Камил’ Шамхалов

РФ-ни Президентни Владимир Путинни Фирманука ХаIбни Ватанни даIвъийни ветераныс Ибрагьим-Паша Садыкьовус ахтыйн Россиейни КьаIгьраманын до гьуво. Сабара гагьна гьихъа манкъве 100 сенийн юбилей алгъавгьу. Манчини аллана хабар джуни тг-канале Дагъыстанни хаIрынкъве Сергей Меликове гьуво.

Фирмане одкIуний, Ибрагьим-Паша Садыкьовус Россиейни КьаIгьраманын звание « ХаIбна Ватанна даIвъий аIл’гьаани вахтал’ , 1941-1945 сенбышее, гьаагуйни игитийваллайс ва кьаIгьраманыйваллайс, ватанпересни къайдал’ джегьилер хаIбхъааъани гьаракатыквани ишис» гьуво.
Йикел’хъаляъанки, дагъыстанны ветеран ДР-ни Рутулни районни Рутул хивее едике ыхьа. 1941 сен джуни хайишиква фронтэйхъа аркIын. Мана Сталинградни, Керчьни, Киевни, Варшавайни, «Курская дугайни» азадаъани вурушбышда иштыракчий ыхьа.
Вурушбышее гьаагуйни джомардваллайс ва кьаIраманыйваллайс Садыкьов 2-ъэсди ва 3-ъэсди дараджайни Шогьратни, 1-ъэсди дараджайни ХаIбни Ватанни орденбышис лайикьра къаджы, манкъус «Джомардыйваллайс», «Варшава азадавъуйс», «Германиейле гъамувхьайс», Жуковун медалбы ва медын наградабы гьуво.
«Ибрагьим-Паша СултIанна дих къийнийни йигыл’ Ватан къорамишааъанбышис йикI’ гьелени инсанаршина са ворна. Манчиле гъайре мана ыIмрее шадна, марахукана инсанорна. Манкъука танышхьайле зы геер разийра ворна»- Сергей Меликове даIвъийни ветераныс ахтыйн до гьувойнчини гьаIкIее увгьо.
Дагъыстанни хаIрынкъве республикайни джаIмаъатни доюле РФ-ни Президентыс ХаIбни Ватанни ветераныс Ибрагьим-Паша Садыкьовус Россиейни КьаIгьраманын звание гьелес кьарарылхъа хъарыйс миннатдарийвалла агъмишавъу.
«НУР» кIазетни редакциейн цIаIхни миллетни доюле ветеран ахтыйни доюка табрикаъа ва манкъус джанана сагъвалла аIрзааъа.