Октябрьни 18-чил' Россиейл' йаIхъбышди тасарруфатни ишчершин Йигъ алгъагьас.  

ГьаIдис вобна: «Ненкъвейий йаIхъбы, йыIгъар, гармабы аляъы, манбыше хаIдын суваабодун къазамишаъа, джосда йаIхъ дженнетехъана аляаъа. Нимеегайий ман йаIхъбы, йыIгъар, гармабы инсаныс хайирыс ишлемишхьее, гьаманкийлхъамее манбы аляуйнбышис сувааббы ихьес».
Шахъаб, цIаIхбышихъаб, йаIххъаршин устадар районее, республике, гьоIкуматни гьарджура вилаетбышил', чIакIни шагьарбышее вухьайнбы ва гьаIшдед ман аIдатбы йишди джегьилерше хаIдхъаъа водунбы.
Вахтале- вахталхъа ши манбышди гьаIкIее, манбыше гьаъыйни ва гьаъани ишбышди гьаIкIее «Нур» кIазете ойкIанан, цIаIхни мизел'ни телеверлишбышее гьаагва.
ГьоIкуматын экономиква гьаIракатеехъа адчуй, инсанаршин ешайиш вахарий хъыхьай поштини йаIххъыкед аIслыда водун.
ЦIаIхни дерайлхъа поштина йаIхъ ХХ-ъэсди асырни 70-ъэсди сенбышее хъабы. АIрайле 50 сен адкIын, къийнаб гыргыни йишди хиваршеехъана йаIхъ цIыцавъу дешобна. Атталхъанайий КIуссурхъана поштина йаIхъ дешда. МуIхаххъана йаIхъ хъабына 4-5 сен ихьес. Калел'хъана ( гьаIшде мааъаб, гьалекийс къыIл'-къыIдим ешемишоохьен инсанар девхьеейиб), ХыIягъхъана поштина йаIхъ 2023 сен хъабы. Коршехъана йаIхъ гьалекийс алхъившу дешобна.
Поштина йаIхъ хъавалессе, йишин миллет пиядани йаIхъыл'ни ийкар. АIсас йишин хаIдни дюнйейкван экономик алаакьабы, ивийкырыйбы гадигбышеенчений ( Балякьадайни, АIттагъаIйни, Диндийни) эхьи. Манче Азербайджанхъа илгъебачIи вухьа. Манчеб медни республикабышехъа. Вочекхъа поштина йаIхъ хъабыйле хъийгъа сент бадалхьайн. Йишин миллет одхьанан, аляъан кар, пошт хъалесдимее пиядани йаIххъыл' ман хивеехъаний гьавайкIан. Искалатбышенче мал алеетIу инсанарше йыIкъал', балканаршил' джони хиваршеехъа гьаххъа ыхьа. Мал хъалесдимее 2-3 йыгъний айкIанан. ГьаIкIебаб мана хаIбна зулум вухьа. Шукур Аллагьылхъа ХХ-асырни аIхрее, машнена йаIхъ хъабыйква аIрайле абкIынна. Манке ЦIаIхни дерайл'ни йишди 13 хиваршее хаIдда джаIмаъат ешемишехьи ыхьа.
Водун вод хьинне эгьес ыккан. Къийнад йишди дерайлхъан йаIхъбы цIыцIаъа, хъаъа, йыIгъаIр аляъа водунбы. ГьоIкуматын Федерал программайква поштини йаIхбышисын пылбы къекка водунбы. Манчин хылид йишди дерайлхъа гьийхьар водун. ОIгийлиб, гьаIшдеб йаIхъбышиква багълыданани ташкилатбышее, идарабышее йишди миллетын инсанар ишлемишивхьа ва ишлемишоохьи вобунбы. Манбыше джоке аIхан кумаг гьаммаше гьаъан. Манбы девхьее, шалхъа акьва сакIалаъана инсан ихьес деш. Инсан быIркьыра ихьес ыккан, йаIхъбышди сардан гьаыйн ишбы къидеджес. Вочекгъанче гибгъыл Диндийни гадигени къомахъамее аIкьна, уфтанна йаIхъ алявъу, чIакIын йиван йыгъар гиххьы, падборкIабы аляы, машинбы йаIххъыле хъигъмечIеджинва, четинни джигабышее бетонын къалиббы гиххьы водунбы.
Гьел'бедти ман ишбы гьаъасдимее ва аIхреехъаме быкыраъасдимее ХаIдын заIгьматбы къуллухчерше ХаIнмагьаммад РаIгьимове, Замир Умаханове, АIбдурагьман ГьаIджиеве, ШаIфи АIбдуллаеве, устадарше Зейнал Мирзоеве, Джамалий Гьайдарове, Назим Сулейманове, НуIгьий дайийе ва мебынбыше гьау. Манбышиква барабарна заIгьмат трахторчерше, аманалчерше, йаIхъбышди фегьлебыше, хиваршини ймааджийбышис хъигъеебачIени джамаъаIтбыше гьавъу.
Гьел'бедти, сабара йаIхъбышикван суалбы гьаIллаъасдимее йишди депутатарше АI. Омарове, Х. РаIгьимове, Ф. Раджабове хаIдын заIгьматбы гьаъы. Манбышиле гъайре, йизди увгьойква, йишди СМИ–даб заIгьмат кIыл'-на дешобна. ЙаIхъбышиква алаакьан суалбы гьаммаше «НУР кIазете гьувойнбы. Манче суалбы къалхымишаъы, дагъамийвал'бы ашкараъы. Мани отраслил' ишлемишоохьени инсанаршини гьаIкIеедын хайир макьалебы одкIун.
Анджах, ши йаIхъбышди сардан даянмишивхьес вуккан деш. АлетIуйн атдымгьаракатеехъа адчес ыккан.
Сенее хьуленихье элейс «Нур» кIазетын ишчера ЦIаIхни дерайлхъа гьавайкIан. ШакIле джигайл' къедженбы гьиджо ишбыйий гьаъы ва гьаIшдед гьаъа. Къаджейнчиле ши разийба аахва.. ГьаIкIедад, ааферин! ВаIщни элейс къайиххьынчиле са элейс къаджейн югда водун. Поштни йаIххъына либас быкырба югни суралхъа воб хъувхьа.
Республикайни таIъбеедын поштин йаIхъбы аIълада вод. Анджах, тасарруфатбышди адын администрациебышеедын йаIхъбы хъаъасод ыккан.
Муслагъахъа алхъааIна поштина йаIхъ дагъамни вазиятыл' воб. Трахтор вахтале - вахталхъа йаIхъ темизяяас къекка ыхьейид, манчике иш хъобкуба аIхреехъаме гьааъас вааIха деш. Гёгъыйбы гёгъымее селерше йаIхъбы гьойгъал, йизбы гёгъымее йаIхъ шулелхъа сивийкIал. Маайиб чараа къавджес вуккан.
ГьаIмагьабна джаб вазият Гыл'мецни администрациее турамишивхьа вобна. Хивеехъана алхъааIна йаIхъ бабатба вухьейиб, амма хивеена, хивеенче Лекни хивни суралхъа аIл'гьаана йаIхъ лап дагъамба воб. Зы эйгьи деш гьале Лекахъана йаIхъ. Мани хивеехъана йаIхъ юххьан Лекагъанын гьойгъал, кьыIдмына чIакIни йизбыше багъламишаъа.
Гыргыни йаIхъчершис ши джанана сагъвалла аIрзуламишааъа. ЙаIхъ гьавъуй, йыIгъ гивхьуй, хьян цIыцIаый, манзик алявъуйка барабарын суваб водун. Йишди хиваршеенче лампайн цIа камдехьен. Аамин!