Къийна Россиейна садыбийвалла гьувааджесдимее йишди эскерарше СВО гуджнакан вурушбы ыккекка. Манбыше киевни миллетчершини хыленче шагьарбы, районбы, хивар кIылда-кIылда йыIкьаIлхъа сакIалаъа.
СВО хылийда цIыцIахьес дешдий. ШакIле ацIан, мани карее Украинайс хаIдын кумаг Авропайн, Америкайн гьели. Манбыше Россиейкван вурушбы ыккейсдимее, Украинайс хаIдын ярахыкваний техникайкван кумаг гьагва. Манчиле гъайре, миллетчершини сурак` хаIбба менни оIлкабышейнче абыйни наёмникарше иштыракаъа водун. Амма манчихъа ил`дяакы, душманаршин гьар йигъыс хаIбба эскерар гьабатIа.
Мани карее ши ахтына кьиймат йишди эскераршис гьооли. Манбы джони гьаIркатыквайий баджарухуква миллетчершин оIги ыIхас чалышмишоохьи. Офицерарше, прапорщикарше, эскерарше джона джомардийвалла игитийвалла гьаагва. Манбышди аIраIйл` йишди цIаIхни халкьын духйебы кIылба дешинбы. Манбышди хаIббананбышиква ши кIазет хъаIдаххъанбы танышавъуйнбы. Йишди джаванарше къийна Россиейни авхуйни миллетбышиква саджигэй Ватан къорамишааъа.
Къийнийна йишда гаф СВО эхьени Калел`ни хивейнчени игит эскерни гьаIкIее вухьес. Мана мобилизациейхъа гирхьуна Улуханов Малик Микаилна дих ворна.
Малик хизане кьоIръэсда дих ворна. Манкъве 9-ъэсди сыныфейхъамее Калел`ни хивни йыIкьнекни мактабее хъаIдхъы. I0-II-ъэсын сыныфбы манкъве Камбулатни хивни йыIкьнекни мактабее чIаIвау. Маликын Ватанылхъан, хивылхъан аIшкь мактабе хъаIдаххъанкъаI гидгъыл. Манкъус дарс гьувойни маъаIллимарше Маликни хъаIдхъыйс, ацIаалис гьаммаше ахтына кьиймат гьооли вухьа.
Малике мактаб таамауйле хъийгъа, эскерейхъа аркIын.Ман 202I-ъэсын сен ыхьа. Са сенна манкъвее Ватанни гьийдын бордж хъуво, хаахъа саркIыл`. Манкъве РФ-ни ВКС кьуввабыше хидмат гьавъу. Малике са сенни аIрайл` командираршини, эскер гьамбазаршини аIрайл` хаIбна гьуIрмат къазанмишавъу. Маликни деккинийий ед`ни доюлхъа командирарше хаIдда таIърифын кагъызбы къахову.
СВО гидгъылыйнкъаI, Малик эскерийвалей ыхьа. Хаахъа хъарыйни сабара вахтаке Россиейл` моблизацие гидгъыл. ЦIебба мобилизациейхъа гябкIыйнбышди аIрее Маликыр ыхьа. Манкъве сабара гагьна Каспийскни шагьарее гьаIзирийвалла илгъевчIу. Гойне хьинне гьамбазаршиква мана СВО аркIын. Манбы йаIххъылхъа абчес республикайна хааIрна Сергей Меликов ары.
Маликыле гьихъа СВО манкъуна хаIрна чодж Магьмуд аляртIу. Магьмуд манчиле гьихъа Ингушетиейл’ еолашмишихьайни Миноборонайни частбышди санчее контрактыква къуллух гьааъа ыхьа. Манбышин полк СВО цIебба оIтиравъуйнбышди джаргее ыхьа. Вурушбышди санчее манбышин полк гьаIлкьейхъа гидхьу. Магьмуд манке хаIббанани джун гьамбазаршике ыхьа. Вуджир яраламишхьана. Маалиджебы гьаийле хъийгъа, мана хаахъа саркIыл`.
СВО Малике Запорожьейни вилаете Росгвардиейни эскераршиква къуллух гьааъа гиргъыл`. Мана медик-санитар ворна. Малике яраламишувхьайн ва гьабтIыйн гьамбазар вурушбы аIлгьаани чолбышейнче хъыгъааъа. Мана гееб дагъамна иш вобна. Манчис гьар инсан ооIрхас аIхас деш. Мани карее эскерыхъад хаIдын йикI ыккан. СВО аIлгьаани сенбышее Малик хаIдданани джигабышее ыхьа. Мана Запарожьейле хъийгъа, Херсонни, Бахмутни шагьарбышее ыхьа. ГьаIшде мана Донбассыл’ ворна.
Заквани ихтилете Малике джукIле къаджыйн са кIылин эпизод йишонау. Манкъве увгьойн: «ЗакIле СВО хаIдда карбы къаджы. Манбы ненкьукледжад къиджедженбы. Йигъбышди са йигъыл вурушбышди санчее йишда са эскер дагъамра яраламишхьана. Манкъулхъа хайIбышейнче ярах къаъайдхьу. Манкъун къел`бы йыIкьра яралмишхьа. Мана джуни гьамбазарше хъикIуйнкъус гьыIсабау. Гьаадиса январьни вуза вухьа. Ман йигъ зас къийнийн хьинне йикIел` водун. Геед мыкIан йигъний. Яраламишхьана эскер хьодле километруна хылеббышиква гьарагъва-гьарагъва йишди позициейхъа хъигъечIу. Госпиталейхъа мана дагъамни вазияте хъары. Амма манчихъа ил`дяакы, шаке манкъус цIеддыйн кумаг гьагвас аIхыйн. ЙыIкьраI яраламишхьейир, эскерын къелбыйий, хылеббы гьуваджес аIхыйнбы».
ГьаIшде Малик сабара йигъбышна истирагьаIтыс хъары, хааъар ворна. Мана хивни джамаъаIтын хаIнни тентенейква къаршиламишау. Манкъуни хъарыйле гыргынкъуле хаIбба дек` Микаил чоджий, ед` Джамилят баджий, чуба йичибы шадувхьа. Диндж алятIуйле хъийгъа, мана мер вудже СВО эскерийвалла вуккеккани II7 Каспмйскни флотилейни морской пехотайни частылхъа сакIалас.
Ши Маликыс, джуква воохьени гьамбазаршис, авхуйни гыргыни СВО воохьени эскераршис джанана сагъвалла аIрзааъа. ДаIвъий экIда таамувхьа, эскерар хайбышейхъа савкIалас кьисматаъан.
