АIхрейни сенбышее цIаIхбышди джаванарше, ДРО «Цахурская молодежь» (ЦIаIхбышин джаванар) донани ташкилатын ХаIбни Ватанни даIвъийни ва СВО-ни иштракчершис къадсырийн футболын турнир алгъайгьи.
Мани джаванаршди ташкилатна хааIрна Руслан Алхасов ворна.
Гьайни сен ман турнир МаIгьачкъалайни Красноармейскни поселокни «Спарта» донани стадионе илгъечIу. Мани турнире МаIгьачкъалайни, Къызларни, Астарханни ва сабара медни джигабышенче адыйни 13 командайн иштырак гьаъу.
Манчис информациейн кумаг «Нур» казетин гьаъу ва соцсетьбышеехъа манчин маIълумат хъуво.
Турнире цIедда ман 13 команда санасанчиква кьоIни группее гьувагыйле хъийгъа, манбышда 8 команда 1/4 финалехъа илгъевчIу. Манбы «Цахуры», «Мишлеш», «Микик», «Кизляр», «Карадаг»,«Курдул», «Шукур», «Ветераны» донан командабы ыхьа. Ман командабы санасанчиква гьувагыйле хъийгъа, полуфинале «Цахуры»-«Курдул» ва «Микик»-Карадаг» гьувагы. Финалехъа «Микик» ва «Цахуры» илгъечIу ва «Карадаг»-«Курдул» хьебыдъэсди джигайс гьувагы.
Манбышди аIрее цIеббийна джига «Микик» донани командайн авхъу, къоIдъэсда джига «Цахуры», хьебыдъэсда джига «Карадагын» авхъу.
Мани йbгъыл’ стадионехъа саlджу футбол гьуваганбы джаб деш абы вухьа, махъа мани оIйинен гьаваскарар, сабара йишди миллетын гьуIрматукван инсанар абы вухьа.
Турнирын екунбы ыккейкана маджлис АIбдуллагь-гьаIджее вукку ва манкъве махъа абыйни сабара инсанаршис джуваб гьуво. Манбышди аIрее Дагъыстанни муфтиятни джануб округна имам ГьуIсейн-гьаIджий ГьаIджиев, «Нур» кIазетна хааIрна редактор Байрам АIбдуллаев, «Ассалам» кIазетна хааIрна редактор ГьаIсан-эфендий Магьмудов, ЦIаIхийни магьаIлна имам Эл’дар-гьаIджий Cулейманов, Сувал’ни магьаIлни «Инсан» донани фондна хааIрна АIсадуллагь-гьаIджий Рамазанов, МагьаIчкъалайни шагьарни хаIрынкъуна кумагчий Имам Рамазанов, Мишлешни ва ЦIаIхни администрациейн чIакIынбы Ислам Ибрагьимов, Вагиф АIлиев ва мебынбы вухьа.
Манбышди гыргынкъве илгъечIуйни турнирыс ва йидж тешкиляуйнбышис ахтына кьиймат гьуво. Мигьманаршди увгьойква, маIгьдын идманын ярышбы вахт-вахтал’ кечирмишаъас ыккан, няъас увгьее манче йишин джаванар саджигеехъа сааъа ва манбы сана-санкъукIле вацIа воохьи. Гойнед ини ветеранаршис къадсырийни турнирыхъаб хаIбна кьиймат вобна, няъас увгьее ман ХаIбни Ватанни даIвъийе ва СВО-е иштырак’ гьауйн инсанар йикIел’хъавалявъуй водjн ва джаванарашикIле манчина ваджибийвалла ацIалявъий водeн.
Мигьманар юшонавъуйле хъийгъа командабышис пылын мукафатбы, медалбы ва граматобы гьува. Турнирна эн югна футболист «Цахуры» командайна МуIгьаммад АIлиев ва эн югна вратарь «Микик» командайна Имам Лелаев вухьа. Манбышис гьарынкъус 5 аазыр рубл мукафатын гьуво.
Вратарыс Имам Лелаевыс мукафат «Нур» кIазетни редакциейни сураке гьуво ыхьа, МуIгьаммад АIлиевыс Сувал’ни магьаIлни «Инсан» донани фондни сураке. Мани турнире цIеббийна джига авхъуни «Микик» командайс 55 аазыр рубль мукафатна гьуво, къоIбъэсда джига авхъуни «Цахуры» командайс — 35 аазыр ва хьебыдъэсда джига авхъуни «Карадаг» командайс -25 аазыр рубль.
Турнир алгъагьас ва къамебхьайнбышис мукафатбы гьелес кумагбы спонсорарше ва хаIббанани йишди миллетни инсанарше гьуво.
Манбышди аIрее «Доринж-39» тикинтийни компаниейна хааIрна ГьаIджимуса ГьаIджимусаеве (Москва),«Миратома» компаниейна хааIрна Махач Cафарове (Воронеж), «Салют» донани мебельный фабрикайна хааIрна Адил’ Давудове (Благовещенск), мебельный фабрикайна хааIрна Ради АIлиеве (Хушет), «АС-МЕД» донани м медицинайни марказна хаIрна АIбдулнасир АIгьмадов, СПК «Ленина» донани тасаhруфатна хаIрна Исакь Балаев, ишкарарше Мустафа Байрамове, Айдын Бабаеве, АIзиз Сафарове ва мебынбше гьуво. МанбышикIле джаванарше алгъайгьени маджлисбышис кумагбы гьауйхъа гора сагъулва эйгьи.
Турнирехъа абыйни иштыракчершис ва мигьманаршис плав ва чей гьуво. Мани ишихъа иляккана АIбдуллагь-гьаIджий Эфендиев ыхьа. МаншаАллагь, гееб дадуквана плавий манкъве хъобхьур. Шавае мани турнире иштырак гьаъу ва махъа мигьманра ары манбышис ташаккурийвалла агъмишааъа ва ИншаАллагь са сениле ши меб мани стадионе горушмишебхьесынбы ва ман йишин турнир гьар сен кечирмишаъасын.
МаIгьдын спортун маджлисбы алгъавгьуй геед югда водон йишди джаванаршдиме, няъас увгьее санансанкъукIле вацIоохьи, гойнед манбыше вахт бейкараба авакIанааъа деш.
Гьасре маIгьдын спортун, маданиятын маджлисбы шахьад хаIдда ихьенбы ва мааъад хаIдда йишди миллетни эл’черше иштыракаъас кьисматаъан! Аамин!
