Китаб чапыке хъыгъечIуй авторни ыIмреена хаIбна гьаIдиса вобна. Ман гьазираъасдимее сенбы, сасса вахтал’ йицIыдле сенбы айкIан. Китаббышихъадыд джурабы водунбы: адабиятын, ыIлимын, таарыхын, мактабын ва медынбы. Манбы ойкIананкъаI, гьаарункъвее чис сикIына заIгьмат гьааъа ва манчини гьаарынчихъад чин къайдабы, тIабалбы ва усулбы водунбы. Китабна метлеб вобна инсаныс гьарджурайлин хъодкуйн маIълумат гьувой. Китабыс гивхьыйни заIгьматна дараджа йидж одкIунийнкъукIле ваацIа вобна.
Ноябрьни 21-чил’ Рутулни районни маданиятни марказе цIаIхбышди шааирыс, язычийс, журналистыс Кьурбан Омахановыс къабсырна тентенейквана маджлис илгъевчIу. Мана маджлис манкъве къайиккыйни «ЙикIеедын сирбы» донани китабни презентациейс ва вудж едике ыхьайни 55 сенийс къабсыр вухьа.
Манкъуни «ЙикIеедын сирбы» донани китабеехъа ыIмрени, муIгьубни, табиятни, гьаIкIеедын сечмишауйн цIаIхни ва урусни мизелин шечIбы, проза, хабарбы эчIу водонбы.
Маджлис вуккекканкъее Индира РагьыIмовае маджлисна тема ашкаравъу. Махъа абыйнбышис миннатдарийвалла агъмишавъу. Гойне маIнкъее чыхышбы гьаъас ва Кь. Омаханове къооджени ишис кьиймат гьевлес адабиятчершис, ааIлимаршис, джамаъаIтчершис ва къуллухчершис хаайиш гьаъу. Чыхышбы гьаъанбыше китабыс ахтыйна кьиймат гьуво ва манчин анализ гьаъы. Чыхышбы гьаъанбышди аIрее цIаIхбышин, рутулбышин язычер, журналистар, районни маданиятни марказын ишчер ва Сувал’ни магьаIлыле абыйн мигьманар вухьа.
Манбышди аIрее филологиейни ыIлимбышда доктор Светлана Магьмудова, «НУР» кIазетна хааIрна редактор Байрам АIбдуллаев, районни маданиятни, идманни ва джаванаршди ишбышди управлениейна хааIрна Саид Сулейманов, районни китабханабышди шоIъбайна хааIрна Индира РагьыIмова, шааир АIбдурагьым Дадашев, районни ТИК-на хааIрна МагьаIммад МагьаIррамов, ЦIаIхийни мактабна директор АIбдулгьаIмид ГьаIджиев ва сабара мани мактабын маъаIллимар ва мебынбы вухьа.
Манбышди гьаарынкъве Кьурбан Омахановни гьаIкIее, джуни поэзиейни ва одкIунни китаббышди гьаIкIее уфтанын джуваббы увгьо.
Светлана Магьмудовайни увгьойква, Кь. Омаханов шеирбышди, прозайни китаббышиле савагьийда мактабе ед’на миз илгъевчIесди китаббышилир чалышмышехьи ворна. Гьайни йигъбышее хурни сыныфбышис манкъве гьаIзираъуйн китаббы чапыке хъигъечIесынбы.
«Мани сардан Кьурбан маъаIллиме Тахо-Годийни доюл’ни педагогикайни институте хаIбна иш къооджи вобна. Закасана мана хил’дже сенбына Дагъыстанни гьоIкуматни университете ишлемишхьа. Манкъун гьаIракат, баджарагъ, ед’ни мизелхъан ва миллетылхъан мугьуIб закIле югда ацIа водун. Къийнийни йигъыл’ цIаIхни мизел’ни китаббышил’ оо ишлемишехьена садджу мана ворна. Мани ишее манкъус ши гыргынкъве кумагаъас ыккан», — С. Магьмудовае увгьо.
Гойне маIнкъее Кь. Омахановыс Рутул районна Шарафна грамота гьуво ва районни хаIрынкъуни Давуд Сулеймановни доюле мана табрикаъу.
Грамота алябатIанкъаI Кьурбан маъаIллиме районни хаIрынкъус Давуд АIмайни дихыс ташаккурийвалла агъмышавъу ва увгьойн: «Йизын цIеддыйн китаб «ЦIаIхбышин фольклор» къайиккас кумаг Давуд Сулейманове гьуво ыхьа ва манчихъа гора зы манкъукIле сагъулва эйгьи».
АIтрафлы чыхыш мани презентациее Рутул районни маданиятни управлениейни хаIрункъве, журналисте, шааире Саид Сулейманове (Къинады Саиде) гьаъы. Манкъве китабни авторе къооджени ишис ахтына кьиймат гьуво.
«Кьурбан Омаханов шааир, язычий, прозаик джар деш мана Россиейни язычершди ва журналистаршди Союзна уIзву ва «Нур» кIазетна шоIъбайна редактор ворна. Мана йишди кIазете ишлемишехьен 20 сен водун. Манкъве шечIбышиле, прозайле савагьийда цIаIхни миллетни инсанаршди, хиваршди ва миллетни дагъамийвал’бышди гьаIкIее ойкIан ва къайгъве ахва. Манкъус кIазете къооджени ишис республикайни министерствабышди ва Россиейни журналистаршди Союзни сураке мукафатбы гьуво водунбы. Кьурбан маъаIллим къийна ед’ни мизел’ ишлемишехьи ворна ва манкъус ши кумаг гьелес чалышмышебхьесынбы», — зы йизди чыхышее увгьо.
Гойне маджлисе цIаIхбышди шааире АIбдурагьыIм Дадашеве Кьурбан маъаIллимыс къабсырна шечI хъаIбхъы ва рутулни мактабни шыгыртарше манкъун шечIбы хъаIдхъыI.
Cувал’ни хиваршенче абыйни мигьманарше ва сабара мебынбыше джони чыхышбышее шааирни, прозаикни, журналистни гьаIкIее уфтанын джуваббы увгьо ва къеджени ишбышее угъурбы агъмишаъу.
Маджлис шешитавъуна бирданхьессе махъа иккечIуни СВО-е отпускайс хаахъа хъоoIни йишди игите Саакит КIамазове. МанкъукIле джуни хивни инсаныс ва къоншийс къабсырна маджлис аIлгьаагьа вухьай ацIахьа, махъа иштыракаъас иккечIу. Маджлисебын гыргынбы къелилхъа сугъооцу, гыранна мигьман къаршыламышаъу. Зы Саакит КIамазовни гьаIкIее са-кьоIдле джуваб увгьо ва манкъуква няхурий Донбасхъа гуманитар кумагыква гьаркIынийнкъаI горушмышхьа йишонаъу. Гойне Светлана Магьмудовае эскерыс 10 аазыр манат пылна гьуво ва увгьойн: «Гьайин вас саркIыл’ СВО –хъа аIл’гьааIнкъа йаIххъысын шакен кумаг водун».
Гойне маджлисеехъа сабыйнбыше эскерыква Кьурбан маъаIллимни джуваббышис обкIунни маIънийква мыкIар гьаъу, гойне мана хаахъа деккисхъа, едисхъа оIтираъу.
Маджлиcе цIаIхбышди мизел’ маIънийбы гьаъани Гул’сават Наврузовае Кьурбан Омахановни шечIбышиква одкIунийн маIънийбы гьаъу ва махъа сабыйнбыше уфтанын мыкIар гьаъуйнбы.
Хъийгъа махъа сабыйнбышис зы цIедда чапыке хъигъечIуйн «ЦIаIхбышин шейхар ва зияратбы» ва «ЦIаIхбышди таарыхни гьаIкIее» донан китаббы пайис гьуво.
Маджлисеехъа абыйнбыше районни маданиятни марказе махуIдын тадбырбы экIда-экIда кечирмишаъас лазымдава къейдаъу.
Маджлисни аIхрее Кьурбан Омаханове джуна «Йизда ЦIаIхий» донана шечI хъаIбхъы ва маджлис къурмышавъуйнбышикIле ва джахъа абыйнбышикIле сагъулва увгьо.
