ГьаIджий ШыIхамиров джуни хагьишыква вурушмишхьес аркIын ыхьа ва Харковни вилаетни Купянск шагьарни кIане аIлгьаани вурушбыше душманни гуллейке хъикIу. Манкъун джуни хизаныква аIхреейдын юшонауй манче ыхьа ва манкъуквана телефонуквана аIлакьаI явашувхьамее, делесынбыше нарагьатийвалла гьааъа гибгъыл. КьоIбле вазна манбы умудее вухьа манкъуке са джуваб хъадайлива, амма манбышис уцIурнана хабар хъабы, ГьаIджий душманаршиквани вурушбышди санчее гуллейкве хъикIува. Манкъуква ахрейни вурушее вухьайни гьамбазаршини увгьойква, ГьаIджий игитхьинне дюнйейле аркIын.
Къызларни районни някьвбышил’ мана бастураъас мани районе ешемишоохьен цIаIхбы, МагьачIкъаленче, Сувал’ни магьаIлыле хаIбба инсанар абы вухьа. Амма манбышин хаIббананбы миххьегIбы вухьа. Ман кар дюзида деш водон, няъас увгьее ГьаIджий кьаIгьраманхьинне йишин геледжагъ югда ихьеджинва, ватанни йаIххъехъа джан гьуво. Мана йишди миллетна игит ворна ва мана бастураъани йигъыл’ цIаIхбышди гыргыни хиваршенче инсанар вухьес вукканний. Инсан бастураъас гьаркIыний геед сувабнан кар водун.
ГьаIджий ШыIхамиров бастураъани джигеехъа Къызляр районни военный комиссариатни эл’чее манкъуни делесынбышис башсагълыгъийвалла гьуво ва увгьойн: «ГьаIджий АIбдуллайна дих кьаIгьраманхьинне шагьид ыхьа ва манкъус гьоIкуматни сурале мукафат гьелесын. Мана гьаммаше йишди йикIбышее ихьес ва манкъуни хизаныс гьоIкумматни сураке ва шаке гехьан кумаг гьелесын».
Аллагьыке махуIдын уцIур ненкъукIледжад къидеджен. ГьаIджийхъар ворна дешда са йиш ворна, манкъухъад медын ушах ыхьа деш. Ши манкуъуни делесынбышис деккис, едис, хунащейс ва йишес башсагълыгъийвала гьооли ва йикIес сабырбы гьеленбыва эйгьи.
P.S. СВО йишди миллетни 300 аваркьыл’ни джаване игитершехьинне иштырак гьау ва къийнад гьаъа водун. Къийнике шахъа йишин эскерар хайбышехъа джони хизанбышехъа сагъба — саламатба хъавалес Аллагьыке кьисматааъанбы.
Сайид закIле гьаман эгьес ыккан, ГьаIджий йишди миллетна йихьыhъэсда СВО-на шагьид ворна. Манкъуле савагьиqба шагьидар вухьайнбы: Амрах Кьурбанов- Гыл’мецI, Мурад Сафаров – МиххьегI, Рафаэл ГьаIджиев – ДжинаIгъ, Ренад АIгьмадов – ЦIаIхий, МагьаIммад Кьурбанов – Мишлеш. Сайир йишда йихъый мааъар итхьынхьа аркIын ворна. Манбышилхъа ши раIгьмат къихооли ва джони дёлесынбышис йикIес сабырбы гьеленбы ва манбышис йишди сураке башсагълыгъийвалла гьооли. Манбы гыргынбы йишди миллетын кьаIгьраманар вобонбы ва манбы йикIел’хъавалявъий йишин бордж водун.
