КъыIлийни вузаршее Бабаюртни бинабышил’ни йишди миллетни ушахарше джона вахт хайирыква алгъайгьи. Манбыше каникулбышее гьам диндж аляатIа, гьамыб аIрабна миз’ хаIбхъоохьи. Манчиниме ушахар манзикей абайли. Гьайни сеныд Калел’ни хивни йыIкьнекни манзикейни аIрабни мизекени курсбышис джегьилерше хаIдын марах гьагу. ушахар сабы.
Курсбышейхъа хъавайлени ушахаршис аIрабни мизени устадарше’, маъаIллимарше грамматикайн, хъаIдхъийнийий одкIунийн дарсыбы гьели. Манбы мусурманни динни таарыхыква дёлесвалейнче танышааъа. Манзикни имамни Элекпер Лезгиевни увгьойка, сениле-сенилхъа бинабышил’ни ушахаршин аIрабни мизелхъан гьавас хаIдхъехьи. ГьаIшде манзикейхъа гадебышиква саджигее ичеерыб хъавайленбы. Манбышин дарсыбы джурайда алгъайгьи.
Гьайни дёлесвалей аIрабни мизени курсбышейхъа хъавайлени гадебышди аIрайл’ футболун турир илгъечIу. Мани йигъыл’ хивни мактабни майдамейхъа футбол гьуваагасдимее хаIбба ушахар, хивын джамаъаIт сады. Манбы ёкьни дестейлхъа битIалувхьа. Гьар дестее 10 ушахыхьа.. Дестебышилхъа джуравхьайле хъийгъа, футболун турнир гидгъыл. Джегьилерше джони аIрайл’ баIгьсбы ыккы.
Командабыше геед уфтанын футболун оIюн гьагу. Манбышиле тамаше гьааъас футбол гьувааганбышди футболчерше геед марахукван оIюнбы гьагу.
Ушахаршини аIрайл’ турнир алгъаъас теклифыква хъигъебчIыйнбышда сайир Тарлан Къараев ыхьа. Манкъве шаквани ихтилете увгьойн: «Хивни ушахаршини аIрайл’ мани саягъылин футболун турнир алгъагьас ши гьаIзирувхьайн хаIбба вахтний. Гьайни сен шаке мана иш вуккейс вааIвхына. Гьлбетте мани карее шас хаIдын кумаг хивни джамаъаIтын гьуво. Шавае кумаг гьуво, манбышис сагъулва эйгьи. Энки хаIбна шадвалла ушахаршина вухьа. Джегьилершис маIгьадни тадбирбыше динылхъан ва спортылхъан аIшкь хаIдхъаъас имкан гьооли.. ГьаIшде шахъаб мани карее югна таджруба вобна. Геледжагъыл’ маIгьдын турнирбы ши экIда-экIда алгъагьасынбы».
Турнир таамхьайле хъийгъа, ахтыйн джига аххъыйни командабышис медалбыйий наградабы гьуво. ЦIеббыйна джига алябтIына команда кубокыс лайикьба къавджу. Турнир тешкиляийнбыше мани йигъыл’ гьуваагани оIюнчершис, иляакас абыйни ушахаршис къуIман одхьунийид гьуво.
Хурни ушахаршини аIрайл’ футболун турнир цIеддыйн ыхьа. Ши умудааъана, геледжагъыл’ манчике хаIдын турнир хъихьес. Мааъад садджу ёкьни хивын ушахарджаб деш, къырагыл’ни хиваршейнче абыйни ушахаршед иштыракаъасын.
