Сабара гагьыле йишди оIлкайн ва быкырни дюнйейн ХаIбни Ватанни даIвъйийе фашизмайле Гъамувхьайн 80 сенийн байрам алгъагьас. Мани даIвъийе Совет гьоIкуматни гыргыни миллетбышди эл’черше душманыкани вурушбышее гьаракатукан иштырак гьау. Манбышди аIрее цIаIхни халкьын игитерыб кIыл’ба деш вухьа. Йишда гаф гуд’барагалий Пашаев ГьаIбибуллагь Пашайни духайни гьаIкIеена вухьес.
Закатала районни Гуд’барагни хивеенче джона хаIбна Ватан немец-фашистаршике къорамишавъуйниме ваIщеле агъаллана инсан аркIын. Манбыше джурбаджурни фронтбышее игитийвалла гьаагу. Гь. Пашаев эскереехъа хъортIулуйнкъаI, манкъун 18 быкырхьа дешдий. 1942 сен манкъве эскерийвалла Мутурстанни Авчала шагьареенче гьааъа гиргъыл. Хъийгъа ГьаIбибуллагь Азербайджанни Сумгаитни шагьареехъа къахову. Мааъад манке 416-ъэсын стрелковый дивизие еррашмишхьа ыхьа. Гойне дивизие Таганрогхъа кочмишхьа.
ГьаIбибуллагь ешбышеехъа гьидирхьылийхъа гора, гьамыр боюс кIыл’на, джанас заIъыфна джегьил’ ыхьайке мана Буйнакскни шагьареехъа оIтирау. Мааъад фегьле батальонний еррашмишхьа. Гь.Пашаеве мани батальонни таркибе джуни гьамбазаршиква саджиге шагьарни гьаIррама сангарбы алидкIур. Мааъар ишлемишехьени вахтал’ ГьаIбибуллагь утIумра чIырхьана. Манчихъа гора мана джан тавулхъа хъаляъасдиме хаахъа къайиккы. Хъуваркыме, мана 416 стрелковый дивизиейхъа саркIыл.
ГьаIбибуллагь Пашаев хаIдданани вурушбышда иштыракчий ыхьа. Мана цIеддыйни медалыс Днепрыл’ни алла ал’гьааIни вурушбышее кьаIгьраманийвалла гьагуйс лайикьау. 416 дивизиейн Варшава фашистаршике азадаааъанкъаI хаIдын гьунар гьагу. Мани сардан йишда ватанэгьлий кьоIдъэсди дарджайни «ШоIгьратни» орденыс лайикьра къаджы.
Мусейб Кьурбанове «Гъамувхьайна йаIхъ» донан китаб одкIун. Ман китаб 416 стрелковый дивизиейни эскераршини кьаIгьраманийвалис къадсырыйн ыхьа. Манчее ваджибна джига ГьаIбибуллагь Пашайни духайни гьаIкIее одкIунийни кал’мабышеб авхъу. Манкъуни джомардыйвалис командирарше ахтына кьиймат гьуво. Китабе одкIунийнбы йишди ватанэгьликайка саджигее вурушмишхьайни Совет гьоIкуматни КьаIгьрамане капитан Агъ.ДжаIфаровейид тасдикьау. Мана Бакулы ыхьа. ДаIвъийни кьияматыле къаттибхьынийн гьамбазар аIрабирба хъызааха вухьа. Гьелбетте манбыше даIвъийка багълыданан гьаIдисабы ва джока саджиге вурушмишивхьайн игит эскерар йикIел’хъаваляаъа вухьа.
ХаIбна Ватанна даIвъий чIаIв вухьайле хъийгъа, Гь. Пашаев 1947 сенилхъаме 714 полкни контр- разведкее ишлемишхьа. Гойне аIзизни хивеехъа саркIыл, хизан къурмишавъу. СуIл’гьни вахтал’ ГьаIбибуллагь Пашайни духее ёкьцIалиле агъаллан сенбы хивни тасарруфатыс къадсыр. Мана кIолхозе джурбаджурни къуллухбышил’ ишлемишхьа. Сабара сенбына кIолхозна садры ыхьа. Мани вахтал’ вуджее хаIбвалла гьааъани ташкилатын югун натийджыбы гьагу. Мани сардан мана гьоIкуматни хаIдданнани ташаккурыйвалла агъмишааъани кагъызбышис, пайбышис лайикьра къаджы. Манкъве халкьни арайл’ хаIбна гьуIрмат къазанмишавъу.
ХаIбни Ватанни даIвъийна иштырыкчий, кьоIдъэсди дараджайни «ШоIгьратни» орденна, «Варшава алябтIыйс», «Берлин алябтIыйс», «Гьаагуйни игитийвалис» медалбышда ва менни наградабышда ийесси Пашаев ГьаIбибуллагь Пашайна дих ыIмырни аIхреехъамае едике ыхьайни хивее гуд’мишхьа.
