Камиль Шамхалов

Майни 7-чил Владимир Путин офицальныра Россиейни Президентни къуллухылхъа иккечIу. Мана мани къуллухыл’ йихьыдле сенна , 2030 сенилхъаме ихьес.

ХаIдни Кремлевскийни имаратни Андреевскийни утагъее Путине кIын’ гьуво. Конституционни судни садрее Валерий Зорькине сиясатчийсхъа президентни гьуIкумын лышанбы хъуво. Манчини аIрее – Россиейни Федерациейни гербыкван къизлен Георгийн хач хъуво.
Инаугурациейле хъийгъа, россиейни хаIрынкъве оIлкайни халкьылхъан мураджият гьау. Манкъве гьарни россиялыйс миннатдарийвалла агъмишавъу. ГьоIкуматни башчийе ахтыйн ташаккурын джуваббы Ватанниме вурушмишоохьени эскераршикIле увгьо. Манкъуни джуваббышихъа гора, оIлкайн чIакIынбы хъобкуни йаIххъыл’ аIлгьаа вухьай халкьын тасдикьауйн. Путинни увгьойка, оIлкайн Россиейна вар-девлет артмишааъасын джегьилер хаIбхъааъас вуккан. Шаке хаIдни макьсадбышилхъа гьивхьарас садджу саджигэй вааIхас.
ОIлкайни регьберее джуни чыхышее россиялыбышин джулхъан инам итIумхьайниме гыргын хыленче хъооIн гьаъасынва джуваб гьуво. Манкъве агъмишаийн, Россиейн ватандашар садибын ва доюкан халкь водун. Ши гыргыни дагъамийвал’бышике илгъебчIесынбы ва фыкрее аххъыйнбы джигайлхъа гьихьараъасынбы.
Хъийгъа манкъве хариджийни оIлкабышиквани алакьабышди гьаIкIее хабаравъу. Манкъуни джуваббышихъа гора, ши манбышиква барабарын ихтелет гьаъас ыккан. Садджу санасанкъун марахбы гозетяу, хааIнче идябкIын ши са джувабылхъа хъавалесынбы. Дешхьее манбышиква гаф гьавъуй кьаIрадын карбы водунбы.Россиейни Президенте увгьойн, МаскIавын менни оIлкабышикван алакьабыд юг хъаъасынбы..
Владимир Путинни инаугурациейле хъийгъа, Михаил Мишустине хаIбвалла гьааъан правительство ишиле хъигъечIуйн. Манчин къурмишхьай тезе къайдабышиква ихьес. Тезе нормабышихъа гора, премьер-министрын, вице-премьераршин ва хаIббанани министраршин кандидатурабы ГьоIкуматни Думайн тасдикьаъас.
Ши В. Путиныс гьоIкуматни ишбышее угъурбы аIрзуламишаъа.