Йишди гьоIкуматыл’ гьар сен мартыни 25-чил’ Маданиятни ишчершин йигъ алгъайгьи. Мани йигъыл’ маданиятыс кьадсырыйн иджласбы, маджлисбы, концертбы ва джурабаджур майданбышее тамашебы илгъечIи. Маданиятни ишчерше сенее гьавъуйни ишин екунбы ыIхийха, гьааъасди ишин пIланбы ашкараъа. Мани йигъыл’ югба ишлемишивхьайни маданиятни ишчершис грамотабы, дипломбы, медалбы, дараджайкван добы ва медын пайбы гьели.
Маданиятыд инсанни ыIмрен са ваджибын сура водун. Манчин инсаныс тербие, сабыр гьели ва дагъамын хасиятбы, йыIкьын фыкырбы джанеенче акIанаъа. Мани байрамыхъад йиссейн таарых дехьейид, къийна дюнйел’ глобализациее аIл’гьаани вахтал’, хурни миллетбышди меега ман ваджидын Йигъ водун. мДагъыстан хаIдда миллетбынан, мизяарнан, маданиятбынан республика водун. Дагъыстанна уфтаныйвалла, марахийвалла, джураалла манчиква алаакьаба вобна. Маданиятбы джурайнбы ыхьейид, инсанаршин гюувъур — сугъооцый, хасиятбы, фыкырбы сабы водунбы.
АIхреени сенбышее, Рутул районни маданиятни управлениейс хаIбвалла гьааъас Саид Сулейманов хъарыйле хъийгъа, иш гьаIракатехъа эвчIу. Маданиятни ишчершини Йигъыл’ районни хиваршини маданиятни марказбышин фольклорный дестебы гьар сенийни фестивалеехъа районни марказеехъа сабайли . Мааъад йихьыдле, гьар районее ешемишехьени миллетин, майданбы ачмишаъа.
Йишди миллетын маданият, аIдатбы шалхъа йишди баба-дидершиле хъады. Манчини аIрее: хааIрна кIыл’на хъуваацIый, сана-санкъуна гьуIрмат авхъуй, мигьман къаршламишаий, дареени инсаныс кумаг гьувой; ушах ыхьайква, даватбышиква, эскерийваликва багълыданан аIдатбы ва медынбы.
Маданиятыхъад чин джигъырбы водунбы. Сабы — аIдатбышиква, кьоIдъэсынбы — фольклорыква, хьебыдъэсынбы – макьамбышиква, ёкудъэсынбы – мыкIаршиква, хьодъэсынбы – палтарыква ва ил.ах.
Ман карбы гьуваджени ва артымишаъани инсанршикIле маданиятын ишчера эйгьи.
Къийна шахъаб Сувал’ни дерайл’ маданият гьуваджен гьоIкуматын ташкилатбы (клуб, китабхана, фольклорна десте, маданиятын марказбы) водунбы. Эгьес эйгьи, манбышда ишиб къулайква къурмишавъу вобна. Къийна мааъаб миллетни таарыхыхъа ва маданиятыхъа йикI гёдхьанан инсанар ишлемишоохьи вобунбы. Гьар байрамбышил’ районни марказе, республикайни шагьарбыше илгъечIени джурабаджур фестивал’быше районни миллетбышин майданбы эхьи. Махъа гьар хивеенче тамашейс гьагвас йиссейн хорагбы, дезгагьбы, хаани аIрайл’ ишлемишаъан, хивни тасарруфатын ыIгьтаджбы, палтарбы адайли. Майданбы накьра — зурнайквайий мыкIаршиква шешитяъа.
Мани ишбышее гьаммаше гьаIракатбы ЦIаIхни, Мишлешни, Муслагъни хиваршини маданиятни марказбышди ишчерше гьагва. Къийна гьоIкуматни кумагыква ЦIаIхни, Мишлешни хиваршее маданиятын хайбы тезелемишаъы водунбы. Махъа тезе мебел’, макьанбышин ыIгьтаджбы, оргтехника хъады водун. Мани хиваршини маданиятни марказбышди регьберарше Мустафа Рамазановейий Вагиф ГьаIджиеве джони гьаIракатыква музейбы ачмишаъа. Мани музейбышее йиссейн йишин къаб-къашугъ, ыIгьтаджбы, къоранайна бина ва медын карбы водунбы. Мани саъыйни экспонатбышихъаб кьиймат дешда, ман йишин таарых водун. Гьел’бедти, маIгьабни инсанаршис хыл’ авхъас вуккан. Мани ишиле гъайре, Мустафа Рамазановее даватбышее ва медни маджлисбышее едини мизелин маIънийбы гьекIва; абыйни туристар йишди миллетни маданиятыква танышааъа. Муслагъни хивни маданиятни ишчерше — Джелил’ Наврузовейий Гул’сават Наврузовае йишин маданият мыкIаршиквайий маIънийбышиква гьихъа артымишаъа, конкурсбышее, фестивальбышее иштыракаъа. Манбышди ишис районын, республикайни маданиятни министерствайн югна къиймат гьооли. Мани хиваршини маданиятни марказбышин директорар ва ишчера республикайни дипломбышис, грамотабышис лайикьавъу. Мустафа Рамазанов ДР-на маданиятна лайикьыквана ишчий ворна.
М. Рамазанове джуни хаани маIгьаллейиб кIыл’на музей гивхьу вобна. Ары-арына мигьман манкъуни былахыква марахламишехьи .
Агар гьар цIаIхбышди хиваршее маIгьбын Мустафа чоджий хьиннен маданиятын ишчера вухье, гьел’бедти, йишин маданият, таарых, югун аIдатбы миллетни аIрайл’ асырбына ахвасынбы. Йишда кесетийвалла мааъаб вобна, Мустафа Рамазанов, Вагиф ГьаIджиев, Джелил’ Наврузов, МаIгьаммад ГьаIсилов, Гул’сават Наврузова хьиннен санаъаIт йикIеенче гьаъан инсанар лап сейракба вобунбы. ЙыIкьале манбы бадалааъас хъооIн джегьилераб шакIле къооджи деш.
Гьайни йигъбышее, маданиятни ишчершини байрамыле гьихъа, Дагъыстанни маданиятни министре Зарема Бутаевае районбышди, шагьарбышди маданиятни ташкилатбышди ишчершис наградабы гьуво. Манбышди аIрее Муслагъни хивни маданиятни марказна ишчий, цIаIхбышда гьеекIвана артистка Гул’сават Наврузова йихьа. Министре Г.Наврузовайс министрествайни сураке Шарафуквана грамота гьуво.
Гул’сават Наврузовае утагъеехъа сабыйнбышди гьийд ичIудни сесеква, дезгагьбышди макьам дена, маIъний «Джейраным» гьоокIу. Тамаше гьааъанбыше хыллийн гапар гьаъы.
Ши гыргын маданиятын санаъаIкарар джони байрамыква маданиятын ва табрикааъа. Гул’сават Наврузовайс гьалед чIакIын угъурбы аIрзуламишаъа. «Нур» кIазетни редакциейн маIнкъыс ва гыргыни маданиятни ишчершис джанана сагъвалла ва ишее гьаIракатбы аIзуламишаъа!
