Гьайни йигъбышее Азербайджангъанче къарахабар хъабы. ЙигIцIале йигIыдъэсди ешее цIаIхни халкьына доюквана маIъаллим, шааир, язычий ЫIсмаилов Нусрет Адил’на дих раIгьматыххъа аркIын.
Йишди ватанэгьлийе хошбахтна ыIмыр гьавъу. Манкъве Оорункъве джус къайиккыйн сенбы халкьыс къуллух гьавъийс, ушахаршини тербиейс ва хаIдда менни хайирни ишбышис къадсыр. Н. ЫIсмаилове джуни гьунарбышиква, ацIааликва, баджарагъыка цIаIхни миллетни таарыхе ачухна гов гьабсыр. Манчини аллар мана ацIа-хъуваацIанбыше садджу хошни джуваббышиква йикIел’хъаляъас.
Нусрет ЫIсмаилов 1949 сенни ноябрьни 7-чил Азербайджан Республикайни Закатала районни Сувагыл’ни хивее едике ыхьа. ЙыIкьнекин мактаб 1966 сен ЦIедни Сувагыл’ни хивее таамау. Гойне манкъве Баквее институте хъаIдхъы. 1974 сен ааIли таIгьсиликвана саIнаъаткар Н. ЫIсмаилов хивее СССР-ни Социалист Эмекни КьаIгьраманни Мина Назировайни доюл’ни мактабее математикайни маIъаллимна ишлемишехьи гиргъыл. ХаIдда сенбына некки ваджибни пешебышди санчис йаIгь-ламысыква къуллухавъу.
Нусрет маIъаллимни гьаракатбышис республикайни гьуIкумын ахтына кьиймат гьуво. Манкъун до «Азербайджанын зиялыбы» донани китабеехъа адчу. Манчиле гъайре мана джурабаджурайни мукафатбышис лайикьра къаджы. 2017 сен манкъве Баквее ыIлми-методик китаб къайиккы.
ЫIсмаилов Нусрет Адил’на дих халкьни арайл’ гьам камалукана математикайна маIъаллим, гьамыр кIораба цIаIхна миз ваацIана, чини маIттивалис фыкыр гьоолена, фольклорна, поэзиейна устадхьинне хъуваацIа ыхьа. Манкъуни шечIбышикван хилидже едини мизелин маIънийбы водунбы.
Нусрет маIъаллиме хаIбна заIгьмат едини мизел’ хъигъааIни китаббышди меега гьавъу. Мана манчини хаIддананчина редактор ыхьа. Сабара сенбына гьихъа манкъве цIаIхна миз, адабият гьувааджийни ва артмишаийни меега чалышмишехьени МаIгьаммадшариф Шамхаловука «Йихъбышди поэзиейн антологие» донан китаб къайиккы. Махъа хьоцIалилхъа авабкьурни йишди миллетни шааираршин шечIбы гядкIу. Манчее лайикьна джига Нусрет ЫIсмаилове обкIунни «ЙикIелеэ» донани шечIын авхъу.
Нусрет маIъаллим халкьниме джан гёйхьанна инсан ыхьа. Мана миллетни угъурбышис шадехьенаний, нягьаIкьни ишбышис пышманыйвалланий цIыцIааъана. Манкъве аIзизни миллетука багълыдани ишбышее гьаракатукан иштыракний гьаъан.
Н.ЫIсмаилов джуни халкьына гьаIкIена ватанпарасний . Мана Азербайджаныл’ни цIаIхбышди гивъур-сугъооцуйква саджигэй Дагъыстаныл’ни, быкырни Урсиятыл’ни йишди миллетни эл’чершини гьаIкIеейир марахламмишехьенаний. Манкъухъад Дагъыстанэйни цIаIхбышикван югун алаакьабы ыхьа. Манбышди магьишатыква дёлесвалейнче танышхьайниме Нусрет маIъаллим сабара сенбына гьихъа баба-дидершини юрдулхъа ары. Хиваршее манкъве джаIмаъатыкван горушбы ыккы. АIзизни инсанаршиквани ихтелетбыше манкъуни йикIее югун фыкырбы гьадсыр.
Азербайджаныл’ни, Дагъыстанэйни, быкырни Урсиятыл’ни цIаIхбышди доюле раIгьматтыгъ Нусрет маIъаллимни хизаныс, гогьар-гьамбазаршис башсагълыгъийвалла гьооли ва манкъуна джига дженнете хъааъанава эйгьи.
