт агьана ыхьа. Мааъар йыIкьра яраламишхьа. ЧIакIни орденбышис, медалбышис лайикьау. Мана хьинне даIвъийни цIаеенче хаIббабы илгъебчIу. Манбышда гьаарна ахтыйни гьуIрматыс лайикьра ворна.
ХаIбни Ватанни даIвъийе иштырак гьаъыйнбышда сайир цIаIхийгъаIлий, йизди едина эмий УIмаров МагьаIммад АIмайна дих ыхьа. Мана даIвъийенче хъарына, анджах джуна чодж УIмаров Кьурбан АIмайна дих даIвъийе батмишхьана.
МаIгьаммад дайийе джуна игитийвалла джурабаджур чIакIни вурушбышее гьаагу. Манкъвее авропеедын гьоIкуматбы фашистаршике азадаъани вурушбышейид иштыракаъыйн. М. УIмаров чIакIни орденбышисый медалбышис лайикьау. Манкъуни игитийвалис ахтыйна кьиймат джуни командирарше гьувы. ХаIбна Ватанна даIвъий таамувхьайле хъийгъа, мана хивеехъа хъары, кIалхозее джурабаджур къуллухбышил’ ишлемишхьа. Джуни хьунащейква Ханзада адийква хаIбна хизан тербиейква ва гьалални къыкыква чIакIыхъавъу. Манбышис хъаIдхъий, даватбы гьау. ХХ асырни 70 сенбышее мана хизаныква Къахни районни Агъйезийни хивеехъа кочмишхьа. Хивни джамаъаIтни аIрее манкъухъаб хаIбна гьуIрмат вухьа. Къийнад манкъун до садджу югвалис агъмишаъа. ГьаIшде манкъун духъйе , невабы МаIгьачкъале ва Урсиятни шагьарбышее ешемишоохьи. Азербайджан ешемишоохьен гогьарбыб манкъун гьаIшдеб вобунбы.
Йишин бордж водун, гыргын ХаIбни Ватанни даIвъийе иштырак гьауйн ва мааъаб гьабтIуйн гыргын цIаIхбы йикIел’авхъуй, Манбышилхъа раIгьмат къахувой. Гьасре сайиб гьайни дюнйейл’ маIгьабна фаляакат дёохьена. Аамин!
